Eesiteer 2

Eesiteer kpántì unimpubɔti

1 Míǹ jítì boon, ubɔti Asuweerusi ŋuul sɔ̄ŋkèe, ní u téetì Fastii nín nìn ŋá-u miŋyee, nì u mun nín nìn síiǹ-u laakiŋyee. 2 Niinee ní bin sá ubɔti kpambaliŋee bí-u yii: «An máaǹ tí nyàab̀ bisapɔmbi bin ŋān̄ kunyaaŋŋu tikpil kaa nyí uninjee kí tīī ubɔti. 3 An puee ubɔti ń lēē u-tiŋki jaaŋŋi kɔkɔn bikàlimbi bí nyàab̀ bisapɔmbi bin ŋān̄ kunyaaŋŋu tikpil kaa nyí uninjee. Bí cáań-bi Suusi ditiŋyil, kí kɔ́ǹ-bi binimpoobi diiŋŋin. Bí dū-bi kí ŋúbiǹ Eegee, ubɔti faaliu un cí u-nimpoobee, ní úǹ ń tīī-bi ikpafi in ŋáŋkí tiwunee bí nīn ŋmìtī. 4 Ní usapɔɔn un yaa fáatì ubɔtee ń kpántí unimpubɔti kí fōō Fastii yil.» Tibɔti gbantee nìn mɔ́ɔkiǹ ubɔti ní u yāntì bi ŋá míǹ.

5 Ujuudaja ubɔ nìn bí Suusi tiŋki kin sá ditiŋyilee poon, bí yíì-u Maardoosee. U sá Beenjameen naakookun. U-naanjab di sá Yaayiir nì Simeeyii nì Kiisi. 6 Kijapaayee nìn kútì binib bin Babiloon bɔtiu Neebukadineesaar nìn cúuń kuyuŋu Jeerusaleem tiŋkin ki kpáaǹ Juuda yab bɔtiu Yookooniyayee poon. 7 Maardoosee nìn fōō u-baawaai bisal u kā u-cee, bi yíì-u Adaasa àá Eesiteer. U-na nì u-baa nìn kpíì, ní Maardoosee fōō-u ki ŋúb́ kii u-bisalee. Usapɔɔnee nìn ŋān̄ tikpil.

8 Bi nín dū ubɔti nín lī puee nì u-marau ki báakì ntimu poon yii ubɔti nyàab̀ bisapɔmbee, ní bi kóoǹní bisapɔmbi tikpil ki cáań ki kpáfì Suusi tiŋki kin sá ditiŋyilee poon, ní Eegee kpèé-bi. Bi cáań Eesiteer mun ubɔti cindi, ki dū-u ki ŋúbiǹ Eegee un cí ubɔti nimpoobee. 9 Eesiteer nìn kɔ́ kijapaayee, ki ká diyimɔɔl u-cee, ní u nyàab̄ ikpafi in u làá nīn ŋmìtī u-wunti ń nīn ŋān̄ee nì tin u làá nīn jīǹee malaa ki tīī-u. U nìn lēē bisapɔmbi bin bí ubɔti cindinee biluli ki tīī-u bí nīn bí u-cee ki tútúǹ-u, ní ki kpēē ubɔti diiŋŋi kudimɔntiiu ki cáá-bi ki kɔ́ǹ niin. 10 Eesiteer kaa nìn nyántì u-ba ki dàkā yii u sá dinibul dinee àá u-nyeeŋŋu sá doo, kun puee Maardoosee nìn kpáafì-u yii ú taa pée tùkù ubɔ u-nyeeŋŋu. 11 Baabadalee, Maardoosee pée cá binimpoobi diiŋŋi mɔŋkiŋu ní ki kpèé yii Eesiteer bí mana àá bi ŋúb́-u mana.

12 Ŋyunti ŋun ní usapɔɔn yaa dū ikpafi ki ŋmītì u-wunti iŋmal saalaa nì ili ki dóò kii an nín bàlifī unimpu ń dū ŋyunti ŋun kí bɔ́ntí u-bee, ní ú nín cù ubɔti Asuweerusi cee. Di sá bi nìn dù ŋkpam min bi yíì miiree ní kí nùkù bi-wunti iŋmal iluu, ní kí dū iŋmal iluu mun kí ŋmìtī binimpoobi kpafii in ŋáŋkí tiwunee. 13 Usapɔɔn un yuntiŋu yaa bāań ú cù ubɔti ceeyee, bi tìì-u tin kɔkɔ u yaa là kí ŋúb́ kí cù ubɔti cindinee ní. 14 U nìn cá kujoou ní kutaa yaa wúntì kutaafaauee ní ú fàtīí gítiń kí kɔ́ binimpoobi bililiitiibi diikun, ní ufaal Saakigaasi un cí ubɔti bɔmbee cí-bi. Baa ti gítí ubɔti cee, see un di yaa kɔ́-u ní u yíiń u-yindi yii ú dāan̄ee baba di gítí.

15 Abisayiil bisal Eesiteer, Maardoosee baawaai bisal un u nìn fōō ki dūu kpántì u-bisalee, mun yuntiŋu bāań ú cù ubɔti cee. Waa nìn bālifì yii u là kí nīn ŋúb́ tiba, see tin Eegee ufaal un cí ubɔti nimpoobee sáŋkì-u yii ú yòon̄ee. Eesiteer nìn kāntí diyimɔɔl un kamaa yaa nìn pée ká-uee cee. 16 Ubɔti Asuweerusi nín jíń dibeel dibinluluútiil uŋmasaalaati poon, uŋmal un bi yíì Teebeetee, ní bi cáá Eesiteer ki cūnnì ubɔti dumpu. 17 Ubɔti naŋki nìn kɔ́ Eesiteer tikpil ki jítiǹ binimpoobi bin kíǹee kɔkɔ. U nìn ká ubɔti cee diyimɔɔl nì kulaŋŋaŋfitiiu ki jítiǹ bisapɔmbi bin kíǹee kɔkɔ. Ubɔti nìn dū kibeefuulii ki cíkiǹ-u, ní ki dū-u ki kpántì unimpubɔti Fastii paaŋŋu. 18 Ní ubɔti ŋá tican Eesiteer pu, ní ki yíiń u-tɔntɔŋkpilib nì u-kàliŋkpilib, ní ki pú u-tiŋki jaaŋŋi kɔkɔ lampoo, ní ki ŋá binib tiniti mbɔtiyaamin.

19 Bi nìn gíti nyàab̄ bisapɔmbi nliliitiim ki kpáfì ubɔti dumpu. Ŋyunti gbantee, Maardoosee bí ubɔti cindi ki sá ukàlinja. 20 Eesiteer kaa nìn yāntì bi béè u-nyeeŋŋu nì dinibul din u sée, kii Maardoosee nín nìn kpáafì-u puee. Eesiteer pée gbíntìi ŋúb́ tin Maardoosee nìn dàkā-uee kii u nín nìn pée bí u-cee ki ŋúb́-tì puee ní.

Maardoosee cúú binib bin là kí kpɔ̀ ubɔtee

21 Ŋyunti ŋun Maardoosee bí ubɔti cindin ki tūǹ u-kàlintundee, ní bifaabi bili Bigitan nì Teereesi bin nìn cí ubɔti punyɔkɔkee fōō ubɔti pu diŋuul ki nyàab̀ kí kpɔ̀-u. 22 Ama ní Maardoosee gbìl̄ an bɔti, ní ki dūu tùkū unimpubɔti Eesiteer, ní úǹ dū an bɔtee ki nāatì ubɔti. 23 Bi cɔ́ŋkì ki kpēēyee, tibɔtee lafun sá mbaamɔn, ní bi cúú bi-liitil ki lúntì idɔ pu bi kpíì. Ní bi dū an bɔtee ki ŋmàn̄ ki ŋá kugbɔŋu kun poon bi ŋmà tibɔti ki cáa kpáafée ubɔti nimbiin.