Eesiteer 3

Amaani nì Maardoosee jaaku bɔti

1 Míǹ boonee ní ubɔti Asuweerusi kāaǹ Ameedata jipɔɔn Amaani u-tɔntɔŋkpilib kɔkɔ pu tikpiti. Amaani gbanti nìn sá Agaagi naakookun ní^a. 2 Ubɔti nìn yóoǹ bikàlimbi bin bí u-cindin ki tūǹ atuunee mara yii Amaani yaa jītée, báà ŋma ń gbàan̄ u-nimbiin kí tīī-u jilma. Ama Maardoosee nìn yíì kaa gbàantí, kaa tàtīi dòontí dicincibil Amaani nimbiin. 3 Ní bikàlimbi bin kɔ kíǹ ubɔti cindinee bālifì Maardoosee yii: «Ba pu ní sii kaa tɔ́ ubɔti marau un u yóoǹee ní?» 4 Bi pée dāantí tibɔbaantiil gbanti ní ki tùkù Maardoosee ní waa fātìi tɔ́. Ní u bí-bi yii úǹ sá ujuudaja ní. An pu ní bi dūu tùkū Amaani kí kpèè u yaa làá nīn gbíntì ki ŋáań míǹ. 5 Amaani nín lafun dáań ki ká yii Maardoosee kaa gbàantí u-nimbiin kaa tí tàtīi dòontí dicincibil ki tìì-u jilmee, ní u fōō diŋuul u-pu. 6 U nín béè yii Maardoosee sá ujuudajee, ní u ká nlandɔkɔ yii Maardoosee baba maŋfal ní waa làá lēē, ama u làá kúntí Maardoosee nì u-yab Juuda yab bin kɔkɔ bí ubɔti Asuweerusi tiŋki kɔkɔnee ní. 7 Ubɔti Asuweerusi nín jíń dibeel abin saalaa nì ali, uŋmapeepeekaa un bi yíì Niisaŋyee poon ní bi tɔ́ Puur, an dàkà yii bi tɔ́ kasi Amaani nimbiin ŋwiin kamaa pu nì uŋmal kamaa pu kí kpèè ŋwiin àá uŋmal un di máaǹ ú kpɔ̀ kí céetí Juuda yabee. Ní an dūu lítì uŋmal saalaa nì uliliiti pu, uŋmal gbanti ní bi yíì Adaar.

Amaani bíi bɔ́ntí kí kpɔ̀ kí céetí Juuda yab

8 Ní Amaani bí ubɔti yii: «Dinibul diba bí ki yàl̄ ki kɔ́ a-tinjaŋŋi kɔkɔn, ki nyáń di-ba nì anibul ŋin kíǹee. Di-marab nyáń bi-ba nì anibul kɔkɔ marab, ní bíǹ kaa tɔ́ ubɔti marab. Aa cáá ipaati iba bi-pu kí yàntī bí nīn bí ŋgbansɔŋfin. 9 Ti-baa ubɔti, an yaa bàà ŋān̄ a-ceeyee, á bàà ŋmà kugbɔŋu kí pɔ̄ kinyɔkɔ bí kpɔ̀ kí céetí-bi. Man làá ŋmàntī animbil kúti kutukub saalaa kí tīī a-kàlimbi bin bí a-cindin ki tūǹ atuunee bí dūú ŋá ubɔti nimbiliŋ dakaau poon.» 10 Niinee ní ubɔti fúutì u-bɔmbiki kin cáá u-daaŋkuee u-ŋaan ki dūu tīī Juuda yab pulincɔnti Amaani un sá Ameedata jipɔɔn ki sá Agaagi naakookunee. 11 Ní ubɔti kíí-u yii: «M gíiǹ a-nimbiliŋ ki kpáaǹ dinibulee ki tīī-si á ŋá-bi min a lèe.»

12 Ní bi yíiń ubɔti gbaŋŋmaliibi uŋmapeepeekaa iwiin saalaa nì ita dal. Ní Amaani yāntì bi ŋmàn̄ tigbɔn ki tīī atinjan kɔkɔ bɔtibiliŋ nì ŋi-gɔminab nì dinibul kamaa bɔtiu. Bi nìn ŋmàn̄ kugbɔŋu ki tīī dinibul kamaa di-sooŋyin nì di-ŋmaŋmabiti ní. Ubɔti Asuweerusi yindi pu ní bi ŋmàn̄, ki dū u-bɔmbiki kin cáá u-daaŋkuee ki nyīī tigbɔnee pu. 13 Ní ubɔti tuuŋyi yōoǹ tigbɔnee ki yākatì ubɔti tinjaŋŋi kɔkɔn. Bi nìn ŋmàn̄ tigbɔnee poon yii: «Bi pú kinyɔkɔ yii uŋmal saalaa nì uliliiti poon, Adaar ŋmaliu iwiin saalaa nì ita dalee, bí kpɔ̀ kí céetí Juuda yab kɔkɔ, binipɔmbi nì bitikpilib nì binimpoobi nì mbiyaamu. An sá ŋwimbaanti ní bí kpɔ̀ kí céetí-bi kí yòon̄ bi-wanti. 14 Kugbɔŋu kun bi ŋmàn̄ ki tīī kitiŋ jaaŋŋi kɔkɔee sá mara ní bi yóoǹ, ní ki tùkù anibul kɔkɔ ń bɔ́ntí ŋi-ba kí cīití ŋwiin gbanti.» 15 Ní ubɔti bí yii u-tuuŋyi ń yòon̄ tigbɔnee kí cáá yàkatī malaa malaa, ní bi cáa yākatì, ní maree dūu gbītì Suusi ditiŋyil poon. Ŋyunti gbantee Amaani nì ubɔti cūtìi kāl̀ ki bíi nyù ndaam, ní Suusi tiŋki kɔkɔ kɔ́ dinimbinaamandin.