Bibɔsoonliibi Gbɔŋku 9

Abimeeleeki kpántì Siikeem tiŋki bɔtiu

1 Yeerubaal, an dàkà Geedeeyɔn jipɔɔn Abimeeleeki nìn cūtì Siikeem tiŋkin ki ká u-na niijab nì u-maaliŋun yab kɔkɔ ki bí-bi yii: 2 «Ní tùkùmaan Siikeem tindambi kɔkɔ yii: <Ni là Yeerubaal jipɔmbi binib imuŋku ita nì saalaayee ní ń nīn kpòotī-naaa, ni là unibaanti ní ń nīn kpòotī-ni? Ní téetímaan yii man nì ni sá fatikubaanti ní!>» 3 Abimeeleeki na niijab nìn dū tibɔtee ki lī Siikeem tindambi kɔkɔ cee, ní bíǹ páaǹ Abimeeleeki boon, di sá bi nìn lī yii: «Ti-nabiki dee.» 4 Bi nìn lēē Baal-Beeriiti diiku poon animbil jitɔmbi imuŋku ita nì saalaa ki tīī Abimeeleeki ní u dūu fōō tinifan nì naayeekub ki páaǹ u-boon.

5 Abimeeleeki nìn cūtì u-baa dumpu, Oofiraa tiŋkin ki cúú u-nabiyaamu Yeerubaal jipɔmbi binib imuŋku ita nì saalaayee ki kūū ditaŋkpabaantiil pu. Asee Yeerubaal jipɔnjoolkaau Yootam di nìn kíǹ, kun puee úǹ nìn sáǹ ki bál̀. 6 Niinee ní Siikeem tindambi kɔkɔ nì Beeti-Miiloo yab kɔkɔ kpáfì ní ki cūtìi kāaǹ Abimeeleeki dibeel seeni subu bun nìn yú ditaŋkpal din bi nìn cóoǹ Siikeem tiŋkinee caŋin.

Yootam gāā Siikeem yab dilaŋkpandi

7 Yootam nín gbìl̄ tin jítèe ní u jɔ́m̀ ki tɔ́kɔǹ Geerisiim jool pu ki téeń mpɔn ki tùkū-bi yii: «Siikeem tindambi, ní pīlifìmaan-mi ní Unimbɔti ń pīlifì ni mun^a.

8 «Isufi di nìn yíkì yii i làá kàan̄ i-bɔtiu. I nìn bí ɔliifi subu yii: <Sii nín̄ sá ti-bɔtiu!> 9 Ní ɔliifi subu kíí isufi in kíǹee yii: <Mimmee m yàntī ŋkpam min awaa nì binib néeńee kí cùú jī dibeel isufi pu deeyaa!> 10 Ní isufi in kíǹee bí fiigi subu yii: <Sii dāan̄ kí nīn sá ti-bɔtiu!> 11 Ní fiigi subu kíí in kíǹee yii: <Mimmee m yàntī m-subiliŋ ŋin ŋān̄ ki mɔ̄ cɔ́ncɔŋ nee kí cùú jī dibeel isufi pu deeyaa!> 12 Ní isufi in kíǹee bí fiinyi subu yii: <Sii dāan̄ kí nīn sá ti-bɔtiu!> 13 Ní fiinyi subu kíí in kíǹee yii: <Mimmee m yàntī m-damam min awaa nì binib nyù an nyàatī-bee kí cùú jī dibeel isufi pu deeyaa!> 14 Niin ní isufi kɔkɔ bí kikuŋkumbɔŋ yii: <Sii dāan̄ kí nīn sá ti-bɔtiu!> 15 Ní kikuŋkumbɔŋ bí isufi yii: <Tiŋman ní ni yaa lafun là kí kàan̄-mi dibeel ḿ nīn sá ni-bɔtiuee, ní sāǹnímaan kí dāá báĺ m-booŋŋu taapu. Ama an yaa kaa sá míǹ, ŋŋmi làá nyā man kikuŋkumbɔŋ poon kí wà kí kpáaǹ Leebanɔn sufii in bi yíì yii seediree!>

16 «Too, kɔŋkɔnnee nimbi ni-ba ń kpèè yii ni nín kāaǹ Abimeeleeki dibeel nee, ni lafun ŋá míǹ nì dipɔbil diba nì tibulcinaaa? Min ni ŋá Yeerubaal nì u-dicaŋku nee, míǹ ní ni bàà máaǹ kí ŋá-baaa? Tiŋan tin kɔkɔ u ŋá ki tīī-nee, min ni làá dūú jāam̀-uee deeee? 17 M-baa jáń kujaau nimbi pu ní, ki dū u-maŋfal ki tīī kaa fāŋkì ŋkúm ní ki fīī-ni ki líì Madiyan yab ŋaan. 18 Ama díǹ nee, ni fātìi lábitì m-baa dicaŋku pu, ki cúú u-jipɔmbi binib imuŋku ita nì saalaayee ki kūū ditaŋkpabaantiil pu. Míǹ boonee ní ni dū dibeel ki tīī u-yumbunimpuu jipɔɔn Abimeeleeki ú nīn kíǹ ki sá Siikeem tiŋki nì ki-tindambi bɔtiu, yii u nín sá ni-nabikee pu. 19 An puee ni yaa lafun nyí yii min ni ŋá Yeerubaal nì u-dicaŋkuee, an sá nì dipɔbil diba nì tibulcinee, ní nīn fàal̀maan Abimeeleeki pu ní u mun ń nīn fàal̀ nimbi pu! 20 An yaa kaa sá mimmee, ŋŋmi ń nyā Abimeeleeki cee kí wà Siikeem nì Beeti-Miiloo tindambi, ní ŋŋmi ń nyā Siikeem nì Beeti-Miiloo tindambi mun cee kí wà Abimeeleeki!»

21 Yootam nìn sòon̄ míǹ ki dóòyee ní ki sáǹ ki cūtìi kɔ́ Beeyeer tiŋkin. U nìn gbíntì niin, kun puee u nìn fàŋkí u-maan Abimeeleeki.

Siikeem yab bíi jáà nì Abimeeleeki

22 Abimeeleeki nìn jíń dibeel Isirayeel tiŋki pu abin ata ní. 23 Unimbɔti nìn yāntì Sitaan dɔ́miń ki kɔ́ Abimeeleeki nì Siikeem tindambi kansikin, ní Siikeem tindambi kaa nìn gíti tɔ́ Abimeeleeki. 24 Di sá yii an nìn bālifì yii Abimeeleeki nì Siikeem tindambi ń túń bi nín nìn kūū Yeerubaal jipɔmbi binib imuŋku ita nì saalaayee gìńdi. Abimeeleeki làá túń digìńdi gbanti, kun puee u nìn kūū u-nabiyaamu, ní Siikeem tindambi mun ń túń-dì, kun puee bi nìn tútúǹ Abimeeleeki u kūū u-nabiyaamu. 25 Siikeem tindambi nìn nyēē Abimeeleeki boon ní ki nìn lèekī binib bi cá ki nākantí ajoon yilpu ki cí. Unil un kamaa yaa nìn jītí bi-caŋin didandi puee, bi nìn gà kí kíntí udaan ní kí fūkul̀ udaan wanti kɔkɔ. Ní bi cáá an bɔtee ki tùkū Abimeeleeki.

26 Ŋwiin ŋubɔee, Eebeedi jipɔɔn Gaal nìn dɔ́miń Siikeem tiŋkin, u nì u-nabiyaamu. Siikeem tindambi nìn dū bi-mákal ki ŋá Gaal pu. 27 Siikeem tindambi nìn nyáń ki cūtì tisatin ní ki kītì bi-fiinyi sufii biliŋ ki tāā ki lēē ndamam ní ki bɔ́ntì agbiil. Bi nìn kɔ́ bi-nimbɔtiu un bi jáaḿee diikun ní ki jíń ki nyùn̄ ní ki mēē mbusu ki tɔ́ Abimeeleeki pu. 28 Eebeedi jipɔɔn Gaal nìn bí ki lì yii: «Abimeeleeki di sá ŋma, ní timbi Siikeem yab ń nīn bí u-taapu ní? Úǹ di kaa sá Yeerubaal jipɔɔn ní Seebuul sá u-kàliŋkpiliuaaa? An puee nín̄ bímaan Siikeem baa Amɔɔr nib taapu. Ba pu ní tí nīn bí Abimeeleeki taapu^b? 29 Ŋma bàà dù binib nee ki ŋúbiǹ-mi, m bàà làá jà Abimeeleeki ní!» Ní ki lī Abimeeleeki yii: «Nyàab̀ bijanjaliibi kí kūtì a-yab pu kí nyānní tí ká tɔb!»

30 Seebuul un nìn sá Siikeem tiŋki gɔminauee nìn gbìl̄ tin Eebeedi jipɔɔn Gaal bí ki sòoǹee ní ki fōō mbum. 31 Ní u lēē binib ki tú dibalin Abimeeleeki cee bi cūtìi tùkū-u yii: «Kpèè, Eebeedi jipɔɔn Gaal dɔ́miń Siikeem tiŋkin, u nì u-nabiyaamu, ní bi bí ki sòoǹ nì Siikeem yab kí bīil̀ sii nì bi kansikin. 32 An puee á yīkì kunyeeu nee kí yòon̄ a-janjaliibi ní dāan̄ kí nákań tisatin. 33 Kutaa yaa fu wúntì ŋwìiń nyáatèe, á fu dāan̄ malaa kí jáǹ kitiŋee. Gaal nì binib bin nóó-uee yaa fu nyáń kí já nì see, á fu ŋá-bi min máaǹee.»

34 Abimeeleeki gbìl̄ mimmee ní ki lafun yíkì kunyeeu gbanti, ki cúú u-janjaliibi ki yākatì akiti anaa pu ní bi cūtìi nákáǹ nákáǹ tisatin ki pìlīǹ Siikeem tiŋki. 35 Abimeeleeki nín ká yii Eebeedi jipɔɔn Gaal nyánní ki yú kitiŋ punyɔkɔpuee, ní u nì u-yab nyīī ki yíkì laakin bi náká nákée. 36 Gaal nín ká dinikitil gbantee ní u bí Seebuul yii: «Kpèè, dinikitil diba di nyánní ajoon yilpu ki sìntīńee.» Ní Seebuul bí-u yii: «An sá ajoon jiliŋku ní a cáa yíì binib.» 37 Ní Gaal fātìi gíti bí yii: «Kpèè, dinikitil diba di nyánní dijool din bí kitiŋ kansikin nì kansikin watil pú ki sìntīńee, diba mun di dī seeni subu bun sá Bibɔɔbi subuee saŋŋu ki dòońee.» 38 Niinee ní Seebuul bí-u yii: «A-nyɔkɔ kin a bàà bí ki lúǹee bí la? Sii di kaa bíi lì yii: <Ŋma di sá Abimeeleeki ní timbi ń nīn bí u-taapueeee?> U-janjaliibi bin ní a bí ki ŋèeǹee deeyaa! Kɔŋkɔnnee nyā sii nì u ń jáa!» 39 Ní Gaal nyáń ki līntì Siikeem tindambi nyɔkɔpu ki bíi jáà nì Abimeeleeki. 40 Ama Abimeeleeki nìn jìn̄-u ní u sáǹ ki kátì. Binib tikpil nìn kpíì ki dɔ̄ dɔ̄ ki tin sāā kitiŋ punyɔkɔki nyɔkɔpu. 41 Míǹ boonee ní Abimeeleeki cūtì ki kíǹ ki kóò Aruuma tiŋkin, ní Seebuul jìn̄ Gaal nì u-nabiyaamu bí taa ti kàl̄ Siikeem tiŋkin.

42 Kutaa wúntèe ní Abimeeleeki gbìl̄ yii Siikeem yab bíi bɔ́ntí kí nyā tisatin. 43 Ní u cúú u-janjaliibi ki yākatì akiti ata, ní bi cūtìi nákáǹ nákáǹ tisatin. Ŋyunti ŋun Abimeeleeki ká yii Siikeem yab nyánní kitiŋinee ní u nì u-yab yíkì ki dūu túuǹ-bi ní ki jáń ki pɔ́ɔkiǹ-bi. 44 Abimeeleeki nì u-yab bin nìn bí u-ceeyee nìn ŋá malaa ki cūtìi yúl̀ kitiŋ punyɔkɔki nyɔkɔpu ki pīiǹ nsan. Ní u-yab akiti ali ŋin kíǹee yíkì ki páatìi jéetì Siikeem yab bin nìn pée bí tisatinee kɔkɔ pu ní ki pɔ̄fì-bi. 45 Abimeeleeki nìn dū ŋwimmɔn ní ki jáń nì Siikeem tiŋki ní ki dāa nín fōō-kì. U nìn kūū ki céetì ki-nib kɔkɔ, ki nàn̄-kì dúsi dusi ní ki dū ŋyaam ki yāaǹ ki-pu^c.

46 Miigidaal-Siikeem tindambi nín gbìl̄ mimmee ní bi yíkì ki nín cá Eel-Beeriiti^d waadiiku taŋkpalɔkɔŋun. 47 Ní bi cūtìi tùkū Abimeeleeki yii Miigidaal-Siikeem tindambi kɔkɔ kóoǹ ki kpáfì dicilpu ntaŋkpalɔkɔn. 48 Niinee ní Abimeeleeki nín jɔ́ḿ Saalmɔn jool pu, ki kpáaǹ u-janjaliibi kɔkɔ. Abimeeleeki nìn yōoǹ kicɔkɔ ki gāā disupandi diba ki dūu būkuǹ, ní ki tùkū binib bin nóó-uee yii: «Min ní ni ká m ŋá nee, ni mun ŋámaan míǹ malaa!» 49 Ní bi kɔkɔ gāā disupandi diba diba ki dūu būkuǹ ki páaǹ Abimeeleeki boon ní bi cáa dūu pīiǹ ntaŋkpalɔkɔee nyɔkɔpu, ki dū ŋŋmi ki sēē ní an wùn̄ binib bin kɔkɔ bí poonee. Míǹ ní Miigidaal-Siikeem tiŋki yab mun kɔkɔ nìn kpíì ki kúntì. Binib bin nìn kpíì mimmee nìn sá kii bininjab nì binimpoobi kutuku ubɔ nyɔkɔm ní.

Abimeeleeki kúm

50 Míǹ boonee ní Abimeeleeki dūu túĺ Teebeesi tiŋki watil pú, ki cūtìi jáń ki fōō kitiŋ gbanti. 51 Kitiŋ gbanti kansikinee, kudifɔkɔu kun bi nìn máń agun ki māntìi túee kubɔ nìn yú. Kudifɔkɔu gbanti poon ní kitiŋee nib bininjab nì binimpoobi nì bitindambi kɔkɔ nìn sáǹ ki kɔ́ ki bál̀. Bi nìn dū kipunyɔkɔ ki pīiǹ ki kpàl̄ bi-ba pu, ní ki nín jɔ́ḿ kudii yilpu laakin bi bɔ̀b̄ee. 52 Abimeeleeki nìn bàn̄ kudifɔkɔuee cee kí jáǹ binib bin sáǹ ki bál̀ ku-poonee, ki sútì ki pìl̄ kudii punyɔkɔki kí bàà sēē-kì ŋŋmi. 53 Niinee ní unimpu ubɔ dū kunaau ki lúkuń ní an dɔ́miń ki tàb̄ ki wīī Abimeeleeki yil. 54 Ní Abimeeleeki yíiń u-tɔntɔnliu unaacimpɔɔn un pá u-boon ki ŋúb́-u tijanjawanee malaa ní ki bí-u yii: «Fúutí a-tàataajiki kí sāā kí kpɔ̀-mi. Maa là bi dāa máafí m-bɔti yii: <Unimpu di nìn kūū-u!>» Niinee ní u-naacimpɔɔŋwuee dū kitàataajiki ki sāā-u ní u kpíì. 55 Isirayeel yab nín ká yii Abimeeleeki kpíìyee ní báà ŋma fātìi nín kùǹ u-dumpu.

56 Míǹ ní Unimbɔti nìn téeǹ Abimeeleeki ikpiti in u nìn ŋá u-baa, ki nìn kūū u-nabiyaamu binib imuŋku ita nì saalaayee. 57 Unimbɔti nìn téeǹ Siikeem yab mun ikpiti in bi mun nìn ŋée, ki nìn yāntì mbusu un ní Yeerubaal jipɔɔn Yootam nìn sòon̄ ki tɔ́ Siikeem yab puee nìn lafun bāań-bi míǹ^e.