Eesiteer 4

Maardoosee bālifì Eesiteer ú jòoń-bi

1 Maardoosee nín gbìl̄ tin kɔkɔ jítèe, ní u dáaĺ ki cátì tiwan tin u pēēyee, ki dū kutukub ki pēeǹ, ki dū ŋfantam ki pùkū u-ba, ní ki nyáń kitiŋin ki gbáà ibiil mpɔn ki yáliŋkí. 2 U bàn̄ ubɔti mɔŋkiŋuee ní ki yúl̀, kun puee ubɔ kaa cáá nsan kí nīn pēē kutuku kí kɔ́ ubɔti cindi. 3 Míǹ ní kitiŋ jaaŋŋi laakin kamaa ní mara un ubɔti yóoǹee yaa bàn̄ee, an sá dikpool ní Juuda yab cee. Bi nìn bōob̀ nnyɔmu, ní binib tikpil sūǹ ki yáliŋkí, ní ki pēē kutukub ki dɔ̄ ŋfantamin ki bíntí.

4 Eesiteer tɔntɔnliibi bisapɔmbi nì u-faabi cūtìi tùkū-u tin bi kée, ní u-pɔbil bíil̀ tikpil. Ní u nyàab̄ abɔkuti ki tīī-bi bí cáá tīī-u, ú pèetī kutukub bin u pēēyee kí dū abɔkuti ŋin u tīī-uee kí pèen̄, ama ní Maardoosee yíì. 5 Niinee Eesiteer yíiń Ataaki, ufaal un ubɔti nìn tīī-u ú nīn bí ki tútúǹ-uee ki tú ú cùú bàlifì Maardoosee kí béé kun di yì-tì ní u bíi ŋáań mimmee. 6 Ní Ataaki nín cá ki bàn̄ ki ká-u u yú mmɔŋkijaa, ubɔti naakooku nyɔkɔpu. 7 Ní Maardoosee máafì-u tin kɔkɔ jítèe, nì animbil ŋin nyɔkɔm Amaani pōoǹ ubɔti yii bi yaa kūū ki céetì Juuda yab u làá cáá ŋá ubɔti nimbiliŋ dakaaunee. 8 Ní u dū kugbɔŋu kun bi ŋmàn̄ Suusi an gbītì an kɔkɔ yii bí kpɔ̀ kí céetí Juuda yabee ki tīī-u ú cáá dàkà Eesiteer, ú béé tin poon bi bée, kí ká ubɔti kí gbàam̀-u ú sɔ̄ u-nibul Juuda yab saai. 9 Ní Ataaki cáá tibɔti tin Maardoosee sòon̄ee ki tùkū Eesiteer. 10 Ní Eesiteer bí Ataaki yii ú cùú tùkù Maardoosee yii: 11 «Ubɔti tɔntɔnliibi kɔkɔ nì anibul ŋin kɔkɔ bí ubɔti tinjaŋŋi poonee nyí yii ubɔti yaa kaa yíiń sii ubɔ ní a jítìi kɔ́ u-cindinee, see bí kpɔ̀-si, an sá mara ní. Ama sii un ní ubɔti yaa tāntì u-bɔtikpandɔŋu ŋun sá sindaariyee ki túĺee, sii di ŋmátí. Man ŋá iwiin mmuŋku nì saalaa dee ubɔti kaa yíiń-mi m cūtì u-cee.» 12 Ní Ataaki cáá Eesiteer nín lī puee ki tùkū Maardoosee. 13 Ní Maardoosee kíí Eesiteer yii: «Á taa dàkafì yii a nín bí dibeecindinee puee, sii baba di làá ŋmátí Juuda yab kɔkɔ kansikin. 14 A yaa kaa ŋá tiba agìń yuntii in poon ti bí nee, Unimbɔti làá jòò Juuda yab kí fīī-bi, ama ní sii nì a-baa dicaŋkun yab kɔkɔ ń kpú. Ŋma tin ká an yaa kaa sá tin bí nee pu ní a kpántì unimpubɔti?» 15 Ní Eesiteer kíí Maardoosee yii: 16 «Á cù kí kpāfì Juuda yab bin kɔkɔ bí Suusi tiŋkinee, bí bóob́ kinyɔkɔ kí mèè Unimbɔti kí tīī-mi. Ní taa jī kí taa nyɔ̀ iwiin ita ŋwiimpu nì kunyeeu. Ma mun nì m-tɔntɔnliibi binimpoobi làá bóob́ kinyɔkɔ míǹ mbaantiim. Boonee ní ḿ cùú ká ubɔti nì min kɔkɔ mara yú yii ubɔ kaa cée, ní an yaa sá ŋkúmaaa, ḿ kpú.» 17 Ní Maardoosee cūtìi ká u-yab ní ki ŋá kii Eesiteer nín bālifì yii bí ŋá puee.