Neeyeemiya 5

Neeyeemiya kúntì inaamuul Isirayeel yab kansikin

1 Ŋyunti ŋubɔ poonee ní samaa poon bininjab biba nì bi-nimpoobi dɔ́miń ki bíi yáliŋkí tikpil bi-nabiyaamu Juuda yab bimbim pu. 2 Biba nìn bí ki lì yii: «Timbi nì ti-jipɔmbi nì ti-bisalib wīikí tikpil. Ti là tijin kí jī kí ŋmátí.» 3 Bin kíǹee nìn lì yii: «Timbi dù ti-sati nì ti-fiinyi sufii nì ti-diiŋŋi ní kí yóoń toolima ŋkùm yuntiŋu ní kí nín ká kí jī.» 4 Ní biba mun nìn lì yii: «Kí ŋmā kí pà lampoo kí tīī gɔminee, see tí pìnnì animbil kí dū ti-sati nì ti-fiinyi sufii kí yóoń toolima. 5 Ti nì bi bàà sá binibaantiibi, ní bi-jipɔmbi nì ti-jipɔmbi sá bibaantiibi. Ama nì míǹ kɔkɔee, see timbi ń dū ti-jipɔmbi nì ti-bisalib kí tīī bí kpántí iyumbu. Ti-bisalib biba gba pée kpántì iyumbu ki dóò. Taa ŋūǹ kí ŋá mbamin. Ti-sati nì ti-fiinyi sufii kpántì bin ti jíń apɔɔnee wanti ní.»

6 Ŋyunti ŋun m gbìl̄ bi nín bíi yáliŋkí puee nì tin bi sòoǹee ní an kɔ́ǹ-mi diŋuul tikpil. 7 Niinee ní m ká yii an máaǹ ḿ wòoǹ abɔtibil nì bibɔsoonliibi. M nìn bí-bi yii: «Ni bíi wɔ́b̀ ni-nabiyaamu dee yaa!» Niinee ní m yíiń dikpafikpaandi kí kpèè tibɔti gbanti^a. 8 M nìn bí-bi yii: «Timbi ti-ba nì ti-ŋmam ní ti fātìi dūu dá ti-nabiyaamu Juuda yab bin bi nìn dūu nyáfiǹ binicambee. Ama ní nimbi fàtīi cáá ni-nabiyaamu ki nyáfí, ní timbi ti-ba di fàtīi bíi dāā-bi!»

Ní bi ŋmí fɔ́ŋfɔŋ, kaa pée ká dinyɔɔbundi ki gātì. 9 M nìn nìkī ki lī yii: «Ni nín ŋá puee kaa ŋān̄! Ni máaǹ kí fàŋkì ti-Nimbɔtiu ní ti-nannanliibi ń taa ká nsan kí sìì-ti. 10 Man nì m-nabiyaamu nì m-tɔntɔnliibi, ti mun pīnnì binib animbil nì tijin. An puee ti-kɔkɔ ń dū ti-pɔnliibi pɔɔŋŋi kí pɔ̄-bi. 11 Ní gíiǹ bi-sati nì bi-fiinyi sufii nì bi-ɔliifi sufii nì bi-diiŋŋi kí tīī-bi díǹ. Ní dū tin kɔkɔ ni nìn pīnnì-bi bí dāá pà kí páańee, an yaa sá animbilaaa, tijinaaa, ŋkpamaaa, ní dūú yàntī kí taa ti fōō ipaati.» 12 Ní bi bí yii: «Ti làá gíiǹ tin kɔkɔ ti fōōyee kí tīī, kaa làá bàlifì tiba pu, kii a nín lī puee.»

Ní m yíiń bisaraaŋaliibi ní ki yāntì bin kɔkɔ bi cáá apɔɔnee pūtì kí ŋá bi nín lī yii bi làá ŋá puee. 13 Ní m gbáfì m-bɔkutil lɔbiki ki bí-bi yii: «Míǹ ní Unimbɔti làá gbāfì un di kaa ŋá min tibɔti nee bí yii bí ŋée kí fá ndandati kí wàatī u-dicaŋku nì u-gaajati, ú taa nín̄ gíti cáá báà tiba.» Ní samaa kɔkɔ kíí yii: «Ameeni, án ŋá míǹ.»

Samaa kɔkɔ nìn nyɔ́ŋkì ti-Dindaan, ní ki ŋá min bi lī yii bi làá ŋée.

14 Kí yòon̄ ŋyunti ŋun bi lēē-mi ḿ nīn sá Juuda tiŋkin gɔmina, ubɔti Aritaseerseesi beel yuntiŋu abin mmuŋku kí cáá sāā abin mmuŋku nì saalaa nì alee, an dàkà yii abin saalaa nì alee, man nì m-yab kaa lēē gɔmina lampoou nimbiliŋ, kii án nín bàà sá tí lēē puee. 15 Gɔminab bin nìn kāl̀ ní man nín bāańee nìn sàantí samaa tikpil. Bi nìn fòol̄-bi tijin nì ndaam ní kí kūtì animbil jitɔmbi imuŋku ili. Bi-tɔntɔnliibi mun nìn wɔ́b́ samaa. Ama man nín fàŋkí Unimbɔtee puee, maa ŋá míǹ. 16 Kí kūtèe, man m-ba túń digundi nee mātam tundi. Maa dá kusaau kubɔ, ní man tɔntɔnliibi kɔkɔ nìn kpáfì niin ki bíi tūǹ ditundi. 17 Juuda yab nì abɔtibil ŋin nìn jīǹ m-dumpuee nìn sá binib dilaataal nì imuŋku ili nì saalaa ní. Maa kpáaǹ binicambi bin nyēeń atimbun ŋin māntìi tú-ti ki dòoń ki kóò m-puee. 18 Ŋwiin kamaayee, m nìn kù unaa ubɔ nì ipii in yáàyee iluu nì ikɔl ní. Man m-ba nimbiliŋ ní m nìn cáa dāā, ní iwiin saalaa kamaayee, m nìn yàntī bi cāabìń-mi ndaam tikpil tikpil. Nì míǹ kɔkɔee, maa nìn bālifì yii bí tīī tin sá bí tīī-mi yii m nín sá gɔminee pu, di sá yii atuun ŋin samaa nìn bíi tūǹee nìn sá kii diwaŋgulee ní ki nyìm̀ bi-pu.

19 «M-Nimbɔtiu, téetí tin kɔkɔ m ŋá ki tīī samaa neeyee pu, kí ŋá-mi tiniti.»