Diteetil Gbɔŋku 29

Tin Unimbɔti ŋá ki tīī Isirayeel yabee

1 Mooyiisi nìn kóoǹ Isirayeel yab kɔkɔ ki kpáfì ní ki bí-bi yii:

«Nimbi ni-ba nimbil ká tin ní ti-Dindaan ŋá Faaroo nì u-tɔntɔnliibi nì u-tiŋki Eejipitee kɔkɔ. 2 Nimbi ni-ba nimbil tí ká icɔŋkikpaan in poon u nìn kɔ́ǹ-bee nì maamaacikpaambi bin u ŋá ki dàkā-bee. 3 Ama kí dāá sāā díǹ nee, ti-Dindaan kaa tīī-ni nlandɔkɔ ní dàkafì kí béé, kaa tīī-ni animbil ní wāl̀, kaa tí tīī-ni atafal ní gbìl̄^a.»

4 «M nín yāntì ni cōom̀ abin imuŋku ili kuteeu puee, ni-wampeeŋkaati kaa cátàaa, ni-naatakaŋ ŋin ni tákée mun kaa céetì. 5 An kaa nìn sá kpɔnɔb ní ni ŋmɔ́, kaa ti sá ndamam àá ndaam min pɔ̄ɔ̄yee ní ni nyùn̄^b, ama an sá ní ŋmā kí béé yii man di sá ti-Dindaan ni-Nimbɔtiu. 6 Ŋyunti ŋun ni bāań kitiŋ kin pu ni bí neeyee, ní Asibɔn bɔtiu Siiwɔn nì Baasan bɔtiu Ɔɔgi nyáń kí jáǹ-ti, ama ní ti jáń ki pɔ́ɔkiǹ-bi^c. 7 Ti nìn fōō bi-tiŋki ní ki dūu tīī Rubeen naakookun yab nì Gaadi naakookun yab nì Manasee naakookun yab dijandi, án nīn sá bi-kpaatanti^d. 8 Nín̄ ŋúb́maan dipoondi nee koobiliŋ kí ŋá ŋi nín bí yii ní ŋá puee, ní án bútí-ni ni-tuuŋŋi kɔkɔ poon.»

Unimbɔti poondi bɔti páb́

9 Isirayeel yab, díǹ nee, ni-kɔkɔ kpáfì ti-Dindaan ni-Nimbɔtiu nimbiin, ni nì ni-kpootiliibi nì ni-naakɔti kpilib nì ni-tindaŋkpilib nì ni-bɔsoonliibi, 10 nì ni-biyaamu nì ni-nimpoobi nì binicambi bin kóò ni-pu ki cá-ni idɔ pú àá ki lúù-ni nnyimee. 11 Ni làá kɔ́ ti-Dindaan ni-Nimbɔtiu poondin dee. Dipoondi gbanti ní u bíi pùtī ki pòontí-ni díǹ nee, 12 kí dàkà yii ni sá u-nibul ní u mun sá ni-Nimbɔtiu kii u nín nìn pōoǹ-ni puee. Míǹ ní u nìn pūtì ki pōoǹ ni-naanjab Abraam nì Isaaki nì Jaakɔb mun. 13 An kaa sá nimbi baba ní m bíi pùtī ki pòontí dipoondi nee, 14 ama an sá ki kpáaǹ bin bí doo díǹ ti-Dindaan ti-Nimbɔtiu nimbiinee nì bin mun kaa bí ti-kansikin díǹ nee ní.

15 Nimbi ni-ba nyí ti nín kāl̀ Eejipiti tiŋkin tin jítèe, nì tin ti ká atimbun ŋin poon ti jítèe. 16 Ni nìn ká bi nín nìn ŋáań ntimbiil tuuŋŋi puee nì bi-waaŋi ŋin bi nìn tòotēe. Bi-waaŋi gbanti nìn sá idɔ nì ataŋkpee nì animbil nì sindaariya ní. 17 Bí taa ká ni-kansikin uninja àá unimpu àá kudicaŋu àá tinaakɔti tin bí doo díǹ nee kubɔ nib fātì bi-boon ki tīī ti-Dindaan ti-Nimbɔtiu ki cūtìi bíi tòotī atimbun gbanti waaŋi. Ní nīn nyíǹ ni-ba ubɔ ń taa kpántí kii kisubiki kin cáá tiloolee^e. 18 Ubɔ ń taa nyā ni-kansikin, ŋyunti ŋun ní u gbìl̄ dipoondi nyɔɔbuŋŋi ŋin bi sòon̄ ki pūtì nee, boonee kí gāā u-bindi kí lì yii: «Báà m yaa gbíntìi ŋáań min m lèe, m làá nīn pée bí ŋgbansɔŋfin». Yaa sá fám, unikpiti làá kpú kí kpáaǹ maanyiiba. 19 Ti-Dindaan kaa dāa kíikí kí dūú pɔ̄ udaan, see ú dāá yàntī u-ŋuul ń lítí u-pu ní mbusub bin kɔkɔ bi ŋmàn̄ ki ŋá kugbɔŋu nee poonee ń jēetí u-pu. Ti-Dindaan làá kpìtī udaan yindi kitiŋ pu. 20 Isirayeel naakɔti kɔkɔ poonee, ti-Dindaan làá gàntī udaan u-baba nì u-baba ní kí dū mbusub bin ŋmàn̄ ki kā dipoondi marab gbɔŋku nee poonee kí sìtī u-pu.

Ti-Dindaan nín sòon̄ puee, u làá ŋá míǹ

21 Ni-biyaamu mun làá dāá páanní ni-boonee nì binicambi bin làá dāá nyānní ntimu mun dátèe poon làá dāá ká asaluu un gbáń kitiŋ gbantee nì iween in ti-Dindaan dūu tɔ́ ki-puee ní kí lì yii: 22 «Ŋyaam nì farwata ŋmiŋu wùn̄ kitiŋ gbanti kɔkɔ. Baa ti ŋūǹ kí bɔ̄l̀ tiba ki-pu ní tiba nì tiba mun kaa ti ŋūǹ kí nyā ki-pu, ki kpáaǹ timool gba. Kì kpántì kii Soodoom nì Goomoora nì Adima nì Seebooyiim timmuee ní. Ti-Dindaan nìn fōō mbum tikpil ntimu gbanti pu ní ki nāaǹ-mu^f.» 23 Niinee ní atimbun ŋin kɔkɔ kíǹee nib ń dāá bàlifì yii: «Ba pu ní ti-Dindaan nín ŋá kitiŋ nee míǹ dee? Ba pu ní u fōō mbum míǹ tikpil dee?» 24 Ní bí dāá kíí-bi yii: «Kun pu tin bí nee bāań-bee di sá yii bi fātì bi-boon ki tīī dipoondi din ti-Dindaan, bi-baabi Nimbɔtiu nìn pūtì ki pōoǹ-bi ŋyunti ŋun ní u nìn nyántìń-bi Eejipiti tiŋkinee. 25 Bi cūtìi bíi tòotī awaa ki gbàantí ŋi-taapu. Awaa gbantee, baa nìn nyí-ŋaaa, ti-Dindaan mun kaa nìn pú nsan bí nín tòotī-ŋi. 26 Míǹ pu ní ti-Dindaan gíí kitiŋ gbanti nib pu diŋuul ní ki yāntì mbusub bin kɔkɔ bi ŋmàn̄ kugbɔŋu nee poonee jéetì bi-pu. 27 Ti-Dindaan fōō mbum tikpil bi-pu ki gíí diŋuul ŋkpitim pu ní ki nyántì-bi bi-tiŋkin ki dū-bi ki tɔ́ kinicantiŋ kiban kii an nín bí min díǹ pu nee.»

28 Tin tin bí dibalinee, ti-Dindaan ti-Nimbɔtiu di yì, ama tin nyáń ki pá mpaampiin puee, timbi nì ti-naantiibi di yì kí nīn cáa cá jaanjaan. Tíǹ di sá yii tí nīn ŋúb́ marab nee bɔkpaaŋi kɔkɔ.