Yoob 3

YOOB NÌ U-BƆƆBI BITEE NÍN SÒON̄ NÌ TƆB PUEE

(3–31)

Yoob bíi yáliŋkí nì u-ba

1 Míǹ boonee ní Yoob dāa wāaǹ kinyɔkɔ ki tɔ́ ŋwiin ŋun bi màl̄-uee mbusu^a. 2 U nín nìn sòon̄ puee sɔ̀.

3 M bàà là yii Unimbɔti ń kúntí ŋwiin ŋun ní bi màl̄-mee,

kí kúntí kunyeeu kun ní m-na cáá m-poolee.

4 Ŋwiin gbanti ń kpántí dibɔmbɔndi wiiŋŋu!

Ŋu-bɔti ń taa ti nín̄ ká Yilpu Fɔ́ŋŋŋ Nimbɔtiu!

Ŋwalifi ŋubɔ ń taa ti ŋmíntí-ŋu!

5 Dibɔmbɔndi nì ŋkúm booŋŋu ń nīn bàlifī ŋu-pu,

atagban ń nīn pée bīī ŋu-pu,

uŋmal ń cúú ŋwìiń ŋwiin gbanti.

6 Kunyeeu kun ní m-na díkí m-poolee ń nīn bɔ̀ǹ kí jītíǹ tinyati kɔkɔ,

bí taa ti kàaǹ-ŋu kí kūtì dibindi poon wiiŋyi pu,

ní bí taa ti kàaǹ-ŋu kí kūtì iŋmal wiiŋyi pu!

7 Unimpu ubɔ ń taa ti cáá dipool kunyeeu kun ní m-na nìn cáá m-poolee,

bí taa ti gbìl̄ ifaal kuŋkuuntii pu kunyeeu gbanti!

8 Bin tòó iwiin mbusu,

ki nyí bi nín fìntī kupeebiliŋŋu Draagɔn puee

ń tɔ̄ kunyeeu gbanti mbusu.

9 Ku-taafaaŋmalbijaai ń kpántí dibɔmbɔndi!

Kú cīití kutaa wúntitam kí gīī

kí taa wāl̀ ntaafaawìiń!

10 Di sá yii kuaa ŋá tiba ki pīiǹ m-na maaliŋu ki yāntì u màl̄-mi

m dāa kɔ́ nnaabu ŋun poon m kɔ́ nee.

11 Ba pu ní maa kpíì m-na poon ní?

Ba pu ní bi nín màl̄-mi kpalaayee, maa kpíì ní?

12 Ba pu ní m ká ataa ali ŋin làl̄-mee ní?

Ba pu ní m ká abii ali ki ŋáam̀ ní?

13 Kɔnampu nee m bàà bí ŋgbansɔŋfin dikaakulin.

M bàà dɔ̄ ki gèeǹ ki ŋùŋfī

14 nì bibɔtiibi nì kitiŋ pu yidambi

bin nìn fātìi máń tibɔtinaakɔti tin nìn lítèe,

15 nì abɔtibil ŋin cáá sindaariya

ní animbil gbí bi-diiŋŋinee.

16 Àá ba pu ní baa dū-mi ki bál̀ kitiŋin kii kibiki kin bi lēē ki fée,

a lì kii kibiki kin bi màl̄ kaa yōoǹee.

17 Dikaakulinee, binikpitib kàal̀ soooo,

ní binib bin túń ditundi ki gīīyee kāntí diŋuŋfil.

18 Bisarkadambi kāntí dibatɔl,

baa ti gbìl̀ bijanjaliibi bin cí-bee nyɔkɔ pu.

19 Ŋwaamu nì bikpaambi kɔkɔ bí niin ní,

uyumbu kpiliu kaa ti cáá u-pu mpɔn.

20 Ba pu ní Unimbɔti yàntī bin jīǹ falaayee gbíntì bí dimaŋfalin ní?

Ba pu ní bin poon kaam cɔ́tèe gbíntìi fòotī ní?

21 Bi kā ki cí ŋkúm, ama ŋkúm kaa dòoń^b,

bi fíkití an kɔkɔ pu ki nyàab̀-mì kii tigaajawammɔntiilee.

22 Bi yaa bàà ká dikaakul diba poon kí dòon̄,

bi bàà làá nīn bí dipɔɔpindin ki fàal̀ ní!

23 Ba pu ní Unimbɔti tìì unil un kaa nyí laakin u cée dimaŋfal ní?

An niliu ní Unimbɔti dù kunaabakau kí bàkā u-pu!

24 Diniindi di kpántì m-jinti,

ní m dùǹ kii nnyim nín pùub̀ puee.

25 Kun fàantí-mee di bàń-mi,

kun m fàŋkée ní m kāntí.

26 Maa cáá ŋgbansɔŋfi, kaa cáá dibatɔl,

kaa cáá diŋuŋfil, ama iyaliŋki di māntìi tú-mi.