Neeyeemiya 3

Juuda yab fātìi bíi māā Jeerusaleem tiŋki gundi

1 Usaraaŋakpil Eeliyaasiib nì u-nabiyaamu bisaraaŋaliibi nìn yíkì ki kíĺ ditundi. Bíǹ di nìn máń Apibil punyɔkɔki. Bi nìn dū-kì ki sú Unimbɔti ní ki cóoǹ ki-punuubi. Bi nìn dū digundi ki sú Unimbɔti ní ki ŋáŋkì-dì ki cáa sāā bijanjaliibi Dilaataal difɔkɔku, ní ki yōoǹ niin ki cáa sāā Ananeeyeel difɔkɔku. 2 Jeeriikoo yab nìn bí bi-cee ki tūǹ ditundi, nì Imirii jipɔɔn Sakuur. 3 Aseena yab di nìn máń Ijɔm punyɔkɔki. Bíǹ di nìn kpáá punuubi dɔcooŋkaai ní ki sākaǹ punuubi ní ki nákáǹ ipiin nì tikpàlkaal. 4 Bin nìn bí bi-caŋin ki tūǹ ditundee di sá Uriya jipɔɔn Meereemooti, Akoosi naantiiu nì Beereekiya jipɔɔn Meekulaam, Meeseesaabeel naantiiu nì Tiisaadooki jipɔɔn Baana. 5 Bin nìn dī bi muee di sá Teekoowa yab. Ama bi-kpilib nìn yíì yii baa là kí nīn bí bi-tɔntɔŋkpilib taapu kí tɔ̄ ditundi.

6 Paseeya jipɔɔn Yooyadaa nì Beesoodiya jipɔɔn Meekulaam di nìn ŋáŋkì Yeesana punyɔkɔki^a. Bíǹ di nìn kpáá punuubi dɔcooŋkaai ní ki sākaǹ punuubi ní ki nákáǹ ipiin nì tikpàlkaal. 7 Bin nìn bí bi-caŋin ki tūǹ ditundee di sá ugabaawɔnja Meelatiya nì umeeroonootija Yaadɔn nì Gabawɔn yab nì Miisipa yab bin nìn bí Eefiraati ŋwìiń jeetilaŋki pú timmu gɔminau cee ki sòoǹ tibɔtee. 8 Bin nìn bí bi mun caŋin ki tūǹ ditundee di sá Araya jipɔɔn Usiyeel un sá goosimiitee, ní úǹ caŋinee, utalaaluŋal Ananiya nìn bí. Bi nìn túń ditundi Jeerusaleem ki cáa sāā laakin ní digundi wāāyee ní ki gbēeǹ. 9 Bíǹ caŋinee, Uur jipɔɔn Reefaya, Jeerusaleem jandi diba bɔtiu di nìn bí ki tūǹ ditundi. 10 U mun caŋinee, Arumaafi jipɔɔn Yeedaya di nìn bí ki tūǹ ditundi dijandi din túĺ u-mɔŋkiŋu watilee. U mun caŋinee, Asabineeya jipɔɔn Atuusi di nìn bí ki tūǹ ditundi. 11 Ariim jipɔɔn Maalkiya nì Paati-Moowaab jipɔɔn Akuub di nìn ŋáŋkì digundi janliliitiil, nì Mpaamu difɔkɔku. 12 Bíǹ caŋinee, Alooweesi jipɔɔn Saaluum un sá Jeerusaleem tiŋki jandi din kíǹee bɔtiu di nìn bí ki tūǹ ditundi, u nì u-bisalib. 13 Anuun nì Saamoowa yab di nìn ŋáŋkì Ditantakal punyɔkɔki. Bíǹ di nìn kpáá punuubi dɔcooŋkaai ní ki sākaǹ punuubi ní ki nákáǹ ipiin nì tikpàlkaal. Bíǹ di tí máń digundi mpúun cáá meetab alaataa aŋmoo ki tin cáa sāā Titampuntan punyɔkɔki. 14 Reekaab jipɔɔn Maalkiya, Beeti-Akeereem tiŋki bɔtiu di nìn ŋáŋkì Titampuntan punyɔkɔki. U nìn fātìi máń-kì ki kpáá punuubi dɔcooŋkaai ní ki sākaǹ punuubi ní ki nákáǹ ipiin nì tikpàlkaal.

15 Kool-Ooseeya jipɔɔn Saaluum, Miisipa tiŋki bɔtiu di nìn ŋáŋkì Nnyimbul punyɔkɔki. U nìn fātìi máń-kì ki píń ní ki sākaǹ punuubi ní ki nákáǹ ipiin nì tikpàlkaal. Úǹ di nìn tí fātìi máń Siiloowee nyimbɔbil gundi, kí yòon̄ ubɔti kpaabu kí cáá sāā nsan ŋun jɔ́ḿ Daafiidi Tiŋkinee. 16 Úǹ boonee, Asibuki jipɔɔn Neeyeemiya, Beeti-Suur tiŋki bɔtiu di nìn bí ki tūǹ ditundi kí yòon̄ dijandi din dɔ̄ ki cáa gūū Daafiidi ceekuee, ki nìkī ki tin sāā nnyimbilkaam nì ubɔti janjaliibi dumpu. 17 Úǹ boonee, Leefii yab di nìn pá ki tūǹ ditundi. Banii jipɔɔn Reewum nìn bí, ní Keeyiila tiŋki dijandi bɔtiu Asabiya nìn bí u-caŋin ki tūǹ ditundi u-tinjandi pu. 18 Úǹ boonee, bi-nabiyaamu Eenadaadi jipɔɔn Bafayi, Keeyiila tiŋki jandi din kíǹee bɔtiu, 19 nì Yeesuwa jipɔɔn Eeseer, Miisipa bɔtiu di nìn pá. Eeseer di nìn ŋáŋkì dijanliliitiil din nìn túĺ laakin bi yōontí tijanjawan digundi lɔ́kɔ́ee. 20 Sabaayi jipɔɔn Baruuki di nìn bí u-caŋin ki tūǹ ditundi nì difaŋgiil ki yōoǹ dijandi din bí digunlɔkɔl laŋki kí cáá sāā usaraaŋakpil Eeliyasiib diiku nyɔkɔpuee. 21 Úǹ boonee, Uurii jipɔɔn Meereemooti, Akoosi naantiiu di nìn yōoǹ dijandi din bí usaraaŋakpil Eeliyasiib diiku nyɔkɔpuee ki ŋáŋkì ki cáa tin kátì.

22 Ní úǹ boonee, bisaraaŋaliibi bin māntìi tú Jeerusaleemee di nìn bí ki tūǹ ditundi. 23 Bíǹ boonee, Beenjameen nì Asuub di nìn bí ki ŋáŋkí dijandi din túĺ bi-diiŋŋee. Bíǹ boonee, Maseeyawuu jipɔɔn Asariya, Ananiya naantiiu di nìn bí ki ŋáŋkí laakin pìlīǹ u-diikuee. 24 Úǹ boonee, Eenadaadi jipɔɔn Binuyii di nìn bí ki ŋáŋkí dijandi din bí kí yòon̄ Asariya dumpu kí cáá sāā digunlɔkɔlee. 25 Paalali jipɔɔn Usaayii di ŋáŋkì diguŋkpindi nyɔkɔpu nì kudifɔkɔu kun lībitì ubɔti diiŋŋi puee ki tin sāā bisarkadambi mɔŋkiŋu. Úǹ boonee, Paaneeyoosi jipɔɔn, 26 nì bin bí ki tútúǹ kunimbɔtidii poon tuuŋŋi ki kóò Oofeel tiŋgbaŋkinee túń ditundi ki tin sāā kudifɔkɔu kun bí Nnyim punyɔkɔki kin bí ŋwìiń nyalaŋki púee^b. 27 Bíǹ boonee ní Teekoowa yab yōoǹ digundi din túĺ kudifɔkɔuee ki túń ditundi ki cáa sāā Oofeel gundi.

28 Bisaraaŋaliibi di nìn yōoǹ kí kíĺ Itaamu punyɔkɔki yilpu pú, ní báà ŋma túń ditundi ki cáá sāā u-diiku nyɔkɔpu. 29 Boonee, Saadooki jipɔɔn Imeer di nìn bí ki ŋáŋkí digundi laakin túĺ u-diikuee. Úǹ boonee, Seekaniya jipɔɔn Seemaya un nìn cí ŋwìiń nyalaŋki pú punyɔkɔkee di nìn bí ki tūǹ ditundi. 30 Úǹ boonee Seeleemiya jipɔɔn Ananiya, nì Salafi jipɔnluluutiu Anuun di nìn bí ki ŋáŋkí dijanliliitiil. Úǹ boonee, Beereekiya jipɔɔn Meesulam di nìn bí ki ŋáŋkí dijandi din túĺ u-diikuee. 31 Úǹ boonee, goosimiiti Maalkiya di nìn bí ki tūǹ ditundi kí cáá sāā kunimbɔtidiin tɔntɔnliibi nì bibantiliibi diiŋŋi ŋin túĺ Miifkaadi watilee, ní ki yōoǹ niin ki tin cáa sāā sintil diiku kun tɔ́kɔ́ digunlɔkɔl puee. 32 Goosimiitib nì bibantiliibi di nìn bí ki ŋáŋkí sintil diiku kun tɔ́kɔ́ digunlɔkɔl puee nì Apibil punyɔkɔki kansikin.

Binannanliibi kaa kíí bí mā digundi

33 Sambalati nín gbìl̄ yii timbi Juuda yab fātìi bíi māā digundee ní u fōō mbum ki gíí diŋuul tikpil. U nìn bíi bèel̄-ti^c 34 ní ki lì u-yab nì Samaarii yab nimbiin yii: «Ba ní Juuda yab bin kaa bí tiban nee bíi ŋáań ní? Bi làá ŋmā kí tɔ̄ ditundi din bi kíĺ nee kí cáa kátí kí ŋá saraabi kí tīī Unimbɔtaaa? Bi làá ŋmā kí dū ataŋkpee ŋin wùn̄ ki dɔ̄ dikpúkul ki kpántì ntam nee kí dūú mā digundi kí dóó ŋwimbaantaaa?» 35 Uamɔnja Toobiya nìn bí ki kɔ́ĺ-u ní ki lī yii: «Bí māa! Kiŋɔkɔ yaa pée dàb̄ bi-gundi din bi cáá ataŋkpee ki māā nee, dì làá lítí ní!»

36 «Áù ti-Nimbɔtiu, pīlifì bi nín bí ki kpèé ki sìŋkīǹ-ti puee. Yàntī bi-siibiliŋ ŋin bi bí ki sìí-ti nee ń fàtīí lítí bi-pu. Yàntī bi-nannanliibi ń dāá fūkul̀-bi, kí cúú-bi kí cùnnì kitiŋ kiba poon kuyuŋu! 37 Á taa dū bi-kpitii kí pɔ̄-bi, kí taa pítí bi-yìntitam a-nimbiin, kun puee bi sīī timbi bin bin fātìi bíi māā digundee.»

38 Nì míǹ kɔkɔee, ti fātìi máń digundi ki yākatìi ŋmāntì di-púuŋŋu kansikin nì kansikin, di sá yii samaa nìn dū bi-pɔbil kɔkɔ ki tīī.