Neeyeemiya 6

Neeyeemiya nannanliibi nyàab̀ kí ŋá-u tikpitil

1 Sambalati nì Toobiya nì Geeseem ulaalibuja nì ti-nannanliibi bin kíǹee nìn gbìl̄ yii m fātìi máń digundi dibùndi diba kaa ti bí. Ŋyunti gbantee, punuubi di nìn kíǹ maa láá dūu cóoǹ. 2 Sambalati nì Geeseem nìn túnní binib bí tùkù-mi yii ḿ dāan̄ tí kpāfì Keefiriim tiŋkin Oonoo tantakalin. Bi nìn cáá nlandɔkɔ kí ŋá-mi tikpitil. 3 M nìn tú binib bí cùú tùkù-bi yii: «Atuun ŋin m bíi tūǹ dooyee wīikí tikpil, an pɔ̄ɔ̄ ḿ ŋmā kí dāan̄ ni-cee. M yaa yíkì ki nín dòoń ni-cee, ditundi làá gbèen̄.»

4 Bi túnní bi yíí-mi míǹ ŋfunyɔm minaa pu, ní m kíí-bi tibɔbaantiil. 5 Sambalati nìn gíti túnní u-tɔntɔnliu ubɔ ŋŋmooŋmootiim, u ŋúbiń kugbɔŋu ncal an kaa fúuń tiba poon. 6 Bi nìn ŋmàn̄ kugbɔŋu gbanti poon yii: «Atimbun kɔkɔ poonee, bi sòoǹ ní Geeseem mun lī yii sii nì a-nabiyaamu Juuda yab cáá nlandɔkɔ kí nyā ni-ba. An pu ní a fātìi bíi māā digundi. Bi lī gba yii a là kí kpántí bi-bɔtiu ní. 7 Bi bí yii a lēē Unimbɔti bɔnaatiliibi Jeerusaleem bí bāakì yii a kpántì Juuda tiŋkin ubɔti. Tibɔti gbanti làá bà Peeriisi yab bɔtiu cee, an puee dāan̄ man cee tí kpāfì kí sòoǹ.» 8 Ní m tú bí tùkù-u yii: «Tin kɔkɔ a sòon̄ nee, mbaamɔn ŋubɔ kpá poon, sii a-ba di náań-tì.» 9 Binib gbanti kɔkɔ nìn nyàab̀ kí fàaǹ-ti ní. Bi nìn dàkafī yii ti-wunti làá yɔ̀tī tí gbèen̄ ditundi ní.

«Kɔŋkɔnnee m-Dindaan, tīī-mi mpɔn!»

10 Dalbee man nìn cūtì ki ká Deelaya jipɔɔn Seemaya, Meetabeel naantiiu, kun puee waa nìn ŋūǹ kí nyā. Ní u bí-mi yii: «Tí kɔ́ kunimbɔtidiin, poon poon diikun kí kpāfì. Tí pìin̄ mpunyɔmu kí kpàl̄, di sá bi là kí kpɔ̀-si. Kunyeeu ní a-nannanliibi làá dāan̄ kí kpɔ̀-si.» 11 Ní m kíí-u yii: «Kii man nee di sáńaaa? Àá unil ulɔu di bí kii man nee ní kí kɔ́ kunimbɔtidiin kí taa kpú? Maa làá cù.»

12 M nìn béè yii an kaa sá Unimbɔti di nìn tīī-u dinyɔɔbundi ú dūú nàatī-mi, ama an sá Sambalati nì Toobiya di nìn tīī-u animbil ú sòoǹ nì mi míǹ. 13 Ba pu ní bi nìn tīī-u animbil? An nìn sá ú sòoǹ míǹ ḿ fàŋkì kí nóó u-saŋkii kí ŋá ikpiti. Niinee bi bàà ká nsan kí bīil̀ m-yindi kí kɔ́ǹ-mi icoo dee.

14 «M-Nimbɔtiu, taa súntí tin Toobiya nì Sambalati nì Noowadiya, unimpu un nàatī a-bɔtee, nì a-bɔnaatiliibi bin kíǹee nín ŋá tin ki nyàab̀ kí fàan̄-mee pu.»

15 Bi nìn dū iwiin imuŋku ili nì saalaa nì ili ní ki máń ki dóò digundi, uŋmal un bi yíì Eeluulee wiiŋyi mmuŋku nì iŋmoo dal. 16 Ti-nannanliibi kɔkɔ nín gbìl̄ mimmee, tifaandi nìn kɔ́ atimbun ŋin nìn māntìi tú-tee kɔkɔ ní bíǹ bi-ba nìn ká yii bi sīntì taapu. Niinee bi béè yii an sá ti-Nimbɔtiu di tútúǹ-ti ní ti túń ditundi gbanti ki dóò.

17 Ŋyunti gbanti kɔkɔ mun poonee, Juuda yab bɔtibiliŋ nìn ŋmà Toobiya tigban ní úǹ kíikí-bi. 18 Di sá u nì Juuda yab tikpil nìn pūtì ki pōoǹ tɔb, kun puee u nìn sá Araa jipɔɔn Seekaniya coo, ní úǹ u-ba jipɔɔn Yeewoowanan nìn cáá Beereekiya jipɔɔn Meesulam bisal. 19 Bi nìn sòoǹ ki pàkà-u m-nimbiin, ní ki cáǹ ma mun bɔti ki máafí-u. Toobiya nìn ŋmà-mi tigban kí fàaǹ-mi.