Yoob 10

Unimbɔti náań-mi kí nàan̄-mi ní

1 M gīī nì m-ba,

an puee maa làá ŋmā kí cúú m-ba kí taa yāliŋkì.

M-poon kaam cɔ́tì ní m làá sòoǹ kí tùkù-u.

2 M làá tùkù Unimbɔti yii: taa kpɔ̀ m-bɔti,

tùkù-mi kun ní m ŋá ní a wòoǹ-mee.

3 An mɔ̄ǹ-si á nīn sàantí-mi,

kí fàtī a-boon kí tīī a-wannaaŋkaati,

ama ní kí yàntī án bútí binikpitibaaa?

4 Nisaal nimbiliŋ ní a cáaa?

Unil nín kpèé ki wāĺ tiwan puee,

míǹ ní si mun kpèé ki wāĺ-tàaa?

5 A-maŋfal wiiŋyi kaa náaǹ kii unilee níii?

A-biŋŋi jītí malaa malaa kii unil yaŋee níii?

6 Ba pu ní a nyàab̀ kí béé m-yìntitam ní?

Ba pu ní a fíkití ki nyàab̀ kí ká m-kpitii ní?

7 Sii a-ba pée nyí yii maa ŋá tiba

ní kaa tí ŋūǹ kí ŋmátí kí nyā a-ŋaan^a.

8 Sii a-ba ŋalii ní a dūu máń-mi ki náań-mi.

Íǹ di māntìi tú-mi, ní a là kí nàan̄-mi!

9 Téetí yii sii di máń-mi kii bi nín māā ditansambil puee,

ama ní a là kí nà-mi dúsi dusi ḿ kpántí ntam.

10 Sii di náań-mi ki tākaǹ m-na poon

kii bi nín bàtī nnaabiim kí ŋá disambilin mí kìl̄ puee.

11 A dū anancal nì ŋwuŋgban ki bīiǹ-mi,

ní ki ŋá-mi akpab nì igiin ki túkuǹ tɔb pu.

12 Míǹ boonee ní a ŋá-mi tiŋan ki tīī-mi dimaŋfal,

ní ki wúń m-pu tiŋan.

13 A dū abɔɔn bɔti tiba ki bál̀ a-pɔbilin.

M nyí kun ní a dàkafēe:

14 A là kí ká-mi m bíi ŋáań ikpiti ní,

ní kaa là kí dū m-yìntitam kí pɔ̄-mi.

15 M yaa lafun ŋá ikpitee, mbusu dɔ̄ ki cí-mi!

Báà m yaa kaa ŋá tibaaa, maa máaǹ kí yáatí m-yil.

Icoo nì falaa yāntì m gbí kii m nyùn̄ ndaamee.

16 M yaa gántì m-yilee, a jì-mi kii gbikintee ní,

a ŋáań maamaacib kí gbéeǹ m-weeŋyi pu.

17 A jáà nì mi kaa gbèentí,

diŋuul din a gíí m-puee mɔ̀tīí gbēentí,

ní a-janjaliibi dòoń akiti akiti kí jáǹ-mi.

18 Ba pu ní a nyántìń-mi m-na poon ní?

Bi yaa bàà màl̄-mi kaa yōoǹee, ubɔ kaa bàà kāntí-mi.

19 M bàà pée nyēē m-na poonee,

m bàà cá dikaakulin ní dicilpu,

m bàà bí kii unil un kaa pée kāl̀ kitiŋ pu ki kée ní.

20 M-wiiŋyi kaa ti kíǹ ki náaǹ.

Gbèen̄ kí taa ti jáǹ-mi, kí yàntī-mi soooo

ḿ pée ká dipɔɔpindi fiii iwiin in kíǹ-mi ḿ dūú kàl̄ nee poon,

21 kí wàatī ḿ búntí dibɔmbɔndi nì ŋkúm booku tiŋki

kin poon bi cá kaa gítińee.

22 Niinee, dibɔmbɔŋkpaandi nì fikil fikil di bí,

ní ŋwalifi bí niin kii dibɔmbɔndee.