Krooniiki Gbɔmpeepeekaaku 16

1 Daafiidi nìn gāā tanti bí dū Unimbɔti dakaau kí síiń poon. Bi nìn cáá dakaayee ki síiǹ tantee kansikin. Míǹ boonee ní Daafiidi ŋá bisaraawɔkaabi nì mpèé saraabi ki tīī Unimbɔti.2 U ŋá saraabi gbanti ki dóòyee ní ki mēē ki bīiǹ samaa pu ti-Dindaan yindi pu.3 Boonee ní u yākatì tijin ki tīī Isirayeel yab kɔkɔ. Uninjaaa, unimpuɔɔɔ, báà ŋma nìn fōō kpɔnɔ ubɔ nì daati subiliŋ kalaau nì fiinyi subikuliŋ kalaau^a.

Leefii yab gāā ilan ki pàkā ti-Dindaan

(Kpèè Ilan 105.1-15, 96, 106.1,47-48)

4 Daafiidi nìn dū Leefii yab bin bí ditundin ŋyunti gbantee biba ki síiǹ ti-Dindaan Dakaau nyɔkɔpu bí gāā ilan kí pàkà ti-Dindaan Isirayeel Nimbɔtiu, kí jāam̀-u ní kí nyɔ̄ŋkì u-yindi. 5 Asaafi di nìn kpòotī-bi ní Seekariyawuu tútúǹ-u. Yeeyiyeel nì Seemiiramooti nì Yeekiyeel nì Maatitiyawuu nì Eeliyaab nì Beenayawuu nì Oobeedi-Eedoom nì Yeeyiyeel bɔ̀ɔ́ tibati nì saŋgub ní Asaafi cákafí cancakantib. 6 Bisaraaŋaliibi Beenayawuu nì Yasiyeel di nìn yú Unimbɔti Dakaau nyɔkɔpu ki búǹ akantán kaa gbèentí. 7 Ŋwiin gbanti sá mpeekaa ŋun Daafiidi tīī Asaafi nì u-nabiyaamu ditundi bí nīn gà ilan ki nyɔ́ŋkí ti-Dindaanee.

8 Nlan ŋun bi nìn gāāyee sèé:

Ní nyɔ̄ŋkìmaan ti-Dindaan kí yòon̄ u-yindi yilpu,

ní yàntīmaan anibul kɔkɔ

ń gbìl̄ atuŋkpaan ŋin u ŋáaǹee pu.

9 Ní gāāmaan ilan kí pàkà-u, ní bɔ̀ɔ̀maan tibɔɔkaal kí nyɔ̄ŋkì-u.

Ní māafìmaan atuŋkpaan ŋin kɔkɔ u túńee.

10 Ní nīn fàal̀maan u-circir yindi pu,

nín̄ bímaan mmɔnni, nimbi bin nyàab̀ ti-Dindaanee.

11 Nyàab̀maan ti-Dindaan nì u-pɔŋŋu,

pée nyàab̀maan kí wāl̀ u-nimbiin.

12 Ní téetímaan maamaacib bin kɔkɔ u ŋée,

nì atulim nì ibɔsoon in nyáń u-nyɔkɔnee pu.

13 Nimbi u-tɔntɔnliibi Isirayeel naantiibi,

nimbi Jaakɔb naantiibi,

nimbi bin u lútèe, téetímaan.

14 Úǹ di sá ti-Dindaan Unimbɔti,

úǹ di sá duulinya kɔkɔ bɔsoonliu.

15 Ní taa pée súntí u-poondi pu dalba dalba,

tibɔti tin u sòon̄ ki tīī anaantitɔntɔkɔ kutuku puee.

16 Dipoondi gbanti ní u pōoǹ Abraam,

díǹ dibaantiil ní u pūtì ki pōoǹ Isaaki.

17 Dipoondi gbanti

ní u dūu kpántì mara ki tīī Jaakɔb,

talku poondi din u pōoǹ Isirayeel,

18 ki lī yii: «M làá dū Kanaan tiŋki kí tīī-si,

án nīn sá si nì a-naantiibi fakal»^b.

19 Ti-naanjab kaa nìn náaǹ báà fiii,

bi nìn pée sá binicambi bikaaŋkaabi

yéè ní kitiŋ nee pu.

20 Bi nìn kàal̀ atimbunni ní ki kpántí,

ní kí kàl̄ dibeel diban kí póotí din kíǹ.

21 Ama Unimbɔti kaa kíí báà unil ń sàaǹ-bi.

Bi-puee, Unimbɔti dáaĺ bibɔtiibi tafal ki lī yii:

22 «Ní taa gbēē bin m lútèe,

kí taa ŋá m-bɔnaatiliibi tikpitil tiba.»^c

23 Duulinya kɔkɔ nib, gāāmaan ilan

kí pàkà ti-Dindaan.

Ŋwiin kamaayee, ní nīn báakí

ki lì yii úǹ di sá Ufiil.

24 Māafìmaan atimbun kɔkɔ nib u-nyooti,

kí māafìmaan duulinya kɔkɔn u-maamaaci tuuŋŋi.

25 Di sá yii ti-Dindaan di sá ukpaan

ní ki máaǹ inyɔŋki.

U sá kuwambiiu ní ki jítiǹ awaa kɔkɔ.

26 Anibul ŋin kíǹee waaŋi kaa bí tiban,

ama ní ti-Dindaan di náań yilpu.

27 U-nimbiin ní tikpaandi nì dibeel bí,

mpɔn nì mmɔn gbí u-kɔŋkooŋŋun.

28 Ntimu kɔkɔ nibuliŋ,

dāá tīīmaan ti-Dindaan tinyool,

ní bāakìmaan u-nyooti nì u-pɔŋŋu.

29 Dāá nyɔ̄ŋkìmaan u-yiŋkpaandi.

Cáaḿmaan ni-saraabi u-nimbiin.

Bòom̄maan taapu ti-Dindaan nimbiin,

ŋyunti ŋun u yaa lēē u-ba ki dàkēe.

30 Duulinyan kɔkɔ nib,

ni-wunti ń nīn gbáà kpàkpakpa u-nimbiin!

Tiŋman kitiŋ bá ki pɔ̄ɔ̄,

ní kì kpá kí lábití kí cìb̄.

31 Kutagbɔŋu, nín̄ fàal̀,

kitiŋ, nín̄ bí dipɔɔpindin!

Lìmaan atimbun kɔkɔ nib cee yii:

«Ti-Dindaan di sá ubɔti!»

32 Tiŋku ń nīn wòoǹ

ki kpáaǹ tin kɔkɔ bí u-poonee!

Tisati ń nīn fàal̀

ki kpáaǹ tin kɔkɔ bí ti-poonee!

33 Kubambaŋŋun sufii ń nīn gbáà

iwiliili ti-Dindaan nimbiin,

di sá yii u dòoń kí sòoǹ duulinya bɔti.

34 Tí nyɔ̄ŋkì ti-Dindaan, di sá yii u ŋān̄,

ní u-neeŋkpaandi bí ki cá jaanjaan^d!

35 Ní lìmaan yii:

«Unimbɔti ti-Fiiliu, fīī-ti,

kóoǹ-ti kí kpāfì,

ní kí fīī-ti kí nyāntí atimbun ŋin kíǹee ŋaan.

A-yindi sá circir yindi ní.

Niinee ti làá ŋmā kí tùkù-si yii si nì ditundi,

ní án nīn mɔ̄ǹ-ti tí nyɔ̄ŋkì-si.»

36 Ní jāam̀maan ti-Dindaan Isirayeel Nimbɔtiu,

kí nīn cá abin abin.

Ní samaa kɔkɔ kíí yii «Ameeni! Nyɔ̄ŋkìmaan ti-Dindaan!»

37 Boonee ní Daafiidi tīī Asaafi nì u-nabiyaamu mara yii bí gbíntí ti-Dindaan Poondi Dakaau cee. Niin ní bi làá nīn bí ki tūǹ bi-tundi baabadal kí nóó nì ŋwiin kamaa koobil nín sá puee. 38 Daafiidi nìn lēē Oobeedi-Eedoom nì u-nabiyaamu binib imuŋku ita nì binii bí nīn cí ti-Dindaan dakaau, kí kūtì Yeedutun jipɔɔn Oobeedi-Eedoom nì Koosa. 39 Daafiidi nìn dū ti-Dindaan circir kɔŋkooŋŋu ŋun bí Gabawɔn tiŋkinee tundi ki ŋúbiǹ usaraaŋakpil Sadooki nì u-nabiyaamu^e. 40 Niin ní bi làá nīn ŋáań kutaafaau nì kujoou bisaraawɔkaabi. Bíǹ di làá nīn ŋáań tin kɔkɔ ŋmàn̄ ki kā marab bin ti-Dindaan nìn dūu tīī Isirayeelee gbɔŋku poon. 41 Binib bin nìn kútì bi-puee di sá Eeman nì Yeedutun nì bin bi nìn pée lēē bí nīn gà ilan ki nyɔ́ŋkí ti-Dindaanee. Di sá yii u-ŋanti bí ní ki cá jaanjaan. 42 Eeman nì Yeedutun di nìn kpèé akantán nì cancakantib nì tiwan tin kɔkɔ bi nìn cáa bɔ̀ɔ́ ki gà ilanee. Yeedutun dicaŋkun yab di nìn cí kipunyɔkɔ. 43 Míǹ boonee ní báà ŋma nín kùǹ, ní Daafiidi mun nín gítí kí cùú màntì u-dicaŋku yab pu^f.