Krooniiki Gbɔnliliitiiku 31

Eeseekiyaasi fātìi bɔ́ntì ditundi kunimbɔtidiin

1 Bi jíń jiŋaal ki dóòyee ní Isirayeel yab bin kɔkɔ nìn bí niinee yìin̄ Juuda timmun ki gbáń ki wīī ataŋkpee ŋin bi nìn cóoǹ awaayee. Bi nìn gāatì iwindɔ, ki wīil̀ ŋwaadibiyaamu nì isaraafan. Bi nìn ŋá míǹ Juuda nì Beenjameen timmun, ki kpáaǹ Eefiraayiim nì Manasee timmun. Bi ŋá míǹ ki dóòyee ní báà ŋma nín gítí u-tiŋkin, laakin u kóòyee. 2 Eeseekiyaasi nìn yākatì bisaraaŋaliibi nì Leefii yab akiti akiti, ní ki tīī báà ŋma u-tundi dikitil din poon ní u bée. Biba nìn ŋáań bisaraawɔkaabi nì mpèé saraabi, ní biba mun bí kunimbɔtidiin ki gà ilan ki nyɔ́ŋkí ti-Dindaan. 3 Ubɔti gaajawanti poon ní u nìn lèekī ki tìì bi cáa ŋáań kutaafaau nì kujoou saraawɔkaabi nì iwiŋŋuŋfikaa saraawɔkaabi, nì saraabi bin bi ŋáań uŋmal kamaa wimpeekaaŋu dalee, nì saraabi bin bi ŋáań jiŋaalib yuntiŋuee, ki nóó nì an nín ŋmàn̄ pu ki kā ti-Dindaan marau gbɔŋkunee^a.

4 Ubɔti nìn bí bin kóò Jeerusaleem tiŋkinee yii bí nīn tìì bisaraaŋaliibi nì Leefii yab kun bi máaǹ kí tīī-bee, án nín làá ŋá pu bí ŋmā kí dū bi-ba kɔkɔ kí sú ti-Dindaan marabee. 5 Daliŋkin ní bi nyántì mara gbantee, Isirayeel yab nìn cāabìń bilee nì ndamam nì ŋkpam nì tisiil nì tikpaajin tin kíǹee jincɔ̀fikaati. Bi nìn gíti cāabìń tin kɔkɔ bi cááyee saalaatiiti tikpil^b. 6 Isirayeel beelin yab nì Juuda beelin yab bin nìn kóò Juuda timmunee mun nìn cāabìń bi-naai nì bi-piii nì bi-ŋoobui saalaatiiti, ki kpáaǹ tiwan tin ní bi nìn dūu sú ti-Dindaanee saalaatiiti. Bi nìn kóoǹ tiwan gbanti kɔkɔ ki kpúkuǹ akpuku akpuku. 7 Bi nín kíĺ uŋmatataati poon ki bīil̀ akpuku akpukuee, uŋmaluluúti poon ní bi dāa bíl̀ ki dóò. 8 Eeseekiyaasi nì u-kpambaliŋ dɔ́miń ki kpēē akpukuee ní ki jáam̀ ti-Dindaan nì u-nibul Isirayeel.

9 Eeseekiyaasi nìn bālifì bisaraaŋaliibi nì Leefii yab akpuku ŋin bi cáańee pu, 10 ní usaraaŋakpil Asariyawuu un sá Sadooki maaliŋunee kíí-u yii: «Daliŋkin binib kíĺ ki bíi cāabìń tin bi lēē bi-kpaajinti poonee, ti ká ki jíń ki díkí an kíǹ, di sá yii ti-Dindaan bīiǹ u-nibul pu. Akpuku ŋin kíǹ nee, tijin tin kíǹee dee.»

11 Ní ubɔti pú kinyɔkɔ yii bí ŋāŋkì adiin ŋin poon bi kpáafí tijin ŋi bí kunimbɔtidii caŋinee, ní bi lafun ŋáŋkì-ŋi. 12 Binib nìn yúl̀ Unimbɔti deedee ki cāabìń tin bi lēē bi-kpaajinti poonee nì bi-saalaatiiti nì tiwan tin bi nìn dūu sú ti-Dindaanee. Uleefiija Koonaniyawuu di nìn kpèé tin bi nìn cāabìńee ní u-nabiki Simeeyii sá u-taapu yɔu. 13 Ubɔti Eeseekiyaasi nì usaraaŋakpil Asariyawuu un nìn gíti sá un kpèé kunimbɔtidiiyee nìn lēē bin làá nīn bí Koonaniyawuu nì Simeeyii taapu ki cīití tiwan gbantee. Bíǹ di nìn sá Yeeyiyeel nì Asasiyawuu nì Nayati nì Asayeel nì Yeereemooti nì Yoosabaadi nì Eeliyeel nì Isimakiyawuu nì Mayaati nì Beenaya. 14 Uleefiija Kooree, Imina jipɔɔn di nìn cīití ŋwìiń nyalaŋki pú punyɔkɔki. Úǹ ní bi nìn lēē ú nīn fòol̄ nlammɔntiim saraabi bin bi nìn cāabìń ki tìì Unimbɔtee, ní ki nìn yàkatī tin bi lèekī tikpaajin pu ki tìì ti-Dindaanee nì tiwan tin bi nìn cāabìń kí sú-uee. 15 Bin nìn bí u-taapu Leefii yab timmunee^c di sá Eedeen nì Miiniyaamiini nì Yeesuwa nì Seemayawuu nì Amariyawuu nì Seekaniyawuu. Bíǹ di nìn yàkatī tijin ki tìì bi-nabiyaamu Leefii yab, ki nóó nì bi-kitiŋi nín sá puee, kaa gàntī kibikaaa, unikpaan. 16 Kí kūtì muee, kaa sá bininjab bin yiŋŋi bi nìn ŋmàn̄ bi cáá abin ata kí nīn cée ŋmaniŋma ní bi nìn yàkatī tijin ki tìì, ama bi nìn tìì bin nìn dòoń kunimbɔtidiin baabadal ki tūǹ ditundi ki nóó nì bi-kitiŋi nín sá puee mun. 17 Bi nìn kàan̄ bisaraaŋaliibi ki nóó nì bi-maaliŋu ní, ní ki kàan̄ Leefii yab kí yòon̄ bin cáá abin mmuŋku kí nīn cée ki nóó nì bi-tundi nì bi-kitiŋi nín sá puee. 18 Bi nìn kàan̄-bi ki kpáaǹ bi-nimpoobi nì bi-jipɔmbi nì bi-bisalib nì bin māntìi tú-bee ní, di sá yii bi nìn pée bɔ́ntí bi-ba ŋyunti kamaa kí nīn bí circir ní. 19 Bisaraaŋaliibi bin sá Aarɔn naantiibi ki kóò tisati tin māntìi tú bi-timmunee, bi nìn lēē binib kitiŋ kamaa poon bí nīn yàkatī tijin ki tìì bininjab kɔkɔ nì Leefii yab bin nìn ŋmàn̄ bi-yiŋŋee.

20 Eeseekiyaasi nìn ŋá míǹ ní Juuda tiŋki kɔkɔ pu. Tin u nìn ŋá gbantee nìn ŋān̄ ki bí deedee ki kítì ti-Dindaan u-Nimbɔtiu cee. 21 U nìn túń atuun tikpil kí ŋmā kí ŋāŋkì kunimbɔtidii ní kí nīn tɔ́ ti-Dindaan marab nì u-bɔkpaaŋi. U nìn ŋá míǹ ki nyàab̄ ti-Dindaan nì u-pɔbil kɔkɔ ní an nìn bútì-u tikɔkɔ poon.