Krooniiki Gbɔnliliitiiku 7

Saraabi bin bi ŋá ki tīī ti-Dindaanee

(Kpèè 1 Bib 8.62-66)

1 Saloomɔn mēē míǹ ki dóòyee ní ŋŋmi nyánní yilpu ki dɔ́miń ki wùn̄ bisaraawɔkaabi nì mpèé saraabee. Ti-Dindaan nyooti nìn gbí kunimbɔtidii^a. 2 Bisaraaŋaliibi kaa nìn gíti ŋūǹ kí kɔ́ kunimbɔtidiin, di sá yii ti-Dindaan nyooti nìn gbí-kù. 3 Isirayeel yab bin kɔkɔ nìn bí niinee nìn ká ŋŋmi nyánní yilpu ki kpákatìń ní ti-Dindaan nyooti jìliŋkī kunimbɔtidiin. Niinee ní bi tātìi gbāaǹ bi-nimbiiŋyi tūū kitiŋ ki jáaḿ-u ki nyɔ́ŋkí-u ki lì yii: «U ŋān̄ ní u-neendi bí kí nīn cá jaanjaan.»

4 Ubɔti saloomɔn nì Isirayeel yab kɔkɔ kpáfì ki ŋá ti-Dindaan saraabi. 5 Saloomɔn nìn kūū inaa kutukub mmuŋku nì bili, ní ki kūū ipii nì iŋoobu kutukub dilaataal nì mmuŋku ki ŋá mpèé saraau. Bi nín ŋá pu ki dū kunimbɔtidii ki sú ti-Dindaanee dee. 6 Bisaraaŋaliibi nìn yú bi-tundi laŋki. Leefii yab nìn ŋúb́ tiwambɔɔkaal tin ubɔti Daafiidi nìn yāntì bi kpítì ki tīī-bee ki nyɔ́ŋkí ti-Dindaan ki lì yii: «Di sá yii u-neendi bí ní ki cá jaanjaan.» Daafiidi di nìn ŋmàn̄ nlan gbanti ki tīī-bi. Bisaraaŋaliibi nìn yú ki túĺ-bi ki búǹ akantán ní Isirayeel yab kɔkɔ yíkìi yúl̀. 7 Niinee Saloomɔn dū dicindi din bí kunimbɔtidii nyɔkɔpuee ki sú ti-Dindaan. Di sá yii niin ní u nìn ŋá saraawɔkaa nì tijimpin saraabi nì mpèé saraabi kpam, kun puee tasa saraafaŋŋu ŋun nìn bí kunimbɔtidii punyɔkɔki caŋinee kaa nìn náaǹ bí ŋmā kí wà an pu saraawɔkaa nì tijimpin saraabi nì mpèé saraabi kpam.

8 Ŋyunti gbanti ní Saloomɔn nì Isirayeel yab kɔkɔ kpáfìi jíń tibìń jiŋaaliu. An nìn sá dinikitikpaandi ní. Binib nìn nyánní doooo Leeboo-Amaati, kitiŋ ŋgan pú ki cáa sāā Eejipiti buŋŋu kitiŋ ŋgiil pú. Bi nìn jíń jiŋaal gbanti iwiin iluli ní. 9 Iwiin inii dalee ní bi kóoǹ ki kpáfì ki jáam̀ ti-Dindaan. Mimmee bi nìn dū iwiin iluli ní ki jíń kunimbɔtidii jiŋaaliu ní ki dū iwiin iluli ki jíń tibìń jiŋaaliu. 10 Míǹ boonee, uŋmaluluúti iwiin mmuŋku nì ita dalee ní Saloomɔn yāntì Isirayeel yab nín kùǹ bi-dumpu. Bi nìn nín kùǹ nì mmɔn nì dipɔɔpindi, kun puee ti-Dindaan nìn dàkā u-tɔntɔnliu Daafiidi nì Saloomɔn nì u-nibul Isirayeel yab kulaŋŋaŋfitiiu.

Ti-Dindaan fātìi lēē u-ba ki dàkā Saloomɔn nliliitiim

(Kpèè 1 Bib 9.1-9, 2 Kroo 1.7-12)

11 Saloomɔn nìn máń ti-Dindaan Diiku nì úǹ u-ba naakooku nì tin u nìn pée là kí mēe ki dóò. 12 Míǹ boonee ní ti-Dindaan nyántì u-ba ki dàkā-u kunyeeu ní ki bí-u yii: «M gbìl̄ a-wimmeem ní ki lēē kudii nee kú nīn sá mpaan ŋun pu bi làá nīn ŋáań saraabi ki tìì-mee. 13 An ŋūǹ kí bàń yii m dū kutagbɔŋu ki pīiǹ ní utaa kaa ti bíi nì. An tí ŋūǹ kí bàń mun yii m tīī inaakitoon mara í dāan̄ kí ŋmɔ́ kitiŋ nee kpaajinti, àá m cáań bìlbil kúm ki tɔ́ m-nibul pu. 14 M-nibul din pu bi yíì m-yindee nib yaa sīntì bi-ba taapu, ki mēē, ki nyàab̄-mi ní ki dū bi-saŋkpitii ki fée, man làá pīlifiǹ-bi doooo yilpu, kí dū bi-kpitii kí pɔ̄-bi, ní kí fàtīí tīī bi-tiŋki ki-gaajati. 15 M-nimbiliŋ làá nīn kpítì ní m-tafaliŋ ń nīn píĺ ki cí kí pīlifì ŋwimmeem min kamaa bi làá pée mèè kudii nee poonee. 16 Too, m lēē kudii nee ki dū-ku ki sú m-ba kí nīn lèekī m-ba ki dàkà ku-poon kí nīn cáa cá jaanjaan. M-nimbikpeeŋu làá nīn cɔ́ ku-pu, ní m-pɔbil ń nīn kā ku-pu baabadal. 17 Ama siiyee, nín̄ nóó-mi kii a-baa Daafiidee. Nín̄ ŋáań tin kɔkɔ m kpáafì-see, ní kí nīn ŋúb́ m-bɔkpaaŋi nì m-koobiliŋ. 18 A yaa ŋá míǹ, m làá tīī a-beel mpɔn kii m nín nìn pōoǹ a-baa Daafiidi puee. M nìn bí-u yii: <A-kpátam boonee, a-naantiibi kansikin ubɔ làá nīn pée sá ubɔti ní Isirayeel tiŋkin^b.> 19 Ama sii nì a-nibul yaa fātì ni-boon ki tīī-mi, ní kaa ŋúb́ m-marab nì m-koobiliŋ ŋin m tīī-nee, ní ki cūtìi nóó awaa ki gbàantí ŋi-taapuee, 20 m làá jà-ni kitiŋ kin pu m tīī-nee. M làá fàtī m-boon kí tīī kudii kun m dūu sú m-ba nee. Anibul kɔkɔ làá dāá nīn ŋúb́ Isirayeel ki lāā ki bèel̄. 21 Kudii nee sá díǹ pu nee kukpaaŋŋu^c. Ama binib bin làá dāá jītí kudii nee caŋinee làá dāá bàkatī ní kí bàlifì yii: <Ba yì-tì ní ti-Dindaan nín ŋá kitiŋ nee nì kudii nee míǹ?> 22 Ní bí dāá kíí-bi yii: <Kun yì-tèe di sá yii Isirayeel yab dū ti-Dindaan bi-baabi Nimbɔtiu un di nyántìń-bi Eejipiti tiŋkinee ki fá. Bi dū bi-ba ki yá ki nákáǹ awaa ki gbāaǹ ŋi-taapu ki jáam̀-ŋi. An pu ní ti-Dindaan yāntì nnaabu nee jéetì bi-pu.>»