Krooniiki Gbɔnliliitiiku 6

1 Niinee ní Saloomɔn téeń yii:

«Ti-Dindaan, a nìn lēē yii a làá nīn kóò ditagbambɔndin.

2 Ama man máń-si kudinyaaŋŋu nee,

kudii kun poon ní a làá nīn kóò talkuee!»

Saloomɔn sòon̄ ki dū kunimbɔtidii ki sú Unimbɔti

(Kpèè 1 Bib 8.14-21)

3 Isirayeel yab kɔkɔ nìn sí ní ubɔti fātì u-nimbiin ki túĺ-bi ní ki mēē ki bīiǹ bi-pu. 4 U nìn bí yii: «Tí jāam̀maan ti-Dindaan, Isirayeel Nimbɔtiu! Úǹ u-ba ŋá kii u nín nìn pōoǹ m-baa Daafiidi puee. U nìn bí-u yii: 5 <Man di nyántì m-nibul Isirayeel Eejipiti tiŋkin. Kí yòon̄ ŋwiin gbantee, maa lēē Isirayeel timmu^a kɔkɔ kansikin kitiŋ kiba kin poon ní bi làá mā-mi kudii ḿ nīn lèekī m-ba ki dàkèe. Maa tí lēē unil ubɔ un nyáń u-bee ú nīn sá m-nibul Isirayeel kpootiliu. 6 Ama m lēē Jeerusaleem kí nīn lèekī m-ba ki dàkà. M lēē sii Daafiidi mun á nīn sá m-nibul Isirayeel bɔtiu.> 7 M-baa Daafiidi nìn cáá nlandɔkɔ kí mā kudii kí dū-ku kí sú ti-Dindaan, Isirayeel Nimbɔtiu. 8 Ama ti-Dindaan nìn bí-u yii: <A nín ká nlandɔkɔ yii a làá mā-mi kudiiyee, an ŋān̄ tikpil. 9 Tin bée di sá yii an kaa sá sii di làá mā kudii gbanti, ama sii a-ba jipɔɔn un a màl̄ee di làá mā-mi kudii gbanti^b.> 10 Kɔŋkɔnnee, ti-Dindaan nín nìn pōoǹ puee u ŋá míǹ. Di sá yii m fōō m-baa Daafiidi yil ki jíń Isirayeel tiŋki pu dibeel, kii ti-Dindaan nín nìn lī puee. M máń kudii nee ki dū-ku ki sú ti-Dindaan Isirayeel Nimbɔtiu. 11 M kpáàa bɔ́ntì Dipoondi Dakaau un poon ti-Dindaan poondi nyɔɔbuŋŋi kēe mpaan. Dipoondi gbantee, u nín nìn nyántì ti-naanjab Eejipiti tiŋkinee ní u nìn pōoǹ.»

Saloomɔn wimmeem

(Kpèè 1 Bib 8.22-53)

12 Míǹ boonee ní Saloomɔn yíkìi síl̀ ti-Dindaan saraafaŋŋu nì Isirayeel yab bin kɔkɔ nìn kóoǹ ki kpáfèe nimbiin. U nìn yōoǹ u-ŋalii ki túĺ kutaa kí mèè. 13 Di sá yii Saloomɔn nìn yāntì bi dū tasa kúti ki máń dikɔl ki síiǹ dicindi kansikin. Dikɔl gbanti waaŋŋu nìn sá meetab bili nì dijandi ní di-púuŋŋu sá meetab bili nì dijandi ní di-fɔkɔŋŋu sá meeta ubɔ nì dijandi. Saloomɔn nìn jɔ́m̀ ki tɔ́kɔǹ dikɔl pu ní ki tātìi gbāaǹ Isirayeel samaau kɔkɔ nimbiin. U nìn yōoǹ iŋal ki túĺ kutaa 14 ki bí yii: «Ti-Dindaan Isirayeel Nimbɔtiu, unimbɔti ubɔ kaa bí yilpu àá kitiŋ pu ki bí kii siiyee. A ŋúb̀ a-poondi ki dàkà a-tɔntɔnliibi bin sí nì si nì dipɔbil dibee kulaŋŋaŋfitiiu. 15 A nín nìn pōoǹ a-tɔntɔnliu m-baa Daafiidi yii a làá ŋá pu kí tīī-uee, a ŋá míǹ. Mbaamɔn tin a nìn pōoǹ-uee, sii a-ba ŋá míǹ ki tīī-u díǹ. 16 Kɔŋkɔnnee, ti-Dindaan Isirayeel Nimbɔtiu, ŋá a nín nìn pōoǹ a-tɔntɔnliu m-baa Daafiidi yii a làá ŋá pu kí tīī-uee. A nìn bí-u yii: <A-naantiibi yaa nóó-mi ibaamɔn poon kii sii a-ba nín nóó-mi puee, ibaamɔn ní m tùkù-si, a-kpátam boonee, a-naantiibi kansikin ubɔ làá nīn pée sá ubɔti ní Isirayeel tiŋkin^c.» 17 Míǹ puee ti-Dindaan Isirayeel Nimbɔtiu, m gbàam̄-si ní, ŋá kɔŋkɔnnee a nín nìn pōoǹ a-tɔntɔnliu m-baa Daafiidi yii a làá ŋá pu gbantee kí tīī-u!

18 «Mimmee Unimbɔti ŋūǹ kí kɔ́ kitiŋ pu u nì binibaaa? Áli gba kutagbɔŋu nín wāā pu nee kaa bàn̄-si á kɔ́, ki dāa nín kàaǹ kudii kun m máń nee. 19 Nì míǹ kɔkɔee, m-Dindaan m-Nimbɔtiu, pīlifì man a-tɔntɔnliu wimmeem nì m-gbaamii! Pīlifì m-kuŋkuuntii nì m-wimmeem min man a-tɔntɔnliu bíi mèé-si díǹ neeyee! 20 A-nimbikpeeŋu ń nīn pée cɔ́ kudii nee pu ŋwiimpu nì kunyeeu. Ŋú nīn pée cɔ́ mpaan ŋun pu a nìn sòon̄ yii: <M-yindi làá nīn bí niin> nee pu^d. Pīlifì ŋwimmeem min m bí doo ki mèé-si nee. 21 Pīlifì man a-tɔntɔnliu nì Isirayeel, a-nibul wimmeem min ti bí doo ki mèé-si nee. Pīlifiǹ-ti doooo yilpu laakin a kóòyee. Pīlifiǹ-ti kí dū ti-kpitii kí pɔ̄-ti.

22 «Ubɔ yaa yīntiǹ u-juti, bi ŋūǹ kí lì yii ú pùtī yii u yaa ká mbusu ń lítí u-pu. Udaan yaa lafun dɔ́miń kudii nee poon, a-saraafaŋŋu nyɔkɔpu ki pūtèe, 23 á pīlifì doooo yilpu kí kpèè tibɔti gbanti kí sòoǹ a-tɔntɔnliibi bɔti. Á kpɔ̀ dibɔkpil daan bɔti kí dáaĺ u-tafal, ní kí pɔ̀ un bɔti ŋān̄ee báà ŋma ń béé yii u sá maanyiiba.

24 «Isirayeel yab a-nibul yaa yīntiǹ-si ní bi-nannanliibi jáń ki pɔ́ɔkiǹ-bi, ní bi fātìi gítìń a-cee, ki nyɔ́ŋkì-si, ki mēē-si ní ki gbāam̀-si kudii nee poonee, 25 sii ti-Dindaan, á pīlifì a-nibul Isirayeel yab doooo yilpu, kí dū bi-kpitii kí pɔ̄-bi, ní kí fàtīí gíiǹní-bi kitiŋ kin a nìn dūu tīī bi-naanjabee poon.

26 «A-nibul yaa yīntiǹ-si ní a dū kutaa ki pīiǹ utaa kaa ti bíi nì, ní bi fātì bi-ba ki túĺ mpaan nee pú, ki mēē ki nyɔ́ŋkì a-yindi, ní ki fātì bi-boon ki tīī bi-kpitii a nín dáaĺ bi-tafal pueeyee, 27 sii ti-Dindaan, á pīlifiǹ a-tɔntɔnliibi Isirayeel yab doooo yilpu. Á dū bi-kpitii kí pɔ̄-bi, kí dàkà-bi nsammɔnti ŋun bi máaǹ kí nóóyee, ní kí yàntī utaa ń nì a-tiŋki nee pu, kitiŋ kin ní a dūu tīī a-nibul án nīn sá bi-fakalee.

28 «Ŋkùm àá bìlbil kúm yaa jéetì kitiŋ nee pu, àá tikpaajin kaa láá bīń ní ki kūń àá ki sūū, àá inaakitoon nì inaaki di ŋmɔ́ ki bíil̀ tikpaajin, àá bi-nannanliibi di māntìi tú bi-timmu kí já nì bi, àá an yaa pée sá tibumbun àá igbaŋween iŋyee, 29 Isirayeel yab kansikin ubɔ àá a-nibul Isirayeel yab kɔkɔ di yaa béè tin bāań-bee, ki yōoǹ bi-ŋalii ki túĺ Kudii nee watil pú ki mēē-si àá ki gbāam̀-see, 30 sii ti-Dindaan, á pīlifiǹ-bi doooo yilpu laakin a kóoǹnée kí dū bi-kpitii kí pɔ̄-bi, ní kí ŋá kí tīī báà ŋma kii an nín máaǹ puee, di sá yii a nyí báà ŋma pɔbil poon bɔti. 31 Ŋá míǹ án nín làá ŋá pu ní Isirayeel yab ń fàŋkì-si iwiin in kɔkɔ bi cáá kí kàl̄ kitiŋ kin a tīī bi-naanjabee puee.

32 «Unicaan un kaa sá a-nibul Isirayeel yab kansikin ubɔee yaa nyánní kitindandatiin ki dɔ́miń a-yindi pu, di sá yii u gbìl̄ bi sòon̄ a-yiŋkpaandi nì a-pɔŋkpaaŋŋu pu, ní ki dɔ́miń míǹ ki mēē-si kudii nee poonee, 33 sii ti-Dindaan, á pīlifiǹ-u doooo yilpu laakin a kóoǹnée. Á ŋá u nín bālifì-si puee kí tīī-u. A yaa ŋá míǹ, kitiŋ pu nib kɔkɔ làá béé a-yindi, kí fàŋkì-si kii Isirayeel yab nín fàŋkí-si puee, ní bí béé yii a lafun bí kudii kun m máń nee ni.

34 «A yaa tīī a-nibul Isirayeel yab mara yii bí cù kí já nì bi-nannanliibi, ní bi fātì bi-ba ki túĺ kitiŋ kin a lēē nee nì kudii kun m máń-si nee watil pú ki mēēyee, 35 á pīlifiǹ bi-wimmeem nì bi-gbaamii doooo yilpu, ní kí tīī-bi dijajil.

36 «An ŋūǹ kí ŋá yii Isirayeel yab yīntiǹ-si, di sá yii unil ubɔ kpá kaa yìntī. Bi yaa ŋá míǹ ní a gíí bi-pu diŋuul ki yāntì bi-nannanliibi jáń ki pɔ́ɔkiǹ-bi ki cúú-bi ki cūnnì bi-tiŋki kin dátèe àá kin kaa dátèe ni kuyuŋu, 37 ní bi yaa kíĺ ki bíi dàkafī, ki kpántì bi-bimbim, ki gbāam̀-si kitiŋ gbanti poon ki lī yii: <Ti ŋá ikpiti, ti yīntì, ti jíń dibɔkpil>, 38 ní bi-nannanliibi tiŋki gbanti poonee, bi fātìi gítìń a-cee nì bi-pɔbil kɔkɔ nì bi-naŋki kɔkɔ, ní ki fātì bi-ba ki túĺ kitiŋ kin a tīī bi-naanjab nì kitiŋ kin ní a lēē nee nì kudii kun ní m máń ki tīī-si nee ki mēē-see, 39 sii ti-Dindaan, á pīlifiǹ-bi doooo yilpu laakin a kóoǹnée. Pīlifì bi-wimmeem nì bi-gbaamii kí jòò-bi, kí dū bi nín yīntiǹ-si puee kí pɔ̄-bi.

40 «Ŋúbití a-nimbiliŋ, m-Nimbɔtiu. Pīlifì m-wimmeem min m bíi mèé-si mpaan nee puee.

41 Kɔŋkɔnnee, ti-Dindaan Unimbɔti, yīkìm̄,

dāan̄ kí nīn bí a-ŋuŋfil paaŋŋu pu,

sii nì a-dakaau un poon a-pɔŋŋu bée.

Ti-Dindaan Unimbɔti, yàntī a-saraaŋaliibi ń dū difiil kí pèen̄ kii tiwampeeŋkaalee!

Yàntī bin yú nì si deedeeyee ń nīn fàal̀ a-ŋanti pu.

42 Ti-Dindaan Unimbɔti, taa dū ubɔti un sii a-ba lēēyee kí fá.

Téetí tiŋan tin kɔkɔ a ŋá ki tīī a-tɔntɔnliu Daafiidee pu!»