Krooniiki Gbɔmpeepeekaaku 13

Daafiidi cáań Unimbɔti Dakaau Jeerusaleem

(Kpèè 2 Sami 6.1-11)

1 Daafiidi nìn kpáfì bijanjakpilib bin kpòotī bijanjaliibi dilaataalee nì bin kpòotī kutukuee nì bitindaŋkpilib kɔkɔ ní bi kāl̀ ki sòon̄ ki kpōotì tɔb. 2 Boonee ní Daafiidi bí Isirayeel yab kɔkɔ yii: «An yaa kítì ni-cee ní ki yaa lafun sá ti-Dindaan ti-Nimbɔtiu lammee, tí lēē binib kí tɔ̄ ti-nabiyaamu mun kɔkɔ dáá gbíntìi kāń Isirayeel timmu kɔkɔnee. Cilinjee tí cù kí ká bisaraaŋaliibi nì Leefii yab bin kóò bi-timmunee bí dāan̄ kí kūtì ti-pu. 3 Bi yaa dɔ́mińee ní tí cù kí yòon̄ní ti-Nimbɔtiu Dakaau kí gíiǹní, kun puee ŋyunti ŋun Saayuul nìn kā dibeelee, ti-tafal kaa nìn fātìi tɔ́ Dakaa gbanti.» 4 Binib bin kpáfì niinee kɔkɔ kíí yii bí ŋá Daafiidi nín lī puee, kun puee báà ŋma nìn ká yii an nìn sá nlandɔkɔmɔnti. 5 Niinee ní Daafiidi kpáfì Isirayeel yab kɔkɔ, kí kíĺ bin kóòń Eejipiti tinnyɔkɔki ŋgiil púee kí cáá sāā bin kóòń Leeboo-Amaati tiŋki ŋgan púee, bí cù kí yòon̄ní Unimbɔti Dakaau Kiiriyati-Yeeyariim tiŋkin. 6 Ní Daafiidi nì Isirayeel yab kɔkɔ nín jɔ́ḿ Baala, an dàkà yii Kiiriyati-Yeeyariim tiŋki kin bí Juuda naakookunee, kí cùú yòon̄ní Unimbɔti Dakaau. Ti-Dindaan un kā keerubimbi^a kansikinee yindi ní bi dūu pú Dakaa gbanti. 7 U nìn yú Abinadaab dumpu ní. Bi nìn dū-u ki tākaǹ tɔrɔkupɔɔn poon ní. Usa nì Ayiiyoo di nìn kpòotī inaa in dàtī tɔrɔkupɔɔn gbantee. 8 Daafiidi nì Isirayeel yab kɔkɔ nìn bí ki fàal̀ nì dipɔɔpindi Unimbɔti nimbiin ki gà ilan ní ki bɔ̀ɔ́ tibati nì saŋgub nì ŋgaŋgamu, ki cákafí cancakantib, ki búǹ akantán. 9 Bi bàn̄ Kiidɔn tuulool caŋinee ní inaa gbéetì ní Usa tāntì u-ŋal kí cúú Unimbɔti dakaau. 10 Niin ní ti-Dindaan gíí Usa pu diŋuul. U nìn fáá ki kūū-u, kun puee u nìn gbēē dakaa. Usa nìn kpíì Unimbɔti dakaau caŋin niin. 11 Niinee Daafiidi fōō diŋuul, kun puee ti-Dindaan nìn fáá ki kūū Usa. Bi nìn pú mpaan gbanti diyindi yii Peereesi-Usa. Bi dáá gbíntìi yíì mpaan gbanti míǹ ki dāa sāā díǹ. 12 Daafiidi nìn fāŋkì ti-Dindaan yaadal wiiŋŋu, ní ki bí yii: «Maa làá ŋmā kí cùnnì ti-Dindaan dakaau m-dumpu!» 13 Daafiidi kaa nìn gíti là kí yòon̄ ti-Dindaan dakaau kí cùnnì Daafiidi Tiŋkin. U nìn yāntì bi cáa yóoǹ Oobeedi-Eedoom dumpu. Kijapaai gbanti nìn sá Gaati tiŋkin ní. 14 Dakaayee nìn yúl̀ Oobeedi-Eedoom dumpu iŋmal ita, ní ti-Dindaan bīiǹ u nì tin kɔkɔ u cááyee pu.