Joosuwa Gbɔŋku 7

Akan yīntì ní ki fōō u-tafadaaldi

1 Isirayeel yab yīntiǹ mara un sá yii bí taa gbēē tiwan tin kpántì ti-Dindaan wantee. Di sá yii Kaarmii jipɔɔn, Sabidii naantiiu nì Seera un sá Juuda naakookunee naantitɔntɔkɔl Akan lēē tiwanee poon tiba. An puee ní ti-Dindaan fōō mbum Isirayeel yab pu.

2 Jeeriikoo tiŋkin niin ní Joosuwa lēē binib ki tú Aayi tiŋki kin bí Beeteel ŋwìiń nyalaŋki pú, ki pìlīǹ Beeti-Aween tiŋkee, bí cù kí cɔ̄ŋkì kí béé kitiŋ gbanti. Ní binibee cūtì ki cɔ́ŋkì ki béè Aayi tiŋki tiŋan. 3 Bi fātìi gítìń Joosuwa ceeyee ní ki tùkū-u yii: «Bijanjaliibi kɔkɔ ń taa yīkì yii bi cá kí já nì Aayi tiŋki kujaau. Bijanjaliibi kutukub bili kii bita ŋūǹ kí cùú já kí fōō-kì. Taa yàntī binib ń gīī digìńdi fám, kun puee binib bin bí kitiŋ gbantinee kaa pée náaǹ báà fiii!» 4 An puee ní bi lēē bijanjaliibi kutukub bita nyɔkɔm ki dūu tú bí cùú jáǹ Aayi tiŋki, ama ní Aayi yab kpìlìń-bi ní bi sáǹ. 5 Aayi yab nìn kpìlìń Isirayeel yab doooo kitiŋ punyɔkɔki nyɔkɔpu, ki jīǹ-bi ki tin bàn̄ Seebariim ní ki kūū bi-kansikin binib mmuŋku nì saalaa nì biluu, ŋyunti ŋun bi bíi wúntí kigbantaŋee. Niinee ní Isirayeel yab pɔbiliŋ bíil̀ tikpil, ní bi-wunti kpíì.

6 Ní Joosuwa nì Isirayeel tindaŋkpilib dáaĺ ki cátì bi-wanti tin bi pēēyee, ki cūtìi dōoǹ ti-Dindaan Poondi dakaau nyɔkɔpu dicincibil. Bi nìn dōoǹ ki tin sāā kujoou, ní ki kàfī ntam ki yàantí bi-yiliŋ pu. 7 Ní Joosuwa bí yii: «Áà, m-Dindaan Unimbɔti! Ba pu ní a cáá-ti ki dūtìń Jɔɔdan buŋŋu ní? A cáań-ti ki ŋá Amɔɔr yab ŋaan bí kpɔ̀ kí céetí-ti níii? Ti yaa bàà pūtì gbíntì Jɔɔdan buŋgbandi lapu pu tiŋki pu, an bàà sɔ́ɔ! 8 Abàa, m-Dindaan! Kɔŋkɔnnee Isirayeel yab nannanliibi nín kpìl̄-bi bi sáǹ nee, m làá nín lì yii ba dee? 9 Kanaan yab nì binib bin kɔkɔ kóò kitiŋ nee puee yaa gbìl̄ tin bí nee, asee bí gbáb́ kí bìin̄ ti-pu ní kí kpɔ̀ kí céetí-ti! Mimmee, mana ní a làá ŋá ní kí yàntī binib ń béé yii a-yindi sá dikpaandi?»

10 Niinee ní ti-Dindaan bí Joosuwa yii: «Yīkìm̄! Ba pu ní a dɔ̄ dicincibil míǹ? 11 Isirayeel yab yīntì! Bi kpītì dipoondi din m pōoǹ-bee, ki lēē tiwan tin baa máaǹ kí gbēēyee poon tiba. Bi yùn̄-tì ki bál̀ bíǹ bi-ba wanti poon. 12 An puee Isirayeel yab kaa làá ti ŋmā kí sútíí pìl̄ bi-nannanliibi. Bi-nannanliibi làá nīn pée sáń ki jì-bi ní, kun puee mbusu kɔ́-bi dikoobil din bi kōotèe pu. Ni yaa kaa nyántì tiwan tin naa máaǹ kí gbēēyee ni-kansikin, maa làá ti nín̄ bí ni-cee! 13 Yīkì kí bɔ́ntí samaa bí nīn bí circir man nì bi ń fu kpāfì. Á tùkù-bi yii bí bɔ́ntí bi-ba kí nīn bí circir kí cīití fool taaku, kun puee man ni-Dindaan Isirayeel Nimbɔtiu nín sòon̄ puee sèé: <Isirayeel yab, tiwan tin naa máaǹ kí gbēēyee tiba bí ni-cee! Ni yaa kaa nyántì tiwan gbanti ni-kansikin, naa làá ti ŋmā kí sútí kí pìl̄ ni-nannanliibi.> 14 An puee, fool kutaafaauee, ni-kɔkɔ ń fu dāan̄ m-cee, kí nīn sútiń kunaakoou kunaakoou. Kunaakoou kun ti-Dindaan yaa fu sāāyee ń fu kpāfì kí nīn sútiń mmaal mmaal. Mmaal ŋun ti-Dindaan yaa fu sāāyee ń fu kpāfì kí nīn sútiń kudicaŋu kudicaŋu. Ní kudicaŋu kun ti-Dindaan yaa fu sāāyee nib ń fu kpāfì kí nīn sútiń ubɔ ubɔ. 15 Unil un an yaa fu sāā yii úǹ di ŋúb́ tiwan tin baa máaǹ kí gbēēyee, bí fu wà udaan ŋŋmi kí kpáaǹ tin pée sá u-wantee kɔkɔ. Kun puee udaan kpītì man ni-Dindaan Poondi ki ŋá icoo bɔti Isirayeel tiŋki poon!»

16 Joosuwa fīntì kutaafaau pɔ̀lpɔlee ní ki yāntì Isirayeel yab kɔkɔ sútìń kunaakoou kunaakoou, ní an sāā Juuda naakooku. 17 Ní u yāntì Juuda naakookun yab sútìń, ki nóó nì bi nín pēē pēē mmaal puee, ní an sāā Seera maaliŋu. Ní Seera maaliŋu yab sútìń kudicaŋu kudicaŋu, ní an sāā Sabidii dicaŋku. 18 U yāntì Sabidii dicaŋkun nib sútìń ubɔ ubɔ, ní an sāā Kaarmii jipɔɔn, Sabidii naantiiu, Seera un sá Juuda naakookunee naantitɔntɔkɔl Akan. 19 Ní Joosuwa bí Akan yii: «M-jipɔɔn, tīī ti-Dindaan Isirayeel Nimbɔtiu tinyool, kí nyɔ̄ŋkì-u. Māafì-mi tin a ŋée kɔkɔ kí taa báĺ-mi báà tiba!» 20 Niinee ní Akan kíí Joosuwa yii: «Tiŋman, man di lafun yīntiǹ ti-Dindaan Isirayeel Nimbɔtiu. An nín jítì puee sɔ̀. 21 M ká tiwan tin ti jáń ki fōōyee poon Siinaar tiŋki bɔkutikpaandi diba, di ŋān̄ kunyaaŋŋu an kaa cáá bí lì, ki ká animbil kúti an nyìm̀ ki bàn̄ kii kiiloobi bita nyɔkɔm, ní ki ká disindaariyakúndi diba, dì nyìm̀ kii kiiloo dijandi nyɔkɔm. Tiwan gbantee kɔ́-mi nnimbitaataam ní m yōoǹ-tì ki cáa bál̀. Min ti kā nee, tì gbìn̄ ki síb́ kitiŋ m-tantiu kansikin, animbil kúti tíĺ taapu.»

22 Ní Joosuwa lēē binib ki tú Akan tantiun. Bi bàn̄ ki lafun kpēēyee tiwan di síb́ kitiŋ tanti kansikin, animbil kúti tíĺ taapuee. 23 Ní bi kóoǹní tiwanee tanti poon ki cáań Joosuwa nì Isirayeel yab kɔkɔ cee, ki dūu bíl̀ ti-Dindaan nimbiin. 24 Niinee ní Joosuwa yāntì bi cúú Seera naantiiu Akan, ki yōoǹ animbil kútee nì dibɔkutikpaandee nì disindaariyakúndee. Bi nìn cúú ki kpáaǹ u-jipɔmbi nì u-bisalib, nì u-naai nì u-mammu nì u-piii nì tin kɔkɔ pée sá u-wantee, ní u nì Isirayeel yab kɔkɔ cáá-bi ki cūnnì Akɔɔr tantakalin. 25 Bi bàn̄ niinee ní Joosuwa bí Akan yii: «Ba pu ní a pàal̄ ŋŋmii ki léeǹ ti-pu míǹ? Too, díǹ wiiŋŋu nee ní ti-Dindaan làá pée gíiǹ-ŋu kí téeǹ-si!» Ní Isirayeel yab kɔkɔ yáŋkì Akan ataŋkpee ki kūū. Bi nìn yáŋkì u-yab mun ataŋkpee ki kūū ní ki wùn̄ u-wanti kɔkɔ ŋŋmi. 26 Boonee ní bi kóoǹ ataŋkpee ki kpúkuǹ bi-pu dikpúkukpaandi. Ditaŋkpakpukul gbanti dáá gbíntìi bí niin díǹ pu nee. An pu ní bi pú mpaan gbanti diyindi yii Akɔɔr tantakal, ki dāa sāā díǹ.

Míǹ boonee ní ti-Dindaan ŋuul sɔ̄ŋkì.