Yoob 4

Eeliifaasi nín sòon̄ puee: Unil un Unimbɔti dátí u-tafalee bí mmɔnneeee!

1 Niinee ní uteemanja Eeliifaasi fōō dinyɔɔbundi ní ki bí yii:

2 An nín píĺ-si puee, taa bàà là kí sòoǹ.

Ama taa ŋūǹ kí nīn ŋmí míǹ ki cá.

3 A nìn dàkā binib tikpil

ki nìn tútuǹ biwɔfib bi ká mpɔn.

4 A-nyɔɔbuŋŋi nìn tīkintí bin cá kí lítée.

A nìn tìì bin gīīyee mpɔn.

5 Kɔŋkɔnnee, sii ní agìń bāań a-wunti yɔ̄tèe.

An bāań-si dee, ní tifaandi cúú-si!

6 A nín fàŋkí Unimbɔti puee kaa sá a-mákalaaa?

Bi nín kaa kāntí tikpitil tiba a-puee kaa tìì-si dimákalaaa?

7 Téetí tin bí nee, Unimbɔti pée nāaǹ maanyiiba dalba a káaa,

àá u nāaǹ ubulcinnil ní a ká ní?

8 M dáań ki ká tin bí nee yii:

Unil yaa kùn̄ tikpitil ki búĺ agìńee,

u dāa cēē tikpitil nì agìń mun ní.

9 Unimbɔti yaa fōotèe, bi kúù ní,

u-ŋuul fooku di wù-bi kii ŋŋmee.

10 U yàntī gbikinti kaa ti mùuǹ ní upeecuncuti kaa ti sūǹ

ní agbikintipɔmbil nyiŋŋi kɔ́fí.

11 Ugbikintija kúù, kun puee waa ká tiba kí cúú kí ŋmɔ́,

ugbikintinaati biyaamu sáǹ ki yàl̄.

12 M fōō tibɔti tiba dibalin,

bi lɔ́kɔfì tibɔti tiba m-tafalin,

13 ŋyunti ŋun binib dámintí kunyeeu

bi-landɔkɔi kóò fikil fikil poonee,

ŋyunti ŋun binib dɔ̄ ki gèeǹ fɔ̀rtititee.

14 M nìn fāŋkì ní tiwool kɔ́-mi

ní m-wunti bíi jìkì.

15 Kubuŋu kubɔ nìn bíi fátí m-nimbiin

ní m-wunti sáǹ yàrrr.

16 Ubɔ nìn yú niin maa béè-u tiŋan,

kujiliŋu kubɔ nìn bí m-nimbiin.

An nìn dáá ŋmí, ní boonee m dāa gbìl̄ m-neen ŋubɔ pu yii:

17 «Nisaal ŋūǹ kí nīn bí deedee Unimbɔti nimbiinaaa?

Unil ŋūǹ kí nīn bí circir un náań-uee nimbiinaaa?

18 Unimbɔti kaa máká u-tuuŋyi pu,

u kāntí úǹ u-ba tɔntɔnliibi pu tikpitil ki sòoǹ.

19 Kin ataa aŋa pu ní u làá nīn máká nisaalib pu?

Di sá yii kuyɔkɔu ní bi dūu máń-bi

ní bi-wunti sá ntam.

Baa pée pɔ̄ɔ̄ dimatil kii kugbuluŋgbuŋŋuee ní!

20 Unil ŋūǹ kí nīn bí dimaŋfalin kutaafaau,

ama ku dāa jóotée, u kpántì un kaa ti bée kí nīn cá jaanjaan,

ní ubɔ kaa kpáàa dūu yíiń tiba.

21 Ŋŋmii ŋun ŋúb́ bi-maŋfalee cúu tīl̀,

ní bí kpú kaa kpáàa ká iciin.»