M làá nyɔ̄ŋkì-si nì m-pɔbil kɔkɔ
138
1 Daafiidi di ŋmàn̄ nlan nee.Ti-Dindaan, m làá nyɔ̄ŋkì-si nì m-pɔbil kɔkɔ.
M làá gāā ilan kí pàkà-si inimbɔti nimbiin.
2 M làá gbàan̄ a-circir diikun,
a-neeŋkpaandi nì a-deedeeu puee,
m làá pàkà-si,
di sá yii a ŋá a nín pōoǹ puee ki jítiǹ min ti bàà dàkafēe.
3 Ŋwiin ŋun m yíiń-see, a kíí-mi,
a tīī-mi kunyannyaau nì mpɔn.
4 Ti-Dindaan, kitiŋ pu bɔtiibi kɔkɔ ń nyɔ̄ŋkì-si,
ŋyunti ŋun bi yaa gbìl̄ a-nyɔkɔ poon nyɔɔbuŋŋee!
5 Bí gāā ilan kí pàkà ti-Dindaan tuuŋŋi yii:
«Ti-Dindaan nyooti wīikéeee!
6 Min kamaa ti-Dindaan bíń yilpu yilpuee,
u wāĺ un sīntiǹ u-ba taapuee,
u bí ndandati ní ki nyí un yòontí u-ba yilpuee.»
7 M yaa bí dinimbinaamandinaaa,
a tìì-mi dimaŋfal.
A tàntī a-ŋal ki jáà nì m-nannanliibi,
ní ki cáá a-ŋaŋgiil ki fìil̄-mi.
8 Ti-Dindaan làá ŋá tikɔkɔ kí tīī-mi.
Ti-Dindaan, a-neeŋkpaandi bí ní ki cá jaanjaan.
Taa fá bin a dū a-ŋal ki náańee.