Biilidaadi nín sòon̄ tiŋyee
8
1 Niinee ní usuwaja Biilidaadi fōō dinyɔɔbundi ki bí yii:2 A làá nīn pée sòoǹ yéè kí cáá sāā ŋyunti ŋulɔŋu ní?
Anyɔɔbun ŋin nyēē a-nyɔkɔnee bí kii kubuŋkpaaŋŋuee ní.
3 Unimbɔti pɔ̀ gandaaa?
Unimbɔti Mpɔŋkɔdaan kaa sòoǹ tibɔti ti-púɔɔ?
4 A-jipɔmbi máaǹ ki tin ŋá ikpiti,
an pu ní u dáaĺ bi-tafal bi-kpitii pu.
5 Ama sii, a yaa nyàab̄ Unimbɔti,
ki yaa gbāam̀ Unimbɔti Mpɔŋkɔdaan,
6 a yaa kaa ŋá tiba ní a-pɔbil bí dibee,
u làá wúń a-pu ní kí fàtīí tīī-si mpaan ŋun máaǹ-see.
7 A nín nìn bí min njaminee
kaa làá nīn téé a nín làá dāá nīn sá kun foolee.
*
8 Bàlifì bin līntiǹ-tee,
ní kí dàkafì bi-naanjab nín nìn kántì kántì tiŋyee pu.
9 Bi màl̄-ti nee, taa yúntì ní kaa nyí tiba mun.
Ti-maŋfal wiiŋyi kitiŋ nee pu jītí malaa kii mboonee ní.
10 Ama bíǹ làá dàkà-si ní kí sòoǹ nì si.
Bi làá lēē tin bi kāl̀ ki kée poon iciin nyɔɔbundi nee kí tùkù-si yii:
11 «Dikal ŋūǹ kí nyā laaba an yaa kaa sá kupuunaaa?
Kukaluu ŋūǹ kí nyā laakin nnyim kpéeee?
12 Nnyim yaa kpée, ku péetíǹ timool tin kíǹee kí kpā,
ŋyunti ŋun ku dáá púkuḿ baa láá gāā-kuee!»
*
13 Bin súntí Unimbɔti puee nín kúntíǹ puee dee.
Binikpitib mákal nín kúntí puee dee.
14 Kun pu bi mákée cúu tīl̀,
di sá yii bi-mákal gbanti bí kii tinaŋgbantalindee ní.
15 Bi yaa bàà dīntì bi-diiku puee, ku cìŋkī ní màkà maka,
báà bí nyā kí báań ku-pu, see kú lítí.
16 Bi bí kii busubu bun cáá ŋkpiim tikpil ki wīintí ŋwìiń puee ní,
bu tòó bu-paŋŋi bukpaa bun poon bu cɔ́ee.
17 Bu tòó bu-nyaaŋyi ataŋkpee kansikin,
ní ki nyàab̀ nsan ki kóò ataŋkpee poon.
18 Ama bi yaa kpīkitì-bu mpaan ŋun pu bu nìn yúee,
mpaan gbanti làá lì yii màa pée ká-bu jaanjaan.
19 Bin súntí Unimbɔti puee naam nín kúntí laakiŋyee dee!
Biba di làá nyā kí fōō bu-paaŋŋu.
20 Unil un baa kāntí u-pu tibee, Unimbɔti kaa féeń-u,
ní kaa tútúǹ un ŋáań ikpitee.
21 U làá yàntī á fàtīí ká tilaal,
ní kí yàntī á nīn bí dipɔɔpindin ki fàal̀.
22 Icoo làá cúú a-nannanliibi,
binikpitib làá wāŋkì.