Dinyeel 35

Jaakɔb yíkì Siikeem tiŋkin ki búntì Beeteel

1 Dalbee ní Unimbɔti bí Jaakɔb yii: «Yīkì doo kí nīn jɔ́ḿ Beeteel kí cùú nīn kóò niin. Á mā nsaraafan laakin m nìn nyántì m-ba ki dàkā-si ŋyunti ŋun a nìn sáń a-maan Eesayuuyee.»

2 Ní Jaakɔb bí u-dicaŋku yab nì bin kɔkɔ bí u-ceeyee yii: «Nyāntímaan awaa ŋin bí ni-ceeyee, kí ŋá ni-ba circir kí kpántí ni-wampeeŋkaati. 3 Tí yīkìmaan kí cù Beeteel. Ti yaa bàn̄ niinee, m làá mā nsaraafan kí tīī Unimbɔti un un fōō m-wimmeem ŋyunti ŋun m nìn bí dinimbinaamandi poon ní ki céeǹ-mi m-saŋkiŋŋi kɔkɔ poonee.» 4 Niinee ní bi nyántì awaa ŋin bí bi-ceeyee, ki túutì bi-falfatib ki tīī Jaakɔb ní u cáa gbìn̄ ki síb́ teereebinti^a subu bun yú ki pìlīǹ Siikeem tiŋkee taapu. 5 Bi yíkèe ní Unimbɔti yāntì dinyoondi kɔ́ ntimu mun kɔkɔ māntì ki tú-bee, ní báà ubɔ kaa mākaǹ kí jà bi-boon.

6 Ní Jaakɔb nì u-nipaaku dūu bàn̄ Luusi, an dàkà yii Beeteel, Kanaan tiŋkin. 7 Ní u máń nsaraafan ní ki pú niin diyindi yii Eel-Beeteel, taapu di sá yii: <Beeteel Nimbɔtiu>, kun puee niin ní Unimbɔti nìn nyántì u-ba ki dàkā-u ŋyunti ŋun u nìn sáń u-maan Eesayuuyee.

8 Niin ní Deeboora un nìn lōō Reebeekee kpíì ní bi síb́-u seeni^b subu bun yú ki pìlīǹ Beeteelee taapu. Ní Jaakɔb pú busubu gbanti diyindi yii <Nsiim subu.>

9 Jaakɔb nín nyáń Padan-Aram ki bàn̄ Beeteelee, Unimbɔti nìn gíti nyántì u-ba ki dàkā-u ní ki bīiǹ u-boon. 10 Ní Unimbɔti bí-u yii: «Bi yíì-si Jaakɔb ní, ama baa làá nīn gíti yíì-si míǹ. Bi làá nīn kíǹ ki yíì-si yii Isirayeel ní.» Di sá Unimbɔti pú-u diyindi yii Isirayeel. 11 Ní Unimbɔti gíti bí-u yii: «Man di sá Unimbɔti Mpɔŋkɔdaan. M làá bùtī a-maaliŋu tikpil tikpil. Sii maaliŋu poon ní atimbun làá nyā. A-maaliŋu poon ní bibɔtiibi làá nyā. 12 Kitiŋ kin m nìn tīī Abraam nì Isaakee, m làá dū-kì kí tīī sii nì a-naantiibi bin làá páanní boonee.»

13 Unimbɔti sòon̄ nì u míǹ ki dóòyee ní ki yíkì niin ki nín jɔ́ḿ. 14 Ní Jaakɔb dū ditaŋkpal ki cóoǹ laakin Unimbɔti sòon̄ nì uee, ní ki dū ndamam nì ŋkpam ki fá di-pu án nīn sá kudaaŋŋu. 15 Ní Jaakɔb pú mpaan ŋun pu Unimbɔti nìn sòon̄ nì uee yii Beeteel.

Beenjameen màaltam nì u-na Raseel kúm

16 Jaakɔb nì u-dicaŋku yíkì Beeteel. Bi cá ki tóob́ Eefiraata tiŋkee ní Raseel màl̄. U-maaliŋu gbanti nìn pɔ́ɔkì tikpil. 17 Ŋyunti ŋun u bíi yáliŋkí imatiŋween ki làá màal̀ee ní umatimmaanli bí-u yii: «Pɔ́ɔǹ a-ba, kibininjabiki ní a làá gíti màal̀.» 18 Ŋyunti ŋun u bíi dátí u-ba kí sìntēe ní u pú kibiki kin u màl̄ee diyindi yii Been-Oonii, taapu di sá yii: <M-falaau biki.> Ama ní ki-baa yíiń-kì yii Beenjameen, taapu di sá yii: <M-ŋaŋgiil pu biki^c.> 19 Raseel kpíìyee ní bi síb́-u Eefiraata dandi kpaanceetiŋu. Kitiŋ gbanti ní bi gíti yíì yii Beetileem. 20 Ní Jaakɔb dū ditaŋkpal ki cóoǹ dikaakul pu án nīn sá Raseel kaakul daaŋku. Di bí ki dāa sāā díǹ.

21 Isirayeel yíkì niinee ní ki cūtìi gāā u-tantib Miigidaal-Eedeer tiŋki nyɔkɔpu. 22 Ŋyunti ŋun Isirayeel nìn kóò kitiŋ gbantinee ní u-jipɔɔn Rubeen dōoǹ nì u-nimpuwaaki Biila, ní u-baa gbìl̄.

Jaakɔb jipɔmbi nìn sá saalaa nì bili ní. 23 Leeya jipɔmbi di sá Rubeen un sá Jaakɔb jipɔŋkpiliuee, nì Simeeyɔn nì Leefii nì Juuda nì Isakaar nì Sabulɔn. 24 Ní Raseel jipɔmbi sá Jooseefi nì Beenjameen. 25 Raseel yumbusapɔɔŋwu Biila jipɔmbi di sá Daani nì Neefitalii. 26 Ní Leeya yumbusapɔɔŋwu Siilpa jipɔmbi sá Gaadi nì Aseer. Jaakɔb jipɔmbi bin u nìn màl̄ Padan-Aram tiŋkinee dee.

27 Jaakɔb nìn bàn̄ u-baa Isaaki cee Mamiree, Kiiriyati-Ariba tiŋkin. Niin ní bi gíti yíì yii Eebrɔn. Abraam nì Isaaki nìn kāl̀ kitiŋ gbantin. 28 Isaaki biŋŋi ŋin u ŋá ki nín kpíìyee sá abin dilaataal nì imuŋku inaa. 29 U nìn púĺ ki kāl̀ ki bál̀ ní ki nín kpíì ki cūtìi ŋàl̄ u-naanjab. Ní u-jipɔmbi Eesayuu nì Jaakɔb síb́-u.