Neeyeemiya 4

1 Ŋyunti ŋun Sambalati nì Toobiya nì bilaalibub nì Amɔn yab nì Asidoodi yab gbìl̄ yii Jeerusaleem gundi mātam bíi cá nyɔkɔpu, ní bi fātìi bíi māā ki ŋēeb̀ digundi jaŋŋi ŋin lítèe, ní bi fōō mbum tiŋan pu^a. 2 Bi nìn kpáfì ki bóob́ kí dāá já nì Jeerusaleem yab kí cáań fìkil fikil. 3 Niinee ní ti mēē ti-Nimbɔtiu, ní bi-puee, ti lēē binib ki yóoǹ sintil bí nīn cí-ti ŋwiimpu nì kunyeeu. 4 Ama ní Juuda yab bíi gbùkum̄ yii:

«Ndigbuntam kpúkú tikpil,

ní bin bíi fèe gīī an dáá gbíntìi dɔ̄.

Taa làá ŋmā kí fàtīí mā digundi nee.»

5 Ní ti-nannanliibi bí ki lì yii: «Bi làá nīn pée kā kaa nyí, kaa wāĺ ní tí dāá túuǹ-bi kí nà-bi ní kí yàntī digundi mātam ń gbèen̄.»

Neeyeemiya tīī bitɔntɔnliibi tijanjawan

6 Juuda yab bin nìn kóò bi-kansikinee dɔ́miń ki tùkū-ti ŋfunyɔm saalaa pu yii: «Laakin kamaa ní ni yaa pée fātèe, bi kā ti-pu ní.» 7 Niinee ní m dū binib ki yóoǹ digundi boon laakin tàkēe. M nìn yóoǹ-bi ki nóó nì bi nín pēē pēē mmaal puee ní bi ŋúb́ ntàataajimu nì ŋkpamu nì itɔfi. 8 M yóoǹ-bi míǹ ki dóòyee ní ki bí abɔtibil nì bibɔsoonliibi nì samaa un kíǹee yii: «Taa fàŋkìmaan ni-nannanliibi! Téetímaan ni-Dindaan un sá ukpaan ki sá kuwambiiuee pu, kí já ni-nabiyaamu nì ni-jipɔmbi nì ni-bisalib nì ni-nimpoobi nì ni-diiŋŋi pu.»

9 Ti-nannanliibi nín gbìl̄ yii ti béè tin bi bɔ́ntèe nì Unimbɔti nín bíil̀ tin bi bàà bóob́ kí ŋée puee, ní ti-kɔkɔ fātìi gítì digundi cee, ní báà ŋma nìkī ditundi din u bàà bíi tūǹee. 10 Ama kí yòon̄ ŋwiin gbantee, m-tɔntɔnliibi bininjab dijandi di nìn bí ki tūǹ ditundi ní dijandi din kíǹee ŋúb́ ŋkpamu nì agbampɔɔ nì itɔfi ní ki pēē ajanjabɔkuti. Bikpilib nìn yú Juuda yab kɔkɔ boon. 11 Bin nìn bíi māā digundee nì bin nìn tūntí awaŋgulee nìn cáá ŋŋal ŋubɔ ní ki tūǹ ditundi, ní ŋun kíǹee ŋúb́ tijanjawan. 12 Bimaliibi nìn gbìn̄ bi-tàataajimmu bi-cammu ní ki māā, ní uninja un búǹ ŋyinee yú m-tikindi. 13 Ní m bí abɔtibil nì bibɔsoonliibi nì samaa un kíǹee kɔkɔ yii: «Digundi tundi din kíǹee dáá náaǹ ki wīikí, ní ajancuku ŋin pu ti bí ki tūǹ ditundee dátiǹ tɔb. 14 Míǹ puee laakin kamaa ni yaa bí ní ki gbìl̄ bi búń ŋyinee, ní dāá kpāfì m-cee. Ti-Nimbɔtiu làá já kí tīī-ti!»

15 Ti nìn tūǹ ditundi kí kíĺ kutaafaau kí dāá sāā kunyeeu iŋmalbijaa nyātam, ní ti-kansikin dijandi ŋúb́ ŋkpamu. 16 Ŋyunti gbanti mbaanti ní m tùkū samaa yii: «Kunyeeuee, utɔntɔŋkpil kamaa nì u-tɔntɔnliibi ń cù Jeerusaleem kí cīití sintil, kutaa yaa wúntèe, bí dāá tɔ̄ ditundi. 17 Man m-ba nì m-nabiyaamu nì m-tɔntɔnliibi nì m-janjaliibi bin cí-mee, ti-kansikin báà ubɔ kaa nìn pèetī u-wanti, see ti yaa làá fàl̀ baba.»