Disaŋkindi 4

Unimbɔti lēē u-pɔŋŋu ki dàkā Mooyiisi

1 Ní Mooyiisi kíí ti-Dindaan yii: «Isirayeel yab kaa làá fōō ki kíí kaa làá pīlifiǹ-mi. Ama bi làá tùkù-mi yii: <Ti-Dindaan ubɔ kaa pée nyántì u-ba ki dàkā-si!>» 2 Ní ti-Dindaan bí-u yii: «Ba ní a ŋúb́ a-ŋaan ní?» Ní u bí yii: «An sá ŋkpandɔ.» 3 Ní ti-Dindaan bí yii: «Dū-ŋu kí lúkú kitiŋ.» Ní u dūu lúkú kitiŋ ní an kpántì ukoobu, ní Mooyiisi sáǹ ki wāatì-u. 4 Ní ti-Dindaan bí Mooyiisi yii: «Tàntī a-ŋal kí cúú u-juul.» U tāntì u-ŋal ki cúúyee ní an fātìi kpántì ŋkpandɔ u-ŋaan.

5 Ní ti-Dindaan bí Mooyiisi yii: «A nín làá ŋá tin kí dàkà Isirayeel yab yii man bi-naanjab Nimbɔtiu, Abraam Nimbɔtiu nì Isaaki Nimbɔtiu nì Jaakɔb Nimbɔtiu nyántì u-ba ki dàkā-see dee.» 6 Ní ti-Dindaan gíti bí-u yii: «Dū a-ŋal kí páań a-bindi pu.» Ní u dūu páaǹ, ni ki fātìi cúu páatì, ní dinyaŋgbandi píń u-ŋal ní ŋu píil̀ káŋkaŋ. 7 Ní ti-Dindaan bí-u yii: «Fàtīí gíiǹ a-ŋal kí páań a-bindi pu.» Ní u fātìi gíiǹ ki páaǹ, ní ki fātìi cúu páatì ní ŋu fātìi gítì kii ŋu nín nìn pée bí puee. 8 Ní ti-Dindaan bí-u yii: «Isirayeel yab yaa kaa fōō-si ki kíí kaa pílifiǹ-si maamaaci daaŋku kupeepeekaau puee, bi làá fōō-si kí kíí maamaaci daaŋku kuliliitiiu nee pu. 9 Bi yaa kaa fōō-si ki kíí kaa pílifiǹ-si maamaaci daanti tili nee puee, á jōō Niil mɔɔl nyim kí kpáatí kí fá kitiŋ, nnyim min a kpáatì ki fá kitiŋee làá kpántí fatiku.»

Unimbɔti lēē Aarɔn ú nīn sá Mooyiisi taapu yɔu

10 Ní Mooyiisi bí ti-Dindaan yii: «Áù ti-Dindaan, man sá unil un kaa ŋūǹ isoonee ní. An kaa sá díǹ kaa sá fool bɔti, ní doooo a nín pée kíĺ ki bíi sòoǹ nì man a-tɔntɔnliu nee, tiba kaa kpántì. An pɔ̄ɔ̄ ki tīī-mi ḿ ŋmā kí sòoǹ cábcab.» 11 Ní ti-Dindaan bí yii: «Ŋma di náań kinyɔkɔ ki tīī unil? Ŋma di yàntī unil ń nīn sá umɔɔmiin àá utafakpaafu àá ujɔfu àá un wāĺee. Kaa sá man ni-Dindaanaaa? 12 Míǹ puee, nín̄ cá, man làá nīn bí a-cee kí yábití a-nyɔkɔ kí dàkà-si tin a làá sòoǹee.» 13 Ní Mooyiisi fātìi bí yii: «Ti-Dindaan, m gbāam̀-si, tɔ̄ ubɔ!»

14 Niinee ti-Dindaan fōō Mooyiisi pu diŋuul ní ki bí-u yii: «A-nabiki Aarɔn uleefiija kaa báaa? M nyí u-pu yii u ŋūǹ ki sòoǹ cábcab. Úǹ gba di dòoń a-cee nee. U yaa bāań ki ká-see, án làá mɔ̄ɔkiǹ-u tikpil. 15 Á sòoǹ nì u, kí dàkà-u tibɔti tin u máaǹ kí sòoǹee. Man làá nīn bí a-cee, ki làá nīn bí u mun cee ŋyunti ŋun ni yaa bíi sòoǹee, ní kí dàkà-ni tin sá ní ŋée. 16 Aarɔn di làá nīn sòoǹ nì samaa sii yil pu. Úǹ di làá nīn sá a-nyɔkɔ ní sii ń nīn sá kii unimbɔtee ki tùkù tin u máaǹ kí sòoǹee. 17 Yòon̄ ŋkpandɔ nee kí ŋá a-ŋaan, ŋúǹ ní a làá nīn cáa ŋáań maamaaci daanti.»

Mooyiisi fātìi nín gítí Eejipiti u-samaau cee

18 Mooyiisi fātì mmɔŋkee ní ki tùkū u-coo Jeetroo yii: «M làá mèè-si nsan kí fàtī Eejipiti m-nabiyaamu Eebru yab cee kí kpèè yii bi dáá gbíntìi bí dimaŋfalinaaa.» Ní Jeetroo kíí-u yii: «Nín̄ cá nì ŋgbansɔŋfi!»

19 Ti-Dindaan sòon̄ nì Mooyiisi Madiyan tiŋkin yii: «Nín̄ gítí Eejipiti, kun puee bin kɔkɔ nìn nyàab̀ kí kpɔ̀-see kpíì.» 20 Niinee Mooyiisi yōoǹ u-nimpuu nì u-jipɔmbi ki kāaǹ mmamu pu ní bi búntì Eejipiti. U nìn ŋúb́ ŋkpandɔ ŋun Unimbɔti nìn bí yii ú yòon̄ee u-ŋaan. 21 Ti-Dindaan nìn tùkū Mooyiisi yii: «A yaa gítì Eejipitee, atuŋkpaan ŋin kɔkɔ m tīī-si mpɔn á ŋée, á ŋá-ŋi Faaroo nimbiin. Ama man làá pɔ̄ɔkì u-pɔbil ú taa yàntī Isirayeel yab ń nyā. 22 Á tùkù Faaroo yii ti-Dindaan nín lī puee sèé: <Isirayeel yab sá kii m-jipɔŋkpiliuee ní. 23 An puee m tùkū-si yii á yàntī m-jipɔɔn ú cù kí ŋá saraabi kí jāam̀-mi. A yaa yíì kaa yāntì u cūtèe, m làá kpɔ̀ a-jipɔŋkpiliu^a.>»

24 Bi bí nsan pu ki cá ki bàn̄ laabee kunyeeu mɔ́. Bi gbíntì niin ki dōoǹ kunicandiin, ní ti-Dindaan dɔ́miń ki là kí kpɔ̀ Mooyiisi. 25 Ní Siipoora yōoǹ kitaŋkpajiki ki gíí u-jipɔɔn kunlam ní ki dūu gbēē Mooyiisi taal^b, ní ki bí yii: «M-cal sá-si nì fatiku cati ní.» 26 Niinee ní ti-Dindaan yāntì Mooyiisi kaa kūū-u. Di sá digiil pu ní Siipoora nìn lī yii: «M-cal sá-si nì fatiku cati ní.» 27 Ti-Dindaan bí Aarɔn yii: «Nín̄ cá kuteeun kí tūŋkì Mooyiisi.» Ní Aarɔn yíkìi búntì ní ki tin tú-u Unimbɔti jool taapu ní ki kpàl̄-u bi jáam̀. 28 Ní Mooyiisi máafì-u ti-Dindaan nín dū tibɔti tin ki ŋúbiǹ-uee, nì maamaaci daanti tin u tīī-u ú nīn ŋáańee. 29 Ní bi-liitil nóó ki búntì ki cūtìi kpáfì Isirayeel yab kpilib kɔkɔ. 30 Ní Aarɔn máafì samaa kɔkɔ tibɔti tin ti-Dindaan tùkū Mooyiisee, ní Mooyiisi ŋá maamaaci daanti bi-nimbiin. 31 Isirayeel yab nìn fōō ki kíí. Bi nìn béè yii ti-Dindaan ká falaa un poon bi bée ní ki làá fīī-bi. Niinee ní bi-kɔkɔ gbāaǹ taapu ki bíi jáaḿ-u.