Disaŋkindi 5

Mooyiisi nì Aarɔn cūtìi ká Faaroo

1 Míǹ boonee ní Mooyiisi nì Aarɔn cūtì Faaroo cee, ní ki bí-u yii: «Ti-Dindaan Isirayeel yab Nimbɔtiu bí yii: <Yàntī m-nibul ń cù kuteeu pu kí jī jiŋaal kí tīī-mi tinyool.>» 2 Ní Faaroo kíí-bi yii: «Ŋma di sá ni-Dindaan ní ḿ pīlifì tin u sòoǹee kí yàntī Isirayeel yab ń nīn cá ní? Maa nyí-u kaa làá yàntī Isirayeel yab ń nyā.» 3 Ní Mooyiisi nì Aarɔn bí yii: «Eebru yab Nimbɔtiu lēē u-ba ki dàkā-ti. Míǹ puee pɔ̄-ti nsan tí còom̀ iwiin ita kuteeu pu kí cùú ŋá saraabi kí tīī ti-Dindaan ti-Nimbɔtiu. An yaa kaa ŋá míǹ, u ŋūǹ kí yàntī bìlbil kúm ń dāá kpɔ̀-ti, àá tí kpú kujaaun». 4 Ní Eejipiti yab bɔtiu bí-bi yii: «Mooyiisi nì Aarɔn, ba pu ní ni bí ki sàal̄ ni-yab bí taa ti tɔ̄ ditundi ní? Cùú nīn tūm̀maan ni-tundi.» 5 Ní Faaroo nìkī ki lī yii: «Kɔŋkɔnnee binibee būtì kitiŋ nee puee ní naa ti là bí tɔ̄ bi-tuuŋŋaa!»

Faaroo gíti gbéeǹ Isirayeel yab atuun

6 Yaadal wiiŋŋu ní Faaroo tīī Eejipiti kàliŋkpilib nì Isirayeel yab tɔntɔŋkpilib mara nee yii: 7 «Ní taa ti tīī Isirayeel yab timool bí ŋmàlim̀ titan kí mā brikisib kii ni nín kpààa ŋáań puee. Bí nīn kíǹ ki cá bi-ba ki nyàabìń timool. 8 Ama ní yàntī bí nīn māā brikisib bin nyɔkɔm bi pée kpààa māāyee, ní taa bàtī. Bi sá biwutijoodambi ní, an pu ní bi bí ki lì yii: <Ti là kí cùú ŋá saraabi kí tīī ti-Nimbɔtiu.> 9 Bi yaa dū atuun ki lúuń-bee, baa ti kāntí mpaan kí dàkafì bi-nyimɔmbɔti pu.»

10 Bikàliŋkpilibee nì bitɔntɔŋkpilibee nyáń Faaroo ceeyee ní ki cūtì ki bí Isirayeel yab yii: «Faaroo bí yii bí taa ti tīī-ni timool. 11 Nimbi ni-ba ń cù laakin ni làá kánní-tèe kí nyàabìń, ama taa làá bàtī brikisib bin ni kpààa māāyee nyɔkɔm pu.»

12 Niinee ní Isirayeel yab yàl̄ ki kɔ́ Eejipiti tiŋki kɔkɔn ki kùl̀ timool tin bi làá dūú ŋmàlim̀ kí mā brikisibee. 13 Ní Eejipiti yab tɔntɔŋkpilibee kā bi-pu ki lì yii: «Ní pée mā bi nín nìn cāabìń-ni timool ni māā brikisib bin nyɔkɔmee deedee, ubɔ ń taa fɔ́tí!» 14 Faaroo kàliŋkpilib nìn gbáà ki kpáaǹ Isirayeel yab tɔntɔŋkpilib bin bi lēē bí nīn kpèé bi-nabiyaamuee ki lì yii: «Ba pu ní naa ŋúń ki máń fool nì díǹ brikisib bàn̄ kii dooooyee ni nín kpààa māā puee?»

15 Ní Isirayeel yab tɔntɔŋkpilib bin Eejipiti yab lēē bí nīn kpèé bi-nabiyaamuee dɔ́miń ki bíi yáliŋkí Faaroo cee ki lì yii: «Ti-baa, ba pu ní a bí ki sàantí timbi a-tɔntɔnliibi mimmee? 16 Baa ti tìì-ti timool, ama ní ki là yii tí nīn gbíntìi māā brikisib bin nyɔkɔm ti nìn kpààa māāyee, ní ki gbáà-ti. A-yab bíi ŋáań tin kaa kítèe!» 17 Ní Faaroo kíí-bi yii: «Biwutijoodambi, ni sá biwutijoodambi ní! An pu ní ni lì yii: <Ti làá cùú ŋá saraabi kí tīī ti-Dindaan.> 18 Kɔŋkɔnnee, cùú nīn tūm̀maan ditundi. Baa làá ti tīī-ni timool, ama ni làá nīn gbíntìi māā brikisib bin nyɔkɔm ni nìn kpààa pée māāyee ní.»

19 Isirayeel yab tɔntɔŋkpilib bin bi nìn lēē bí nīn kpèé bi-nabiyaamuee ká yii laakin bi bí nee an pɔ́ɔkiǹ-bi, kun puee bi nìn bí-bi yii: «Ní taa bàtī brikisib bin ni kpààa māā ŋwiin kamaayee nyɔkɔm pu.» 20 Bi nyáń Faaroo ceeyee ní ki cūtìi ká Mooyiisi nì Aarɔn, bíǹ yú ki cí-bi. 21 Bi nìn nyáń Mooyiisi nì Aarɔn pu ki bí-bi yii: «Ti-Dindaan di wāĺ tin ni ŋá nee kí sòoǹ ni-bɔti! Ni yāntì Faaroo nì u-yab kaa ti là bi-nimbiliŋ ń wāl̀-ti. Ni ŋman dū kitàataajiki ní ki ŋá bi-ŋaan bí fōō kí kpɔ̀-ti.»

22 Niinee ní Mooyiisi fātì ti-Dindaan pú ki bí-u yii: «M-Dindaan, ba pu ní a ŋá samaa nee tikpitil míǹ? Ba pu ní a nín túnní man dee? 23 Doooo m nín cūtì Faaroo cee ki sòon̄ a-yil puee, úǹ bí ki sàantí Isirayeel yab ní, ní sii kaa pée ŋá tiba kí fīī a-nibul.»