Yoob 6

Yoob nín kíí puee: U bíi yáliŋkí u-bɔɔbi pu

1 Niinee ní Yoob fōō dinyɔɔbundi ki kíí yii:

2 M̀mm, unil yaa bàà ŋūǹ kí ŋmàntī m-gìńdi,

unil yaa bàà ŋūǹ kí dū m-nimbinaamandi

kí ŋá saniya pu kí ŋmàntī!

3 Ama m-nimbinaamandi nyìm̀ ki jítiǹ tiŋku bul.

An pu ní m bíi sòoǹ fám fám.

4 Tiŋman, Unimbɔti Mpɔŋkɔdaan dū u-piiŋyi ki yá-mi,

ní m kíǹ ki bíi nyù i-looti.

Unimbɔti nyoondi bíi jáà nì mi.

5 Kumooun maŋki sūǹ ŋyunti ŋun ní

timɔsɔn dɔ̄ ki-nimbiin kí ŋmɔ́ee?

Àá unaa gíti sūǹ ŋyunti ŋun ní bi tīī-u timool ú ŋmɔ́ee?

6 A ŋūǹ kí jī tijin kaa ŋá ŋyaam an nīn mɔ̄ɔɔ?

Àá mmɔn ŋulɔŋu ní dijindi laakin pīiǹee cáá?

7 M yíì kí gbēē tijin tin bí mimmee.

M-falaau sá tijin tin di núutì-mee ní.

8 M bàà là yii ubɔ ń ŋá tin m mēēyee kí tīī-mi,

Unimbɔti ń tīī-mi kun m lèe.

9 Unimbɔti yaa bàà kíikí kí nà-mi dúsi dusi,

u yaa bàà kíikí kí tàntī u-ŋal kí púntí-mi.

10 M bàà làá yùkū nì dipɔɔpindi

digìńdi din poon m bí an kaa kúntí nee,

ní kí bàà ká diŋmeendi.

Maa bàà làá nyā Unimbɔti circirdaan nyɔɔbuŋŋi boon.

11 Ama maa ti cáá mpɔn kí nīn gbíntìi kā ki cɔ́tí.

M làá nīn bí dimaŋfalin kí tɔ̄ dilal?

Maa cáá foolboon ubɔ dee.

12 M-pɔŋŋu kaa sá ditaŋkpal pɔŋŋu,

ní m-wunti mun kaa tí pɔ̄ɔ̄ kii tasa kútee.

13 Maa tí cáá mpɔn ŋubɔ m-ni kí ŋmā kí fīī m-ba,

ní ubɔ mun kaa ti bí laaba kí tíkiń-mi.

14 Unil un wunti yɔ̄tèe cáá nsan u-juti ń sɔ̄ u-saai,

yaa sá fám, u dù Unimbɔti Mpɔŋkɔdaan faaŋku kí fá ní.

15 M-nabiyaamu fātì bi-boon ki tīī-mi kii mbun ŋun fóotèe,

a lì kii mbùmbiyaamu mun poon kūńee.

16 Anyintaŋkpee nì ntaayim yaa dūntèe

ní dinyiŋgbagbal ń gbí ibun gbanti.

17 Ama ní dipeel puee, ní í fóotí,

kutuntuŋu yuntiŋuee ní í kpā dicilpu dicilpu.

18 Kpaŋgulib kaa ti pàatī ibun gbanti cee,

bi dūú bɔ̄ kuteeun ní kí tin wāŋkì.

19 Kpaŋgulib bin nyánní Teema tiŋkinee nimbiliŋ nìn cɔ́ i-pu ní,

bisaŋkinliibi bin nyánní Seeba tiŋkinee nìn máká i-pu ní.

20 Ama an wùn̄-bi bi nín dū bi-mákal ki páaǹ kibùmbikee puee:

bi bàn̄ee, kun pu bi nìn mákée ŋá fám.

21 Ni sá kii ibun gbantee ní ki tīī man ni-bɔɔ!

Ni nín ká m-naabuŋuee ní an cúú-ni tifaandi.

22 M bālifì-ni yii ní tīī-mi tibaaa,

àá ní lēē ni-gaajawanti poon tiba kí pɔ̄-maaa?

23 M bālifì-ni yii ní fīī-mi kí nyāntí m-nannanliu,

àá upɔɔl ubɔ ŋaanaaa?

24 Dàkàmaan-mi, m làá ŋmīĺ,

dàkàmaan-mi tin poon m yīntèe.

25 Tibulcin nyɔɔbuŋŋi kaa tìì unil tiweendi.

Ama ní tùkù-mi kun pu ni wòoǹ-mee.

26 Ni là kí wòoǹ m-nyɔɔbuŋŋi fám níii?

Ama an sá anyɔɔbun fám ní,

unil un kaa ti cáá dimákalee nín sòon̄ ki tɔ́ kutaa puee.

27 Ni yaa ká kí tɔ̄ ditaŋkpiibil pu kasi,

kí dū nimbi ni-ba bɔɔ kí nyāfì, ni là!

28 Too, m gbàam̄-ni, kpèèmaan-mi,

kí tùkù-mi m yaa bíi mɔ́ntí-ni.

29 Ní fàtīí gítímaan ni-boon, nín̄ sámaan deedeedambi.

Fàtīí gítímaan! Ní béémaan yii maa ŋá tikpitil tiba.

30 Mili mili bɔti nyēē m-nyɔkɔnaaa?

Ni dàkafī yii m-limbil kaa gbìl̀ falaa níii?