Krooniiki Gbɔmpeepeekaaku 21

Daafiidi yāntì bi kàan̄ Isirayeel yab

(Kpèè Sami 2, 24.1-9)

1 Ŋwiin ŋubɔee, Sitaan yíkì kí já nì Isirayeel yab ní ki lūkutì Daafiidi ú kàaǹ Isirayeel yab kɔkɔ. 2 Daafiidi nìn bí Joowaab nì u-janjakpilib bin kíǹee yii: «Ní cùú kàam̀maan Isirayeel yab kɔkɔ, kí yòon̄ Beerseeba tiŋki ŋgiil pú kí cáá sāā Daani tiŋki ŋgan pú. Ni yaa kàan̄ ki dóòyee, ní gítiń kí dāá tùkù-mi ḿ béé bi-wíiŋŋu nyɔkɔm.» 3 Ní Joowaab kíí-u yii: «Ti-baa ubɔti, m mèé yii ti-Dindaan ń yàntī u-nibul Isirayeel yab ń bùtī ŋfunyɔm dilaataal pu. Bi-kɔkɔ bí díǹ pu nee sii ti-baa ubɔti taapu ní. Kin ba pu ní a baasii nyàab̀ kí kàaǹ Isirayeel yab kí yàntī bí yìntī míǹ?^a» 4 Nì míǹ kɔkɔee ubɔti marau nìn pɔ̄ɔ̄ ki jítiǹ Joowaab nín nìn dàkafī puee, ní úǹ dāa gīī ki ŋá míǹ. Joowaab nìn cúú nsan ki yìin̄ Isirayeel tiŋki kɔkɔn ní ki fātìi gítìń Jeerusaleem tiŋkin. 5 Joowaab bāańee ní ki tùkū Daafiidi u nín kàan̄ binib bi-nyɔkɔm nyáń puee. U bí yii Isirayeel naakookun yab bin bàn̄ kí cù kujaauee sá binib miiliyɔn ubɔ nì binib kutukub dilaataal, ní Juuda naakookun yab bin bàn̄ kí cù kujaauee sá binib kutukub alaataa anaa nì imuŋku ita nì saalaa.

6 Joowaab kaa nìn kàan̄ Leefii naakookun yab nì Beenjameen naakookun yab ki kútì bin kíǹee pu. Di sá yii ubɔti marauee kaa nìn kāliǹ-u báà fiii.

Unimbɔti dáaĺ Daafiidi tafal

(Kpèè Sami 2, 24.10-17)

7 Tibɔti gbanti kaa nìn mɔ́ɔkiǹ Unimbɔti, ní u dáaĺ Isirayeel yab tafal. 8 Ní Daafiidi bí Unimbɔti yii: «Ikpitikpaan ní m ŋá nee. Ama kɔŋkɔnnee m mèé-si yii á dū m-yìntitam gbanti kí pɔ̄-mi, kun puee m lafun ŋá kii m sá uwaatee ní.»

9 Niinee ní ti-Dindaan sòon̄ nì ubɔnaatil Gaadi un di kpòotī Daafiidee ní ki bí-u yii: 10 «Cùú tùkù Daafiidi yii man ni-Dindaan nín lī puee sèé: <Man ni-Dindaan, m dū tiwan tita ní ki bíl̀ u-nimbiin ú lēē tin u là ḿ dūú dáaĺ u-tafalee.>» 11 Ní Gaadi cūtì Daafiidi cee ki bí-u yii: «Ti-Dindaan nín lī puee sèé. Ba ní a là ḿ dūú dáaĺ a-tafal ní? 12 Ŋkùm ń nyā a-tiŋki pu abin ataaa, binannanliibi ń já kí pɔ̄ɔkiǹ-si iŋmal itaaa, bìlbil kúm ń jēetí kitiŋ nee pu ní ntuun ń dū ti-Dindaan tàataajiki kí pɔ̀fì binib Isirayeel tiŋki kɔkɔn iwiin ita? Kɔŋkɔnnee, dàkafì tiŋan kí tùkù-mi tin m làá tin kíí un túnní-mee.» 13 Ní Daafiidi bí Gaadi yii: «M bí kunimbaakpaaŋŋu poon ní. Ama an sɔ́ ḿ kɔ́ ti-Dindaan ŋaan ki jítiǹ ḿ kɔ́ unil ŋaan, di sá yii ti-Dindaan úǹ poon mɔ̄ ní.»

14 Di sá ní ti-Dindaan dū bìlbil kúm ki tɔ́ Isirayeel yab pu ní an kūū binib kutukub imuŋku ita nì saalaa. 15 Unimbɔti nìn tú ntuun ŋú cùú nàan̄ Jeerusaleem tiŋki. Ama ti-Dindaan nín ká ntuunee bí ki nà binib puee, ní an gíti kɔ́-u falaa nnaabu gbanti pu. Di sá ní u bí ntuunee yii: «An ŋmāntèe, gbèen̄ee!»

Ŋyunti gbantee ti-Dindaan tuuŋŋu nìn yú ujeebusja^b Araafina bileegbanaapaal caŋin. 16 Daafiidi wáaǹ ki kpēēyee ní ki ká ntuunee yú yilpu nì taapu kansikin ki fɔ́fì kitàataajiki ki túĺ Jeerusaleem tiŋki. Niinee ní Daafiidi nì bitindaŋkpilib tātìi gbāaǹ bi-yigbeeŋi tūū kitiŋ ki pēē kutukub. 17 Ní Daafiidi bí Unimbɔti yii: «Man di kaa bí yii bí kàaǹ binibaaa? Man di ŋá ikpiti, man di yīntì, m-nibul mun ŋá ba? An sá man nì m-dicaŋku tafal ní á dáaĺ? Ti-Dindaan m-Nimbɔtiu, an sá man nì m-dicaŋku yab tafal ní á dáaĺ. Taa dū iween nee kí tɔ̄ a-nibul pu.»

Daafiidi máń ti-Dindaan nsaraafan

(Kpèè Sami 2, 24.18-25)

18 Ti-Dindaan tuuŋŋu bí Gaadi ń tùkù Daafiidi yii: «Jɔ̄m̀ ujeebusja Araafina bileegbanaapaal pu kí mā ti-Dindaan nsaraafan.» 19 Ní Daafiidi nín jɔ́ḿ kii ti-Dindaan nín dī Gaadi pu ki tīī mara puee. 20 Ŋyunti gbantee Ɔrinan nìn bí u-naapaal pu ki gbáà bilee. U fātèe ní ki ká ntuun, ní u-jipɔmbi binaa bin nìn bí u-cee niinee sáǹ ki bál̀. 21 Ní Daafiidi cōom̀ ki nín cá Ɔrinan cee. Ɔrinan kpēēyee Daafiidi dee ní u nyáń ki túŋkì-u ní ki tātìi gbāaǹ u-yigbeel tūū kitiŋ ubɔti nimbiin. 22 Ní Daafiidi bí Ɔrinan yii: «Dū a-naapaal nee kí tīī-mi. M là kí mā ti-Dindaan nsaraafan ŋu-pu. Mimmee nnaabu ŋun jéetì dinibul pu nee làá gbèen̄. Dū-ŋu kí tīī-mi ḿ pà-si ŋu-daaku nín sá puee.» 23 Ní Ɔrinan kíí Daafiidi yii: «Ti-baa ubɔti, yòon̄ tin kɔkɔ fáatì-see kí dūú ŋá saraabi. Kpèè inaa sèé á dūú ŋá saraawɔkaa. Tɔrɔku dɔkpalkaai mun sèé á dūú kpāā ŋŋmi kí wà saraabi, bilee mun sèé á dūú ŋá tijimpin saraau. M dū kɔkɔ ki tīī-si.» 24 Ama ní ubɔti Daafiidi bí Ɔrinan yii: «Aayee, m làá dā a-bileegbanaapaal ní kí pà-si kunimbiŋmiiu nín sá puee. Maa là kí dū tin sá a-wantee nì faalaa wanti kí ŋá saraawɔkaa kí tīī m-Dindaan m-Nimbɔtiu.»

25 Di sá ní Daafiidi pàn̄-u animbil jitɔmbi alaataa aluu dibileegbanaapaal pu. 26 Daafiidi máń ti-Dindaan nsaraafan niin ní ki ŋá bisaraawɔkaabi nì mpèé saraabi. U nìn mēē ti-Dindaan ní úǹ kíí-u ki yāntì ŋŋmi nyánní yilpu ki wùn̄ bisaraawɔkaabi bin pá ŋfan puee. 27 Niinee ní ti-Dindaan tùkū ntuunee yii ŋú gíiǹ kitàataajiki kí fúuń kujitooun.

28 Daafiidi nìn ká yii ti-Dindaan kíí ki fōō u-wimmeem Ɔrinan un sá Jeebusi tiŋkinee bileegbanaapaal pu. Kí yòon̄ ŋyunti gbantee ní u kíǹ ki cáà niin múlmul ki ŋáań saraabi. 29 Ŋyunti gbantee, circir kɔŋkooŋŋu ŋun Mooyiisi nìn ŋá kuteeunee nì bisaraawɔkaabi faŋŋu nìn bíń nsaraaŋapaan laŋki Gabawɔn^c tiŋkin ní. 30 Ama Daafiidi kaa nìn gíti ŋūǹ kí cù niin kí bàlifì Unimbɔti, kun puee u nìn fāŋkì ti-Dindaan tuuŋŋu jikee tikpil.