Bibɔsoonliibi Gbɔŋku 10

Bibɔsoonliibi biba mun: Toola nì Yayiir

1 Abimeeleeki kúm boonee, Puuwa jipɔɔn Toola, Doodoo naantiiu un nìn sá Isakaar naakookunee di nìn līntì Isirayeel yab nyɔkɔpu ki nìn fīī-bi bi-nannanliibi ŋaan. U nìn kóò Samiir tiŋki kin bí Eefiraayiim jooŋŋi puee ní. 2 U nìn kpōotì Isirayeel yab abin mmuŋku nì ata ní ki dāa nín kpíì ní bi síb́-u Samiir tiŋkin.

3 Toola kúm boonee, Yayiir un nìn sá Galaadi tiŋkinee di nìn fōō-u. U nìn kpōotì Isirayeel yab abin mmuŋku nì ali ní. 4 Yayiir nìn cáá jipɔmbi mmuŋku nì saalaa, bi-kɔkɔ nìn kàal̀ mmanjamu mmuŋku nì saalaa ní ki nìn cáá ntimbilimu mmuŋku nì saalaa. Díǹ pu nee bi-timmu gbanti ní bi dáá gbíntìi yíì yii Yayiir timbilimmu Galaadi tiŋkinee. 5 Yayiir nìn kpíì ní bi síb́-u Kamɔn tiŋkin.

Amɔn yab bíi jáà nì Isirayeel yab

6 Isirayeel yab nìn fātìi kíĺ ki bíi ŋáań tin kaa kítì ti-Dindaan nimbiinee. Di sá yii bi nìn fātìi kíĺ ki bíi tòotī Baal nì Asitaartee, ní ki tòotī Aram yab nì Siidɔn yab nì Moowaab yab nì Amɔn yab nì Fiiliistii yab waaŋi. Bi nìn dū ti-Dindaan ki fá, kaa nìn gíti jáaḿ-u. 7 Ti-Dindaan nìn gíí diŋuul Isirayeel yab pu ní ki nìn dū-bi ki ŋá Fiiliistii yab nì Amɔn yab ŋaan. 8 Kí yòon̄ dibindi gbanti kí cáá sāā abin saalku nì atee, an nibee nìn nāaǹ Isirayeel yab bin nìn kóò Galaadi tiŋkee, an dàkà yii Amɔɔr yab tiŋki kin nìn bí Jɔɔdan buŋŋu lapu pu gbandi jaaŋŋu púee, ki nìn sāaǹ-bi tiŋan. 9 Amɔn yab nìn dūtìń Jɔɔdan buŋŋu ki dɔ́miń ki jáń nì Juuda naakookun yab nì Beenjameen naakookun yab nì Eefiraayiim naakookun yab. Isirayeel yab nimbaaku kun poon bi nìn kíǹ ki bée nìn gíti nyāŋkì tikpil. 10 Niinee ní Isirayeel yab kúuǹ ki yíiń ti-Dindaan ki lī yii: «Tilafuŋman ní ti yīntiǹ-si, kun puee ti dū sii un sá ti-Nimbɔtiuee ki fá ní ki bí ki tòotī Baal.» 11 Ti-Dindaan nìn bí Isirayeel yab yii: «Ŋyunti ŋun ní Eejipiti nì Amɔɔr nì Amɔn nì Fiiliistii yab, 12 nì Siidɔn nì Amaleeki nì Maawɔn yab nìn wɔ́b́-ni ni kúuǹ ki yíiń-mee, maa nìn fīī-ni bi-ŋaanaaa? 13 Ama ní nimbi dū man ki fá ki bíi jáaḿ inimbɔticaan. An puee maa làá ti fīī-ni. 14 Ní cùmaan kí nīn kūuntí ki yíì awaa ŋin ni lēē yii ni là kí nīn tòotēe, ŋí fīī-ni ni-nimbaakun!» 15 Ní Isirayeel yab fātìi bí ti-Dindaan yii: «Ti-Dindaan, ti yīntì ní. Ŋá-ti min di yaa pée ŋān̄ a-ceeyee, ama ti gbàam̄-si ní, fīī-ti díǹ wiiŋŋu nee!» 16 Isirayeel yab nìn lī mimmee ní ki dū awaa ŋin nìn bí bi-ceeyee ki fá ní ki fātìi bíi jáaḿ ti-Dindaan. Niinee falaau un bi nìn bí ki jīǹee nìn kɔ́ ti-Dindaan tikpil.

17 Amɔn yab nìn yíiń tɔb ki kpáfì ní ki ŋātì bi-janjanaapaal Galaadi tiŋkin, ní Isirayeel yab kóoǹ ki kpáfì ki ŋātì bi-janjanaapaal Miisipa tiŋkin^a. 18 Niin ní Isirayeel yab nì Galaadi tindaŋkpilib nìn bíi bàlifī tɔb yii: «Ŋma di làá nín kíĺ kujaau nì Amɔn yab dee? Udaan di bàà làá kpántí Galaadi tiŋki nib kɔkɔ kpiliu!»