Diteetil Gbɔŋku 30

Ní fàtīí gítiń ti-Dindaan cee

1 Dibiindi nì mbusub bɔti tin m dūu bíl̀ ni-nimbiin nee làá dāá ŋá míǹ. Ti-Dindaan ni-Nimbɔtiu yaa láa yāntì ni yàl̄ ki búntì nnicantimunee, ní dāá dàkafì tibɔti gbanti pu tiŋan. 2 Nimbi nì ni-biyaamu làá fàtīí gítiń ti-Dindaan ni-Nimbɔtiu cee kí nīn kíǹ ki tɔ́-u nì ni-pɔbil kɔkɔ nì ni-naŋki kɔkɔ, kí nóó nì tin kɔkɔ m dūu kpáafì-ni díǹ nee. 3 Ti-Dindaan ni-Nimbɔtiu làá dāá dū ni-gìŋ́ŋi kí kpántí mmɔn. U làá dāá sɔ̄ ni-saai ní kí fàtīí kóoǹní-ni atimbun ŋin kɔkɔ poon ní u nìn yāntì ni yàl̄ ki búntèe kí gíiǹní. 4 Báà ni yaa yàl̄ ki bínní kitiŋ gbeennyɔkɔ, ti-Dindaan ni-Nimbɔtiu làá dāá cù niin kí kóoǹní ni-kɔkɔ kí kpāfì kí fàtīí gíiǹní-ni. 5 U làá dāá fàtīí gíiǹní-ni ni-naanjab tiŋkin, ní ní dāá fōō-kì kí nīn kíǹ ki yì. U làá dāá fàtīí tīī-ni mmɔn ní kí yàntī ní bùtī kí jītíǹ ni-naanjab. 6 Ti-Dindaan ni-Nimbɔtiu làá dāá kpántí ni nì ni-naantiibi pɔbiliŋ, án nín làá ŋá pu ní dāá nīn kíǹ ki néeń-u nì ni-pɔbil kɔkɔ nì ni-naŋki kɔkɔ, kí nīn bí dimaŋfalinee. 7 Ti-Dindaan ni-Nimbɔtiu làá dāá dū mbusub nee kɔkɔ kí tɔ̄ ni-nannanliibi nì bin ná-ni ki sàantí-nee pu. 8 Nimbee, ní dāá fàtīí nīn tɔ́ ti-Dindaan kí nīn ŋúb́ u-marab bin kɔkɔ m tīī-ni díǹ nee. 9 Niinee ní ti-Dindaan ń dāá yàntī án bútí-ni ni-tuuŋŋi kɔkɔ poon tikpil, kí bùtī ni-maaliŋu nì ni-waŋkuti ní kí yàntī ni-kpaajinti ń lòoǹ. Di sá yii án làá dāá fáatíǹ ti-Dindaan ú ŋá-ni tiŋan kii an nín nìn fáatiǹ-u u ŋá ni-naanjab puee. 10 Kí wàatī míǹ ń nín ŋée, asee ní nīn tɔ́ ti-Dindaan ni-Nimbɔtiu kí nīn ŋúb́ u-marab nì u-bɔkpaaŋi ŋin bi ŋmàn̄ ki ŋá marab gbɔŋku nee poonee, ní kí fàtīí gítiń ti-Dindaan cee nì ni-pɔbil kɔkɔ nì ni-naŋki kɔkɔ.

Dinyɔɔbundee dɔ̄ ki kɔ́ĺ-si

11 Marab bin m cáa bíi tìì-ni díǹ nee kaa pɔ̄ɔ̄ tikpil ki jítiǹ ni-pɔŋŋu pu, ní kaa ti bíń laakin naa ŋūǹ kí bèe. 12 Baa bíń yilpu^aní ní lì yii: «Ŋma di làá jɔ̄m̀ yilpu kí nyàab̀-bi kí cáań kí tùkù-ti, án nín làá ŋá pu tí ŋmā kí béé kí ŋá kii bi nín bí yii tí ŋá puee?» 13 Baa tí bí tiŋku gbandi lapu yal ní ní lì yii: «Ŋma di làá dùtī tiŋku kí nyàab̀-bi kí cáań kí tùkù-ti, án nín làá ŋá pu tí ŋmā kí béé kí ŋá kii bi nín bí yii tí ŋá puee?» 14 Aayee, dinyɔɔbundee dɔ̄ ki kɔ́ĺ-ni. Di kā ni-nyɔkɔn ki kā ni-pɔbilin, án nín làá ŋá pu ní ŋmā kí ŋá kii di nín bí yii ní ŋá puee.

Lēē dimaŋfal saŋŋu

15 Kpèèmaan, díǹ nee, m dū dimaŋfal nì nnaam, ŋkúm nì nnaabu ki bíl̀ ni-nimbiin. 16 Mamee, m kpáafí-ni díǹ yii ní nīn néeń ti-Dindaan ni-Nimbɔtiu, kí nīn ŋáań u nín là puee, kí nīn ŋúb́ u-marab nì u-bɔkpaaŋi nì u-koobiliŋ. Ni yaa ŋá mimmee, ni làá nīn bí dimaŋfalin ní kí bùtī, ní ti-Dindaan ni-Nimbɔtiu ń bìin̄ ni-boon kitiŋ kin ni làá kɔ́ kí tin fōō kí nīn kíǹ ki yì nee poon. 17 Ama ni yaa fātì ni-boon ki tīī-u, ní ki yaa kaa pílifiǹ-u ní ki cūtìi bíi gbàantí awaa taapu ki tòotī-ŋee, 18 m tùkū-ni ki gíti bíi tùkù-ni díǹ yii ni làá pée kpú kí céetí ní múb. Naa làá kàl̄ kitiŋ kin poon ni làá dùtī Jɔɔdan buŋŋu kí cùú kɔ́ kí nīn kíǹ ki yì nee kí yúntí.

19 Kutagbɔŋu nì kitiŋ sá-mi biseeradambi díǹ yii m dū dimaŋfal nì ŋkúm, dibiindi nì mbusu ki bíl̀ ni-nimbiin ní lēē. Ama ní lēē dimaŋfal án nín làá ŋá pu ni nì ni-naantiibi ń nīn bí dimaŋfalinee. 20 Nín̄ néeḿmaan ti-Dindaan ni-Nimbɔtiu kí nīn tɔ́-u, kí dū ni-ba kí nákáǹ-u. Míǹ ní ti-Dindaan làá yàntī ní nīn bí dimaŋfalin, ní kí yàntī ní kàl̄ kitiŋ kin poon u nìn pūtì ki pōoǹ ni-naanjab Abraam nì Isaaki nì Jaakɔb yii u làá tīī-bee kí yúntí^b.