Ilan 139

Ti-Dindaan, a nyí m-bɔti kɔkɔ

139

1 Daafiidi di ŋmàn̄ nlan nee ki tīī bilaŋgaaliibi kpiliu.

Ti-Dindaan, a cɔ́ŋkì-mi ki béè-mi.

2 M yaa kāaa, m yaa yíkàaa, a nyí,

a bí ndandati ní ki nyí m-landɔkɔi.

3 M yaa còom̄aaa, m yaa dɔ̄ ki gèeǹaaa, a nyí,

a nyí tin kɔkɔ m ŋáańee.

4 Maa láá wāaǹ kinyɔkɔ ki lī tiba

ní a nyí tin kɔkɔ m là kí lèe.

5 A bí m-boon ki bí m-nyɔkɔpu,

a dū a-ŋal ki páaǹ m-pu.

6 A nín nyí-mi pu tikpilee cáá-mi maamaaci,

an jítì m-landɔkɔŋu pu ḿ ŋmā kí gbìl̄ taapu.

7 La ní m ŋūǹ kí cù kí nīn dátiǹ a-Fam ní?

La ní m ŋūǹ kí sāǹ kí cù ní aa bí niin ní?

8 M yaa nín jɔ́ḿ yilpuɔɔɔ, a bí niin,

m yaa tí dɔ̄ ditaŋkpiilinaaa, a bí niin.

9 M yaa túkú ifeen ki ŋàan̄ ki búntì

ditiŋkugbandi lapu pu yal kí nīn kóòyaaa,

10 a-ŋal bí niin mun kí kpòotī-mi,

a-ŋaŋgiil bí niin kí tíkiń-mi.

11 M yaa bí yii: «Dibɔmbɔndi ń dāá bìin̄ m-pu,

ŋwalifi ŋun māntìi tú-mee ń kpántí kunyeeuaaa!»

12 sii ceeyee, dibɔmbɔndi kaa sá dibɔmbɔndi,

ní kunyeeu wāĺ kii ŋwìińee.

Dibɔmbɔndi nì ŋwalifi sá sii cee tiwambaantiil ní.

13 Sii di náań m-landɔkɔjaatiŋu,

sii di máń-mi ki tākaǹ m-na poon.

14 M jáaḿ-si, kun puee a náań-mi

ní m-wunti sá maamaaci ní ki ŋān̄ tikpil.

A-tuuŋŋi sá maamaaci tuuŋŋi,

m nyí míǹ tiŋan.

15 Ŋyunti ŋun a nìn bíi nāantí-mi dibalin,

ní ki nìn bíi māā-mi ki tàkantí m-na poonee,

m-wunti laaba kaa nìn bí dibalin a-cee.

16 Ŋyunti ŋun m nìn dáá sá nnaantee, a nìn wāĺ-mi.

Kí wàatī iwiin in a tīī-mi

ḿ dūú kàl̄ kitiŋ puee ń kíĺee,

a nìn ŋmàn̄ i-nyɔkɔm ki ŋá a-gbɔŋkun ki síiǹ.

17 Unimbɔti, a-landɔkɔi pɔ̄ɔ̄ ḿ ŋmā kí gbìl̄ taapu,

i wīikí ní an kaa cáá ŋkaan.

18 M yaa bí yii ḿ kàaǹ-iee,

i làá nīn wīikí ki jítiǹ dibul pu.

M yaa fīntèe, m gbíntìi bí a-cee.

19 Unimbɔti, an sá á kúntí binikpitib

ní kí jà binikpɔliibi kí wàatī-mi.

20 Bi cáá a-yindi ki ŋmàtíǹ binib ní,

bi yíì a-yindi ki cáa ŋáań ikpiti.

21 Ti-Dindaan, mana ní ḿ taa nín̄ ná bin ná-see,

maa là kí ká bin jáà nì see.

22 M baasii ná-bi ní,

bi kpántì man m-ba nannanliibi ní.

23 Unimbɔti, kpèè m-pɔbil poon kí béé-mi,

cɔ̄ŋkì-mi ní kí béé m-landɔkɔi.

24 Kpèè m yaa tàkā nsaŋkpiti poon,

ní kí kpòotī-mi kí tàkan̄ a-saŋŋu pu.