Dikàandi Gbɔŋku 25

Isirayeel yab kɔ́ iwaatootin

1 Niinee ní Isirayeel yab dɔ́miń ki bí Siitiim tiŋkin. Ní samaa kíĺ ki bíi ŋáań tilaakpaal nì Moowaab yab sapɔmbi. 2 Moowaab yab sapɔmbi yaa làá nìn tòotī awaayee, bi nìn yíì Isirayeel yab ní bí cù bí tòotī. Bi nìn jīǹ tiwaatootijin, ní ki gbàantí bi-waaŋi nimbiin. 3 Isirayeel yab nìn kíĺ ki bíi tòotī Peewɔɔr waal din bi yíì yii Baalee. Ní ti-Dindaan fōō bi-pu diŋuul. 4 Ti-Dindaan bí Mooyiisi yii: «Á cúú Isirayeel yab kpilib kɔkɔ kí lúntí idɔ pu m-nimbiin bí bíití ŋwìiń, kí wàatī ní m-ŋuul ń nín sɔ̀ŋkì Isirayeel yab pu.» 5 Ní Mooyiisi bí Isirayeel yab yidambi yii: «Ni-kansikin báà ŋma ń kpɔ̀ bin di cūtìi tōotì Peewɔɔr waal din bi yíì Baalee.»

6 Niinee Isirayeel yab ubɔ jítì nì umadiyannimpu ubɔ, Mooyiisi nì u-nabiyaamu Isirayeel yab kɔkɔ nimbiin. Bíǹ nìn bí circir kɔŋkooŋŋu nyɔkɔpu ki sūǹ. 7 Usaraaŋakpil Aarɔn naantiiu Fineeyaasi, Eeleeyasaar jipɔɔn ká mimmee ní ki yíkì samaa kansikin ki yōoǹ u-kpaŋki, 8 ní ki páaǹ uninjee boon ki tin kɔ́ u-tantiun ní ki sāā uisirayeeljee nì unimpuee pooŋi ki kūū-bi. Ní ditafadaaldi gbēeǹ Isirayeel yab kansikin. 9 Binib kutukub mmuŋku nì binaa di nìn kpíì ditafadaaldi gbanti poon^a.

10 Ní ti-Dindaan bí Mooyiisi yii: 11 «Usaraaŋakpil Aarɔn naantiiu Fineeyaasi, Eeleeyasaar jipɔɔn yāntì m-ŋuul sɔ̄ŋkì Isirayeel yab pu, kun puee u yāntì m-poompooŋyi in m ŋáań Isirayeel yab puee kɔ́-u, ní m-ŋuul din m bàà fōō kí kúntí Isirayeel yabee dūu gbēeǹ. 12 Míǹ puee á tùkù-u yii m làá líí-u dipoondi din sá ŋgbansɔŋfi poondee. 13 Dipoondi gbantee sá ki tīī úǹ nì u-naantiibi ní. Á dū-bi kí kpántí bisaraaŋaliibi kí nīn pée cáa cá jaanjaan. Di sá u dàkā yii u dū u-pɔbil kɔkɔ ki tīī man u-Nimbɔtiu, an di yì-tì ní u ŋúń ki nyántì Isirayeel yab bi-kpitii poon.»

14 Bi nìn yíì uisirayeelja un bi nìn kūū nì umadiyannimpuee yii Simrii, ní ki yíì u-baa Saluu. Úǹ nìn sá ukpil ubɔ ní Simeeyɔn naakookun. 15 Ní ki yíì umadiyannimpuee yii Koosbii, ní ki yíì u-baa Suur. U-baa gbanti nìn sá Madiyan naakooku kubɔ yab bɔtiu ní. 16 Ní ti-Dindaan bí Mooyiisi yii: 17 «Ní jáǹ Madiyan yab kí kúntí-bi. 18 Kun puee bi sá ni-nannanliibi ní. Di sá bi ŋá nciin ní ki dī tibɔti tin nìn jítì Peewɔɔr tiŋkinee nì tin nìn jítì Koosbii, niin yab bisal puee ki ŋúń-ni. Koosbii gbanti nìn sá bi-bɔtiu ubɔ bisal ní bi kūū-u Peewɔɔr waal bɔti tafadaaldi yuntiŋu.»

Bi fātìi kàan̄ Isirayeel yab nliliitiim

19 Ditafadaaldi gbanti boonee,