Yoob 9

Yoob kíí yii Unimbɔti nyí tikɔkɔ

1 Niinee ní Yoob kíí yii:

2 Tiŋman, m nyí yii an lafun sá míǹ.

Di sá yii mana ní unil ŋūǹ kí nīn bí deedee Unimbɔti nimbiin?

3 Unil nì Unimbɔti yaa làá kpáká,

Unimbɔti kaa làá kíí anyɔɔbun kutuku poonee dibaba gba.

4 U-ciiŋyi nyóò ní u-pɔŋŋu sá ŋkpaan,

ŋma di ŋūǹ kí yūĺ u-nimbiin kaa ká ditafadaaldi?

5 Úǹ di kpìkitī ajoon dicilpu dicilpu

ní ki lábití-ŋi ki cìb̀ u-ŋuul poon.

6 U yàntī kitiŋ nyeel cìŋkī,

u yàntī ki-jaantalkub kpìntī.

7 Úǹ di tìì ŋwìiń mara ní ŋú taa nyā,

ní kí dū iŋmalbijaa kí pìin̄ kudii í taa ŋmíntí.

8 Úǹ baba di kpátì kutagbɔŋu,

ní ki dū u-taaŋi ki tɔ́kɔǹ tiŋkub nyiŋgbanti pu ki cōom̀.

9 Úǹ di náań iŋmalbi kitiŋi nín bí pu aba abee:

dikitil din bí ŋgan púee nì din bí ti-yil kansikinee nì din bí ŋgiil púee^a.

10 U tūǹ atuŋkpaan ŋin ubɔ kaa ŋūǹ kí gbìl̄ ŋi-taapuee,

ní ki ŋáań maamaaci tuuŋŋi ŋin kaa cáá ŋkaanee.

11 Kpèè u ŋūǹ kí jītí m-caŋin ḿ taa wāl̀-u,

ní u yaa tí búntì ndanaaa, maa làá kpáàa béé.

12 U yaa fìkī tiba, ŋma di ŋūǹ kí yàntī ú fàtīí gíiǹní-tì?

Ŋma di ŋūǹ kí bàlifì-u yii: «Ba ní a ŋáańee?»

13 Unimbɔti yaa gíí diŋuulee, waa gítí u-boon.

Tipeebilindi tin bí tiŋkunee dòoń ki gbàantí u-taaŋi taapu,

an dàkà yii Raab nì u-naacimbi.

14 Kin mana ní man un bí nee, m làá ŋmā kí kíí-u?

La ní m làá ká anyɔɔbun kí dūú kíí-u?

15 Báà m yaa cáá ibaamɔn, maa làá ŋmā kí kíí-u.

Kun m pée ŋūǹ kí ŋée di sá ḿ mèè m-bɔsoonliu ú sɔ̄ m-saai!

16 Báà m yaa yíiń-u ní u kíí-mi,

maa máká yii u làá pīlifiǹ m-nyɔkɔ.

17 U yāntì u-buŋkpaaŋku fáá-mi ki lúkú,

u bíi tìì-mi tiweendi fám.

18 Waa yàntī ḿ fòotī báà fiii,

ama ní ki yāntì m-nyɔkɔ túŋkì.

19 Mimmee man nì Unimbɔti ń mɔ̀ɔɔ?

Báà an yaa sá dimool, u pɔ̄ɔǹ-mi sɔ́kɔ sɔkɔ!

Ḿ cùnnì-u ibɔsoonaaa?

Báà an yaa sá ibɔsoonaaa, ŋma di làá yíiń-u tibuul ní?

20 Báà m-bɔti yaa ŋān̄aaa, tin m làá sòoǹee làá fàtīí kpɔ̀ m-bɔti.

Báà m yaa kaa ŋá tibaaa, m-nyɔɔbuŋŋi làá tīī-mi dibɔkpil.

21 Maa kalin ŋá tibaaa?

Maa ti kpáàa nyí gba.

M gīiǹ nì m-ba ní.

22 Man ceeyee, a ŋá tibaaa,

aa ŋá tibaaa, an sá ubaanti ní.

An pu ní m lì yii: Unimbɔti yàntī

maanyiiba nì dibɔkpil daan kúù.

23 Nnaabukpaan ŋubɔ yaa jéetì kitiŋ pu ki kūū binibee,

Unimbɔti bí ní ki lāā maanyiibab bi-nimbinaamandi poon!

24 Unimbɔti yaa dū duulinya ki líiǹ binikpitibee,

ní ú bìin̄ bibɔsoonliibi nimbiin!

An yaa kaa sá úǹ di ŋáań míǹ, ŋma di gíti ŋūǹ kí ŋá míǹ?

25 M-maŋfal wiiŋyi sáń malaa malaa ki jítiǹ utaatanli,

i sáǹ kaa kpáàa ká nnaam ki dáká.

26 M-maŋfal wiiŋyi sáń malaa malaa kii meelabee,

a lì kii ukaabu nín tòó pu yilpu kí cúú u-jintee.

27 M yaa bàà bí yii m làá súntí m-yaliŋkii pu,

kí bútí m-nimbiin kí lēe,

28 ní falaa un poon m bée fàantí-mi.

Di sá yii m nyí sii Unimbɔti nín kaa làá sòoǹ kí pɔ̀-mee.

29 Kii a nín sòon̄ ki kūū m-bɔtee,

ba pu ní ḿ gíti tīī m-ba digìńdi fám?

30 Báà m yaa dū fɔfɔ ki fùl̄

ki dū njeem ki fíntì m-ŋalii,

31 a làá fàtīí gíiǹ-mi kí tɔ̄ tikpatin,

ní m-wampeeŋkaati gba kaa dāa gíti là-mi.

32 Di sá yii Unimbɔti kaa sá unil kii mamee ḿ ŋmā kí kíí-u,

àá ḿ ŋmā man nì u ń cù ibɔsoon.

33 Upàtil ubɔ mun kpá

kí ŋmā kí dū u-ŋal kí páań ti-liitil pu kí pàtī-ti.

34 Udaan bàà fòol̄ mbambaan ŋun Unimbɔti cáa gbáà-mi nee,

ní kí yàntī ú taa ti fàaǹ-mi.

35 M bàà làá ŋmā kí sòoǹ nì u kí taa fàŋkì.

Ama míǹ ní an kaa sá, maa ti yì m-ba.