Krooniiki Gbɔmpeepeekaaku 22

1 An di yì-tì ní Daafiidi nìn lī yii: «Doo di sá ti-Dindaan Unimbɔti diiku, ní doo di làá nīn kíǹ ki sá Isirayeel yab saraawɔkaabi faŋŋu.»

Daafiidi bɔ́ntì kunimbɔtidii mātam

2 Daafiidi nìn yāntì bi kóoǹ binicambi bin kóò Isirayeel tiŋkinee ki kpáfì ní u lēē bi-kansikin bin làá kpítí ataŋkpee bí dūú mā Unimbɔti diikuee. 3 U nìn bɔ́ntì tikúti tikpil ki yóoǹ bí dūú mɔ́ɔ́ ipiŋkpaakaa kí kpáá punuubi, nì ipiin in pu punuubi làá nīn sàkēe. U nìn bɔ́ntì tasa kúti tin wīikí unil kaa ŋūǹ kí ŋmàntēe ki síiǹ. 4 U nìn bɔ́ntì seedir dɔi an kaa cáá ŋkaan ki kpúkuǹ, di sá yii Tiir nì Siidɔn yab nìn cáań-u seedir dɔi tikpil tikpil. 5 Daafiidi nìn lī u-ban yii: «M-jipɔɔn Saloomɔn dáá pɔ̀ɔǹ, kaa láá nyí tiba. Ama kudii kun u làá mā ti-Dindaanee máaǹ kí nīn sá kukpaaŋŋu kí nīn cáá kunyaaŋŋu binib ń gbìl̄ ku-pu ntimu kɔkɔ poon. An puee m làá bɔ́ntí ku-mātam kí yóoń-u.» Di sá ní Daafiidi lafun bɔ́ntì tiwan tikpil ki síiǹ ki wāatì ní ki nín kpíì.

Daafiidi tīī Saloomɔn mara yii ú mā kunimbɔtidii

6 Daafiidi yíiń u-jipɔɔn Saloomɔn ní ki tīī-u mara yii ú mā ti-Dindaan Isirayeel Nimbɔtiu kudii. 7 Daafiidi tùkū Saloomɔn yii: «M-jipɔɔn, mama m-ba nìn lēē m-pɔbilin yii m làá mā ti-Dindaan m-Nimbɔtiu kudii. 8 Ama ní ti-Dindaan tùkū-mi yii: <A jáń tijakpaandi tikpil ki kūū binib tikpil. Fatiku un kɔkɔ nyáń ki fá kitiŋ man nimbiinee puee, an kaa sá sii di làá mā kudii kun poon binib làá nīn dòoń ki jáaḿ-mee. 9 Kpèè, a làá màal̀ kibininjabiki kiba, kì làá nīn sá ŋgbansɔŋfi niliu ní. M làá yàntī ŋgbansɔŋfi ń nīn bí u nì binannanliibi bin māntìi tú-uee kansikin. U-yindi di làá nīn sá Saloomɔn, taapu di sá yii <Ŋgbansɔŋfi daan>. U-beel yuntiŋuee, m làá dāá yàntī ŋgbansɔŋfi nì dibatɔl ń nīn bí Isirayeel tiŋki pu. 10 Úǹ di làá dāá mā-mi kunimbɔtidii. U làá dāá nīn sá-mi ujipɔnti ní ḿ dāá nīn sá-u ubaati. M làá yàntī u-beel ń báań inyaan Isirayeel tiŋki pu kí nīn cá jaanjaan.>^a» 11 «Míǹ puee kɔŋkɔnnee, m-jipɔɔn, ti-Dindaan a-Nimbɔtiu ń nīn bí a-cee á ŋmā kí mā-u kudii, kii u nín nìn pōoǹ a-pu puee. 12 U yaa láa dū Isirayeel tiŋki pɔŋŋu ki ŋúbiǹ-see, ú dāá tīī-si iciin nì dinyil á ŋmā kí nīn tɔ́ úǹ ti-Dindaan a-Nimbɔtiu marau. 13 A yaa tɔ́ abɔkpaa nì marab bin u dī Mooyiisi pu ki tīī Isirayeel yabee, ki cáá-bi ki tūǹ ditundee, án làá bútí-si tikɔkɔ poon. Pɔ́ɔǹ a-ba, kí ká dipɔbil, a-wunti ń taa yɔ̀tī, ní kí taa fàŋkì báà tiba^b. 14 Kpèè, báà nì m-sool poonee, m pɔ́ɔǹ m-ba ki bɔ́ntì sindaariya un nyiŋfiŋu jítì tɔɔnib kutukub bita puee, nì animbil kúti tin nyiŋfiŋu jítì tɔɔnib kutukub mmuŋku nì saalaa puee. M bɔ́ntì tasa kúti nì tikúmɔntiil tin baa ŋūǹ kí ŋmàntēe mun ki yóoǹ, ki bɔ́ntì idɔ nì ataŋkpee mun. A dāa ŋūǹ kí nyàab̀ kí kūtì. 15 Bitɔntɔnliibi tikpil bí ki làá tɔ̄-si atuun. Bitaŋkpakpitiliibi bí, bidɔkpitiliibi bí, kapintab bí, ní atuun ŋin kíǹee kɔkɔ tɔntɔnliibi bí ki nyí bi-tuuŋŋi tiŋan pu. 16 Sindaariya nì animbil kúti nì tasa kúti nì tikúmɔntiil bí tikpil tikpil, baa ŋūǹ kí ŋmàntī kí béé ti-nyɔkɔm gba. An puee yīkì kí kíĺ ditundi ní ti-Dindaan ń nīn bí a-cee!»

17 Míǹ boonee ní Daafiidi tīī Isirayeel bɔtibiliŋ kɔkɔ mara yii bí tūtuǹ u-jipɔɔn Saloomɔn. 18 U bí-bi yii: «Kéè ti-Dindaan ni-Nimbɔtiu bí ni-ceeyaa! U tīī-ni diŋuŋfil ajan kɔkɔ pu. U dū binib bin nìn kóò kitiŋ nee puee ki ŋá m-ŋaan. Díǹ pu nee bi kíǹ ki bí ti-Dindaan nì u-nibul taapu ní. 19 An puee ní nyàab̀maan ti-Dindaan ni-Nimbɔtiu nì ni-pɔbil kɔkɔ nì ni-naŋki kɔkɔ. Ní yīkì kí kíĺ ti-Dindaan Unimbɔti circir kɔŋkooŋŋu mātam. Niinee, ni dāa ŋūǹ kí yòon̄ ti-Dindaan Poondi dakaau nì tiwan tin bi dūu sú Unimbɔtee kí yóoń kudii kun ni làá mā ti-Dindaan yindi puee poon.»