Krooniiki Gbɔmpeepeekaaku 14

Daafiidi tuuŋŋi Jeerusaleem tiŋkin

(Kpèè 3.5-9, 2 Sami 5.11-16)

1 Tiir yab bɔtiu Iram nìn túnní binib Daafiidi cee. Bi nìn cáań-u busubu bun bi yíì seediree dɔi nì kapintab nì bitaŋkpakpitiliibi bí mā-u dibeecindi. 2 Niinee Daafiidi nìn béè yii ti-Dindaan u-ba di kāaǹ-u Isirayeel tiŋki pu dibeel, ní Isirayeel u-nibul puee, u bíi yòontí u-beel yilpu. 3 Daafiidi gíti cáá binimpoobi biba Jeerusaleem tiŋkin. Binimpoobi gbanti màl̄-u mbininjabiyaamu nì nnimpubiyaamu ki kútì. 4 Mbininjabiyaamu mun u màl̄ Jeerusaleem tiŋkinee di sá Samuwa nì Soobaab nì Naatan nì Saloomɔn, 5 nì Yiibaar nì Eeliisuwa nì Eel-Peeleeti, 6 nì Nooga nì Neefeegi nì Yaafiya, 7 nì Eeliisama nì Beelyadaa nì Eeliifeeleeti.

Daafiidi jáń ki pɔ́ɔkiǹ Fiiliistii yab

(Kpèè 2 Sami 5.17-25)

8 Fiiliistii yab nín nìn gbìl̄ yii bi bātì ŋkpam ki sītì Daafiidi yil pu ki kāaǹ-u dibeelee, ní bi-kɔkɔ nín cá kí nyàab̀-u kí cúú-u. Daafiidi gbìl̄ an bɔtee ní ki nyáń ki túŋkì-bi nsanni. 9 Fiiliistii yab bàn̄ee ní ki yàl̄ ki gbí Reefayiim tantakalin. 10 Ní Daafiidi bālifì ti-Dindaan yii: «Ḿ cùú já nì Fiiliistii yabaaa? A làá dū-bi kí ŋá m-ŋaanaaa?» Ní ti-Dindaan kíí Daafiidi yii: «Cùú já nì bi, m làá dū-bi kí ŋá a-ŋaan.» 11 Niinee Fiiliistii yab nín cá áli Baal Peerasiim ní Daafiidi jáń ki pɔ́ɔkiǹ-bi niin. U nìn bí yii: «Kii nnyim nín cífí nnyimbilkaam gundi dibundi puee, míǹ ní m-Dindaan cátì nsan m-nimbiin m-nannanliibi kansikin!» An pu ní bi pú niin diyindi yii Baal-Peerasiim. Taapu di sá yii: «Un cífí dibundee Kpiliu.» 12 Fiiliistii yab nìn sáǹ ki fá bi-waaŋi niin, ní Daafiidi yāntì bi wùn̄-ŋi ŋŋmi. 13 Fiiliistii yab fātìi tí gítìń ki yàl̄ ki gbí Reefayiim tantakal kí já nì Daafiidi. 14 Ní Daafiidi bālifì ti-Dindaan ní úǹ kíí-u yii: «Á taa bíití bi-nimbiin pú kí já nì bi! Màntī bi-boon pú, ní kí dāá nyā bi-pu isufi taapu. 15 A yaa láa gbìl̄ bi-tagbiŋŋi pu isufee yilpuee, á yáb́ malaa. Ti-Dindaan di līntì a-nyɔkɔpu kí já nì Fiiliistii yab janjakitil.» 16 Ní Daafiidi ŋá kii ti-Dindaan nín bí ú ŋá puee, ní ki jáń ki pɔ́ɔkiǹ-bi, ki jìn̄-bi kí yòon̄ Gabawɔn kí tin cáá sāā Geeseer kpaanyɔkɔ^a. 17 Niinee ní Daafiidi yindi dūu gbītì ntimu kɔkɔ poon ní báà ŋma kíǹ ki sòoǹ u-bɔti, ní ti-Dindaan yāntì atimbun kɔkɔ nib fāŋkì-u.