Krooniiki Gbɔmpeepeekaaku 17

Unimbɔti pōoǹ Daafiidi nì u-dicaŋku dipoondi

(Kpèè 2 Sami 7.1-17)

1 Ubɔti Daafiidi kāl̀ u-beecindin. Dalbee ní u bí Unimbɔti bɔnaatiliu Naatan yii: «Kpèè, man kóò kudii kun ní bi dū seedir dɔi ki máńee, ama ní ti-Dindaan Poondi dakaau yú tanti un bi dū satab^a ki ŋée poon.» 2 Ní Naatan kíí Daafiidi yii: «Pée ŋá tin kā a-pɔbilin a là kí ŋée, di sá yii Unimbɔti bí a-cee.»

3 Ama kunyeeu gbantee ní ti-Dindaan sòon̄ nì Naatan ki bí-u yii: 4 «Cùú tùkù m-tɔntɔnliu Daafiidi yii man ni-Dindaan di lī yii: <Sii di kaa làá mā-mi kudii ḿ nīn kóò. 5 Doooo ŋwiin ŋun ní m nyántìń Isirayeel nibul Eejipiti tiŋkin ki dāa sāā díǹee, maa láá kɔ́ kudii poon ki ká. Ama tantib poon ní m pée kóò ki yìiǹ ki kpántí ikaa. 6 Kí kūtèe, abin ŋin kɔkɔ m céeǹ Isirayeel nibulee, m lēē bibɔsoonliibi tikpil bí nīn kpòotī m-nib. Ama maa láá bālifì bi-kansikin báà ubɔ yii: <Ba pu ní aa dū seedir dɔi ki máń-mi kudii?>» 7 An puee á tùkù m-tɔntɔnliu Daafiidi yii: «Mama ni-Dindaan duulinya kɔkɔ Nimbɔtiu di lī yii: <Man di yōoǹní-si kupikpaapɔɔun, ki páatìń-si ipii boon á kpántí m-nibul Isirayeel yab bɔtiu^b. 8 M nìn bí a-cee laakin kamaa ní a yaa nìn cée. M kūū ki céetì a-nannanliibi kɔkɔ a-nimbiin. M làá yàntī á nyā diyindi kii kitiŋ pu bɔtikpaambee. 9 M làá tīī m-nibul Isirayeel yab laakin ní bi làá nīn kóò kí taa ti nín̄ fàŋkí báà tibee. Binikpitib kaa ti làá dāan̄ kí sàaǹ-bi kii bi nín nìn ŋáań pu njamin, 10 ŋyunti ŋun m nìn lēekì bibɔsoonliibi bi nìn ŋúb́-bee. M làá yàntī á pɔ̄ɔkiǹ a-nannanliibi kɔkɔ, ní ki kpáàa bíi tùkù-si yii man a-Dindaan làá náań-si dicindi. 11 Di sá yii ŋyunti ŋun a-maŋfal wiiŋyi yaa láa dóò a cūtìi ŋàl̄ a-baabee, m làá dāá lēē sisi a-ba jipɔɔn ubɔ ní ú fōō a-yil kí jī dibeel. M làá dāá yàntī u-beel ń báań kí nīn pɔ̄ɔ̄^c. 12 Úǹ di làá dāá mā-mi Kudii^d ní ḿ dāá yàntī u-beel ń báań kí nīn pɔ̄ɔ̄ ki cá jaanjaan. 13 M làá dāá nīn sá ubaati ki tīī-u ní úǹ ń dāá nīn sá man jipɔɔn. M kpá kí dāá fàtī m-boon kí tīī-u kii m nín ŋá ubɔti un līntì a-nyɔkɔpuee puee^e. 14 M làá yàntī ú nīn pée sá m-nibul nì m-beel kpootiliu ní kí nīn cá jaanjaan, ní kí yàntī u-beel ń báań inyaan kí nīn cá talku.>» 15 Ní Naatan cáá tin kɔkɔ ní Unimbɔti tùkū-u dileedakal gbanti poonee ki nāatì Daafiidi.

Daafiidi wimmeem

(Kpèè 2 Sami 7.18-29)

16 Niinee ní ubɔti Daafiidi kɔ́ ki kāl̀ ti-Dindaan nimbiin ní ki bí yii: «Ti-Dindaan Unimbɔti, ŋma ní m sá ní m-dicaŋku bí tilatin ní a cáá-mi ki bàn̄ laakin m bí nee? 17 Ama sii m-Nimbɔtiu ceeyee, tíǹ kɔkɔ kaa sá tiba, ní a gíti pōoǹ m-dicaŋku yab dipoondi fool boon pu. Ti-Dindaan Unimbɔti, a dū-mi ki yíiń unikpaan un nyáń diyindee dee. 18 Ba ní man Daafiidi gíti ŋūǹ kí lì kí kūtì tinyool tin a tīī-mi nee pu? A nyí man a-tɔntɔnliu ki cíl̀. 19 Ti-Dindaan, a nín néeń man a-tɔntɔnliu nì an nín fáatiǹ-see pu ní a túń atuŋkpaan nee kɔkɔ, kí dàkà a nín sá ukpaan puee. 20 Ti-Dindaan, ubɔ kaa ti bí laaba kii siiyee! Unimbɔti ubɔ mun kaa ti bí ki bàn̄-si, ki nóó nì tin ti-tafaliŋ gbìl̄ee. 21 Dinibul diba pée gíti bí kitiŋ pu doo ki náań nì Isirayeel nibulaaa? A cūtì ki fīī-dì ki nyántì Eejipiti yab ŋaan ní ki dū-dì ki ŋá a-nibul. A túń atuŋkpaan nì titumbilindi ki tīī-bi ki nyáń diyindi. A jìn̄ anibul a-nibul din a fīī ki nyántìń Eejipiti tiŋkinee nimbiin. 22 Ti-Dindaan, a dū Isirayeel yab ki kpántì a-nibul kí nīn cá jaanjaan ní ki kpántì di-Nimbɔtiu. 23 Kɔŋkɔnnee ti-Dindaan, yàntī a nín lī yii a làá ŋá pu kí tīī man nì m-dicaŋkuee ń ŋá míǹ. Nín̄ ŋúb́ a nín pōoǹ puee kí nīn cá jaanjaan. 24 Tiŋman yàntī án ŋá míǹ! Niinee a làá nyā diyindi kí nīn cá jaanjaan, ní binib ń lì yii: <Duulinya kɔkɔ Dindaan di sá Isirayeel Nimbɔtiu, Unimbɔti un bí ki tīī Isirayeelee.> Yàntī dibeel ń gbíntí m-dicaŋkun kí nīn cá jaanjaan. 25 Di sá yii, m-Nimbɔtiu, sii di yāntì m béè a-landɔkɔŋu ŋun sá yii a làá tīī-mi naantiibi bin làá dāá jī dibeel m-kpátam boonee. An pu ní man a-tɔntɔnliu ká dipɔbil ki gbāā a-nimbiin ki mèé-si nee. 26 Kɔŋkɔnnee ti-Dindaan, sii un di sá Unimbɔtee, sii di pōoǹ yii a làá ŋá-mi tiŋaŋkpaandi gbanti! 27 A lēē kí bìin̄ m-dicaŋku pu án nín làá ŋá pu m-naantiibi ń nīn pée sá bibɔtiibi a-nimbiin kí nīn cá jaanjaanee. An nín sá yii sii ti-Dindaan di bīiǹ bi-puee, bi làá pée ká dibiindi ní kí nīn cá jaanjaan!»