Yoob 7

Yoob bíi yáliŋkí Unimbɔti pu

1 Unil bítam kitiŋ nee pu bí kii sooja tundee ní,

a lì kii upaadaan maŋfal wiiŋyee.

2 Kii uyumbu nín fèefī ki nyàab̀ mboon puee,

kii upaadaan nín cí kí fōō u-paati puee,

3 míǹ ní an bí-mi.

Iŋmal iŋmal sɔ̀ m-maŋfal kaa ti bí tiban.

M-paatii di sá iyaliŋki nyati.

4 M tin pée lì yii m dòontée, m kíĺ ki bíi bàlifī m-ba yii:

«Ŋyunti ŋulɔŋu ní kutaa làá wúntí dee?»

Kunyeeu nee fɔ̀kɔ̀,

ní m dɔ̄ ki lábití m-ba áli kutaa ń dāá wúntí.

5 Ijiliŋkpaam nì ipɔkɔ gbí m-wunti kɔkɔ pu,

m-wuŋgbaŋŋu lɔ̄tì lɔ̄tì ki kíǹ ki nyēē nnyim.

6 M-maŋfal wiiŋyi bíi sáń malaa malaa ki jítiǹ

usatalul gulfajantiliikee.

M-maŋfal wiiŋyi bíi kúntí dee,

dimákal kaa ti bí.

7 Unimbɔti, téetí yii m-maŋfal sá kufoou ní,

m-nimbibul pée gíti kpá kí ká nnaam.

8 Sii un di nìn kpèé-mee, aa ti làá wāl̀-mi.

A làá dāá nyàab̀-mi, ama m dāa gíti kpá.

9 Kii ditagbandi nín búntí pu kí wāŋkèe,

míǹ ní unil un nín sìntī ditaŋkpiilinee kaa ti gítiń.

10 Udaan yaa búntèe, waa ti gítiń u-dumpu,

ní laakin u nìn kóòyee, bi kpáàa pée súntì u-pu kpalaa.

11 An pu ní maa ti làá ŋmā kí nīn ŋmí.

M làá sòoǹ m-nimbinaamandi nee poon,

m làá yāliŋkì, kun puee m-nyɔkɔ túŋkì.

12 M sá tiŋku àá kupeebiliŋŋu kun bí nnyimineeee?

Kin ba pu ní a cí-mi míǹ?

13 M yaa lī yii m làá dòon̄ m-lambaŋki pu kí ŋùŋfì,

aayee, m làá dòon̄ m-dooŋu pu m-pɔbil ń sɔ̀ŋkèe,

14 ní a cáá tidamintiil ki fàantí-mi.

Kun kun a lèekī ki dàkà-mee kɔ̄ntí-mi dinyoondi.

15 A yaa bàà nyīī m-sil ki kūū-mi gba, m bàà là!

M yaan kpíì gba, an sɔ́ǹ m nín bí ki sá akpab ŋma nee.

16 M gīiǹ m-ba, maa làá nīn bí ki cá jaanjaan.

Maa ti bí tiban, yàntī-mi soooo.

17 Ba ní unil sá ní a dàkafī u-pu ní?

Ba pu ní aa pée mɔ̄ u-pu míǹ^a?

18 A-nimbikpeeŋu pée cɔ́ u-pu ní kutaafaau kamaa,

ní ki cɔ́ŋkí-u ŋyunti kamaa.

19 Ŋyunti ŋulɔŋu ní a làá gbèen̄ kí taa ti kpèè-mi ní?

A làá pée yàntī kubuŋu ń fáá m-pu dalbaaa?

20 Báà m yaa yīntì, ba ní an ŋáań-si ní,

sii un cɔ́ŋkí inifunaanee?

Ba pu ní a màkantí-mi kii ukpan nín màkà upeel puee ní?

M kalin kpántì diwaŋgul ki tīī-si níii?

21 Ba pu ní aa là kí dū m-yìntitam kí pɔ̄-mi,

kí fàtī a-boon kí tīī m-kpitii ní?

Man di cá kí dòon̄ ntaminee,

a làá dāá nyàab̀-mi, ama m dāa gíti kpá.