Joosuwa Gbɔŋku 8

Isirayeel yab jáń kí fōō Aayi tiŋki

1 Míǹ boonee ní ti-Dindaan tùkū Joosuwa yii: «Taa fàŋkì, kí taa yàntī a-wunti ń yɔ̀tī! Yīkì kí yòon̄ binib bin bàn̄ kí cù kujaauee kɔkɔ ní cùú jáǹ Aayi tiŋki! Á nīn nyí yii m dū Aayi bɔtiu nì u-nib kɔkɔ, nì kitiŋ kin poon u kóòyee, nì kitiŋ kin pu u jīǹ dibeelee kɔkɔ ki ŋá a-ŋaan. 2 Á ŋá Aayi tiŋki nì ki-bɔtiu kii a nín ŋá Jeeriikoo tiŋki nì ki-bɔtiu puee. Ama ni ŋūǹ kí yòon̄ kitiŋ nee kíǹ wanti tin ni jáń ki fōōyee nì ki-waŋkuti. Á lēē bijanjaliibi biba bí cùú nákań kitiŋ boon pú.»

3 Ní Joosuwa bɔ́ntì u nì u-yab bí cùú jáǹ Aayi tiŋki. U dá láá péé ki lēē bibaatandambi kutukub mmuŋku nì saalaa ní bíǹ līntì ki nín cá kunyeeu gbanti. 4 Bi làá búntée ni u bí-bi yii: «Ni káa! Nimbi ń lìntīmaan kí cùú nákań kitiŋee boon pú, kí taa nín̄ dátiǹ-kì tikpil, kí bɔ́ntí ni-ba kí nīn cí. 5 Man nì samaa un kíǹee làá sútí kí pìl̄ kitiŋ. Bi yaa tí nyánní kí jàkà-ti kii bi nín nìn ŋá pu mpeekaamee, ti làá ŋá kii ti sáǹee ní bí páań ti-boon. 6 Ti yaa bíi sáń ní bi yaa kùl̄ ki páaǹ ti-boonee, ní tí ŋmàtiǹ-bi kí dáaĺ-bi kí nyāntí kitiŋin. Bi làá dàkafì yii ti tí bíi sáń-bi, kii bi nín nìn jìn̄-ti ti sáǹ mpeekaam puee. 7 Niinee ní nimbi ń nyānní laakin ní ni náká nákée, kí kɔ́ kí já kí fōō kitiŋee. Ti-Dindaan ni-Nimbɔtiu làá dū-kì kí ŋá ni-ŋaan. 8 Ni yaa jáń ki fōō kitiŋ gbantee, ní sēē-kì ŋŋmi kí wà, kí nóó nì ti-Dindaan nín tùkū-ni yii ní ŋá puee. Man nín yóoǹ-ni yii ní ŋá puee, ní ŋámaan míǹ deedee!» 9 Ní Joosuwa dū-bi ki tú ní bi nín cá ki cūtìi nákáǹ nákáǹ Beeteel nì Aayi timmu kansikin, kí nīn bí Aayi tiŋki ŋwìiń jeetilaŋki pú. Kunyeeu gbantee, Joosuwa nì bijanjaliibi bin kíǹee di nìn kpáfì ki dōoǹ dinaapaal pu.

10 Kutaa wúntì kutaafaau pɔ̀lpɔlee ní Joosuwa yíkì ki yíiń bininjab bin bàn̄ kí cù kujaauee ki kpáfì kí kpèè bi nín bɔ́ntì puee, ní u nì Isirayeel tindaŋkpilib līntì bi-nyɔkɔpu bí cùú jáǹ Aayi tiŋki yab. 11 Míǹ ní u nì bijanjaliibi bin pá u-boonee nín jɔ́ḿ, ki cōom̀ ki tin bàn̄ Aayi tiŋki caŋin. Bi bàn̄ee ní ki gāā dijanjanaapaal Aayi tiŋki ŋgan pú, ní ditantakal bí bi nì Aayi tiŋki kansikin. 12 Ní Joosuwa lēē bijanjaliibi kii kutukub biŋmoo nyɔkɔm ki yóoǹ Beeteel nì Aayi timmu kansikin, ki gítí Aayi tiŋki ŋwìiń jeetilaŋki pú. 13 Míǹ ní bijanjaliibi tikpil nìn gāā dijanjanaapaal Aayi tiŋki ŋgan pú, ní bin kíǹee bíǹ náká náká kitiŋ boon, ŋwìiń jeetilaŋki pú. Kunyeeu gbantee, Joosuwa nìn fātìi gítì ditantakalin. 14 Kutaa wúntì Aayi bɔtiu ká mimmee ní u nì u-yab bɔ́ntì malaa ki nyáń kí cùú jáǹ Isirayeel yab, laakin bi nìn pée tí jáńee, ki gítí Jɔɔdan tantakal watil pú. Ubɔti kaa nìn nyí yii bi nìn píĺ ki cí-u kí jáǹ-u kitiŋ boon pú. 15 Di sá ní Joosuwa nì Isirayeel yab kɔkɔ yāntì Aayi yab kpìlìń-bi, ní bi sáǹ ki túĺ kuteeu watil pú. 16 Bi nìn sāal̀ Aayi tiŋkin ninjab kɔkɔ bí nyā kí jà Isirayeel yab boon. Bi bíi jì-bee ní ki mɔ̀tīi kóò ndandati ki wàatī kitiŋ. 17 Báà uninja kaa nìn kíǹ Aayi nì Beeteel timmun kaa nyáń ki jìn̄ Isirayeel yab boon. Ŋyunti ŋun bi nìn bí ki jì Isirayeel yab mimmee, Aayi tiŋki punyɔkɔki nìn kíǹ ki wāā fám dee. 18 Ní ti-Dindaan bí Joosuwa yii: «Tàntī kikpaŋ kin a ŋúb́ee kí dàkà Aayi tiŋki, kun puee m làá dū kitiŋ gbanti ki ŋá a-ŋaan!» Ní Joosuwa tāntì u-ŋal ki fātì kikpaŋ kin u ŋúb́ee ki túĺ Aayi tiŋki watil pú. 19 U tin lì yii u tàntī u-ŋalee, bijanjaliibi bin u yóoǹ kitiŋ boonee kɔkɔ ŋá malaa ki nyánní laakin bi nìn náká nákée, ki sáǹ ki kɔ́ kitiŋin, ki jáń ki fōō-kì ní ki sēē-kì ŋŋmi niin niin.

20 Aayi yab fātìi kpēē bi-boonee ní ki ká yii bi-tiŋki fōō ŋŋmi, nnyiim yíkí ki-poon jòooo ki jɔ́ḿ kutaa. Bi-pɔbiliŋ bíil̀ bi bākatì kaa ti nyí laakin pú bi làá túĺee. Di sá yii Isirayeel yab bin sáń ki līī nyɔkɔpu ki cá kuteeu watil púee fātìi lábitì ki bíi jì Aayi yab bin pá bi-boon ki jì-bee. 21 Joosuwa nì Isirayeel yab nín ká yii bi-yab bin náká náká kitiŋ boon púee kɔ́ ki jáń ki fōō kitiŋ, ki ká nnyiim nín bí ki nyēē kitiŋ gbanti poon jòooo ki jɔ́ḿ puee, ní bi fātìi lábitì Aayi yab pu ki kíĺ ki bíi kù-bi. 22 Ní Isirayeel yab bin kíǹee nyánní kitiŋin ki nín túŋkiń-bi, ní ki dū Aayi yab ki ŋá kansikin nì kansikin, ki māntìi gíb́-bi. Di sá ní Isirayeel yab kūū ki céetì Aayi yab kɔkɔ múb, báà uniseen kaa ŋúń ki sáǹ ki ŋmátì. 23 Aayi bɔtiu baba ní bi pée cúú kaa kūū, ní ki cáań-u Joosuwa cee. 24 Isirayeel yab nìn kūū Aayi janjaliibi tisatin, kuteeu poon laakin bi páaǹ bi-boonee ki dóò. Bi nìn dū ntàataajimu ki kūū ki kúntì bi-kɔkɔ kaa nìn kíǹ bi-kansikin báà ubɔ. Boonee ní Isirayeel yab fātìi nín gítiń Aayi tiŋkin ní ki dɔ́miń ki púntìi kūū Aayi yab bin kíǹ ki bí kitiŋinee kɔkɔ pílpil. 25 Ŋwiin gbantee, bi nìn kūū Aayi tiŋki yab kɔkɔ, bininjab nì binimpoobi. Bi nìn nyáń binib kutukub saalaa nì bili ní. 26 Joosuwa ŋal nìn pée gbíntìi tèen̄ ki ŋúb́ kikpaŋ ní, ki tin sāā ŋyunti ŋun Isirayeel yab dāa kūū ki céetì Aayi yab kɔkɔee. 27 Ama Isirayeel yab nìn kóoǹ Aayi yab wanti tin bi nìn jáń ki fōōyee kɔkɔ, ní ki yōoǹ ki kpáaǹ tiwaŋkuti, ki nóó nì ti-Dindaan nín nìn tùkū Joosuwa puee. 28 Joosuwa yāntì bi wùn̄ Aayi tiŋki ŋŋmi ní ki-digbuŋŋi wūtì ki kíǹ ki dɔ̄ dikpúkul kii an nín dáá gbíntìi dɔ̄ pu díǹ pu nee ní. 29 U nìn lúntì Aayi bɔtiu úǹ busubu bubɔ pu, ní ki yāntì u lúń míǹ ki tin sāā kujoou. Ŋwìiń cá kí jéetée ní u yāntì bi cúú dinikpilee^a ki sākatìń busubu pu ki cáa lúkú kitiŋ punyɔkɔki nyɔkɔpu, ní ki kóoǹ ataŋkpee ki nyīkiǹ u-pu ní an ŋá ditaŋkpakpukul dikpaandi. Ditaŋkpakpukul gbanti dáá dɔ̄ niin díǹ pu nee.

Bi kàan̄ Unimbɔti marau Eebaal jool pu

30 Niinee ní Joosuwa máń ti-Dindaan, Isirayeel Nimbɔtiu, nsaraafan ŋubɔ Eebaal^b jool pu, 31 ki nóó nì ti-Dindaan tɔntɔnliu Mooyiisi nín nìn yóoǹ Isirayeel yab yii bí ŋá puee, kii an nín ŋmàn̄ ki kā Mooyiisi marab gbɔŋku poon puee. U nìn dū ataŋkpee ŋin bi tōoń kaa kpítì-ŋi, kaa pée dū kukúluu ki gbēēyee ní ki máń nsaraafan gbanti^c. Bi nìn ŋá bisaraawɔkaabi nì mpèé saraabi nsaraafan gbanti pu ki tīī ti-Dindaan. 32 Isirayeel yab nimbiin niin ní Joosuwa dū Mooyiisi Marau un u nìn ŋmàn̄ ki síiǹ Isirayeel yabee ki fātìi dūu ŋmàn̄ ataŋkpee pu^d. 33 Isirayeel yab nìn yú akiti ali bi-nimbiin túĺ Dipoondi dakaau un bi nìn dūu yóoǹ bi-kansikinee. Bi-tindaŋkpilib nì bi-gbaŋŋmaliibi nì bi-bɔsoonliibi nì binicambi bin nìn kóò bi-kansikinee mun nìn yú akiti ali gbanti poon. Dikitil diba nìn yú ki gítí Geerisiim jool pú ní dikitil din kíǹee yú ki gítí Eebaal jool pú. Ti-Dindaan tɔntɔnliu Mooyiisi nìn yóoǹ yii bisaraaŋaliibi ń ŋá míǹ ní kí bìin̄ Isirayeel yab pu^e. 34 Boonee ní Joosuwa kàan̄ tibɔti tin kā Marab gbɔŋkunee kɔkɔ, tin sá dibiindi bɔtee nì tin sá mbusu bɔtee. U nìn kàan̄ tikɔkɔ ki nóó nì bi nín ŋmàn̄-tì pu tì kā Marab gbɔŋku poonee ní. 35 Báà kubɔluu kubɔ kaa nìn kíǹ tin kɔkɔ Mooyiisi yóoǹee poon Joosuwa kaa kàan̄-tì Isirayeel yab kɔkɔ nimbiin, ki kpáaǹ binimpoobi nì mbiyaamu nì binicambi bin kóò bi-kansikinee kɔkɔ nimbiin.