Krooniiki Gbɔnliliitiiku 32

Seenakeeriibi dɔ́miń kí jáǹ Juuda tiŋki

(Kpèè 2 Bib 18.13, Yees 36.1)

1 Deedee tuuŋŋi nee kɔkɔ boonee ní Asuur bɔtiu Seenakeeriibi dɔ́miń ki kɔ́ Juuda beelin. U nìn māntìi tú ntimu mun bi máń agun ki túee, di sá yii u nìn là kí já kí fōō-mu. 2 Eeseekiyaasi nìn ká yii Seenakeeriibi dɔ́miń kí já nì Jeerusaleem yab. 3 Niinee ní u sòon̄ nì u-kpambaliŋ nì u-janjakpilib yii u là kí ŋéeb́ nnyimbul ŋun bí kitiŋ guŋŋi boonee, ní bíǹ gbìl̄ ki tīiǹ-u ní ki tútúǹ-u. 4 Ní samaa nyáń ki náaǹ ní ki dū inyimbul kɔkɔ nì kibùmbiki kin pùub̀ kitiŋ gundi boonee ki ŋéeb́ ki lī yii: «Asuur yab ń taa dāan̄ doo kí ká nnyim tikpil.» 5 Eeseekiyaasi nìn ká dipɔbil ki fātìi bíi māā digundi din bi nìn máń ki tú kitiŋee laakin bátì bátì ki lítèe. U nìn máń ndibiyaamu mun poon bi kàal̀ sintilee ki tɔ́kɔǹ digundi pu. U nìn gíti máń digundi diba dipeekaalee boon, ní ki ŋáŋkì kudii kun bi yíì Miiloo^a, ku bí Daafiidi Tiŋkinee. U nìn gíti mɔ́ɔ́ ŋkpamu nì agbampɔɔ tikpil. 6 U nìn lēē bijanjakpilib bin làá nīn kpòotī samaayee.

U nìn kóoǹ bi-kɔkɔ ki kpáfì u-cee kitiŋ punyɔkɔki caŋin ní ki tīī-bi kunyannyaau yii: 7 «Ní pɔ́ɔǹ ni-ba kí ká kunyannyaau! Ní taa fàŋkì tiba. Ní taa fàŋkì Asuur bɔtiu nì dijanjakitikpaandi din táá-u nee. Di sá yii mpɔn bí ti-cee ki jítiǹ u-cee. 8 Binib pɔŋŋu di bí u-cee, ama timbi Dindaan, ti-Nimbɔtiu un di làá jòoń-ti kí já kí tīī-tee di bí ti-cee.» Juuda bɔtiu Eeseekiyaasi nyɔɔbuŋŋi gbanti nìn tīī samaa kɔkɔ kunyannyaau.

Seenakeeriibi nín sòon̄ nì Jeerusaleem yab tiŋyee

(Kpèè 2 Bib 18.17-37, Yees 36.2-22)

9 Míǹ boonee ní Asuur bɔtiu Seenakeeriibi nì u-janjakitil kɔkɔ cūtìi māntì ki tú Lakiisi^b tiŋki kí já nì kì. Niin ní u tú u-janjakpilib biba ubɔti Eeseekiyaasi cee Jeerusaleem nì Juuda yab bin kóò Jeerusaleemee ki bí-bi yii: 10 «Asuur bɔtiu Seenakeeriibi nín sòon̄ puee sèé: <Ba pu ní ni máká ní ki gbíntìi kā Jeerusaleem tiŋki kin bi māntìi tú kí jáǹ-kì nee ní? 11 Eeseekiyaasi bíi tùkù-ni yii ti-Dindaan, ni-Nimbɔtiu làá fīī-ni kí nyāntí man Asuur bɔtiu ŋaan. Ama u bíi mɔ́ntí-ni kí yàntī ŋkùm nì nnyinnyoo ń kpɔ̀-ni ní. 12 An kaa sá Eeseekiyaasi gbanti di kúntì iwaatootipaan nì isaraafan ní ki bí Juuda nì Jeerusaleem yab yii bí nīn gbàantí nsaraafan mbambaanti taapu kí nīn ŋáań saraabi nsaraafan gbanti baba puɔɔɔ? 13 Naa nyí m-naanjab nì man m-ba nín ŋá duulinya nibuliŋ kɔkɔ pueeee? Atimbun gbanti diba waal ŋúń ki fīī di-tiŋki ki nyántì m-ŋaanaaa? 14 Atimbun ŋin m-baabi nìn nāaǹee, dilal waal ŋúń ki fīī-dì ki nyántì m-ŋaan? Kin an làá dī mana ní ni-Nimbɔtiu ń ŋmā kí fīī-ni kí nyāntí m-ŋaan? 15 Ní taa yàntī Eeseekiyaasi ń mɔ̄ntì-ni kí ŋmàtiǹ-ni! Ní taa fōō Eeseekiyaasi kí kíí, di sá yii ditimbundi diba àá dibeel diba waal kaa ŋúń ki fīī di-nib ki nyántì m-ŋaan àá m-baabi ŋaan. Kin ataa aŋa pu ní nimbi dàkafī yii ni-Nimbɔtiu làá ŋmā kí fīī-ni kí nyāntí m-ŋaan?>» 16 Seenakeeriibi tɔntɔnliibi nìn gíti nìkī ki sòon̄ ti-Dindaan Unimbɔti nì u-tɔntɔnliu Eeseekiyaasi tibɔfan.

Seenakeeriibi sīī ti-Dindaan

17 Asuur bɔtiu nìn ŋmàn̄ tigbɔn mun ki sīī ti-Dindaan, Isirayeel Nimbɔtiu. U nìn sòon̄ tigbɔn gbantin yii: «Kii duulinya timbuŋŋi ŋin kíǹee waaŋi nín kaa ŋúń ki fīī ŋi-nib ki nyántì m-ŋaan puee, míǹ ní Eeseekiyaasi mun Nimbɔtiu kaa làá ŋmā kí fīī u-nibul kí nyāntí m-ŋaan.»

18 Seenakeeriibi tɔntɔnliibi nìn tátí mpɔn eebru sooŋyi poon kí ŋmā kí fàaǹ binib bin nìn bí digundi puee kí yɔ̀tī bi-wunti, án nín làá ŋá pu bí ŋmā kí fōō kitiŋee. 19 Bi nìn pée sòoǹ Jeerusaleem yab Nimbɔtiu pu kii bi nín sòoǹ anibul ŋin kíǹee waaŋi ŋin unil dū u-ŋal ki kpítèe puee ní.

Asuur yab sáǹ ní Seenakeeriibi mun kpíì

(Kpèè 2 Bib 19.15,35-37, Yees 37.15,36-38)

20 Niinee ubɔti Eeseekiyaasi nì Unimbɔti bɔnaatiliu Yeesaya, Amɔtisi jipɔɔn dū tibɔtee ki ŋá ŋwimmeemin ní ki kúuǹ ki yíiń Unimbɔti. 21 Ti-Dindaan nìn túnní u-tuuŋŋu ŋubɔ Asuur yab janjanaapaal pu ní ŋu dɔ́miń ki kūū Asuur yab janjaliibi bibaatandambi kɔkɔ nì bijanjakpilib nì bikpilib kɔkɔ. Icoo nìn cúú Asuur bɔtiu ní u nín gítí u-tiŋkin. Dalba u kɔ́ u-waadiikunee, ní úǹ u-ba jipɔmbi dū ntàataajimu ki kūū-u.

22 Míǹ ní ti-Dindaan ŋá ní ki fīī Eeseekiyaasi nì Jeerusaleem yab ki nyántì Asuur bɔtiu Seenakeeriibi ŋaan nì bi-nannanliibi kɔkɔ ŋaan. U nìn wúń bi-pu ijaan kɔkɔ pu. 23 Binib tikpil nìn cáań saraabi Jeerusaleem ki tīī ti-Dindaan ní ki cáań tiwampɔkaal ki pú Juuda bɔtiu Eeseekiyaasi. Kí yòon̄ ŋyunti gbanti kí nīn cée ní atimbun kɔkɔ nib kíǹ ki tɔ́-u.

Eeseekiyaasi beel nín kúntì puee

(Kpèè 2 Bib 20.1-21, Yees 38.1-8, 39)

24 Ŋyunti gbantee, Eeseekiyaasi nìn búŋkì ki làá kpú. U nìn mēē ti-Dindaan ní úǹ tīī-u kudaaŋŋu yii u làá ká dicáaǹdi. 25 Ama u nìn kɔ́ dilambilin kaa béè tiŋan tin ní Unimbɔti ŋá ki tīī-uee. An puee ti-Dindaan ŋuul nìn jéetì u nì Jeerusaleem nì Juuda yab pu. 26 Min kamaa Eeseekiyaasi nìn kɔ́ dilambilinee, u nìn sīntì u-ba taapu, u nì Jeerusaleem yab. An puee ti-Dindaan ŋuul kaa nìn jéetì bi-pu ŋyunti ŋun Eeseekiyaasi dáá bí dimaŋfalinee. 27 Eeseekiyaasi nìn ká tigaajati tikpil tikpil nì tinyool mun. U nìn kpáafì animbil nì sindaariya nì ataŋkpamɔnti nì talaalub nì agbampɔɔ nì tigaajawan kɔkɔ nì ti-bulifi. 28 U nìn máń adiin ki kpáafì tijimpin nì ndamam nì ŋkpam. U nìn gíti ŋá tinaabakal ki tīī u-naai nì u-piii. 29 U nìn máń ntimu ní ki nìn cáá tipicaŋkpun nì tiŋɔcaŋkpun nì tinacaŋkpun tikpil, di sá yii Unimbɔti nìn tīī-u tigaajati tikpil.

30 Eeseekiyaasi di nìn ŋéeb́ Giiyɔn nyimbulnimbil din nìn bí digundi boonee ní ki cátì nnyinsan ki dáaĺ nnyim ki kɔ́ǹ Daafiidi Tiŋkin, ŋwìiń jeetilaŋki pú^c.

An nìn pée bútì Eeseekiyaasi u-tuuŋŋi kɔkɔ poon ní. 31 Ama ŋyunti ŋun ní Babiloon kpootiliibi nìn tú binib bí dāan̄ kí bàlifì kí mɔ̀tīí béé maamaaci tuuŋŋi ŋin jítì u-tiŋki puee, Unimbɔti nìn kākatì u-ba ki yāntì-u kí ŋmā kí cɔ̄ŋkì-u kí kpèè kun di bí u-pɔbilinee.

32 Eeseekiyaasi tuuŋŋi ŋin kɔkɔ kíǹee nì u nín yúl̀ Unimbɔti deedee puee kɔkɔ ŋmàn̄ ki kā Unimbɔti bɔnaatiliu Yeesaya, Amɔtisi jipɔɔn leedakal gbɔŋkun nì Juuda yab nì Isirayeel yab bɔtiibi gbɔŋkun. 33 Eeseekiyaasi kpíì ki cūtìi ŋàl̄ u-baabi ní bi síb́-u Daafiidi naantiibi kaakuliŋin yilpu pú. Juuda yab kɔkɔ nì Jeerusaleem yab nìn súń u-kpool ki tīī-u tinyool. U-jipɔɔn Manasee di nìn fōō u-yil ki kpántì ubɔti.