Dinyeel 34

Simeeyɔn nì Leefii tɔ̀n̄ bi-niisal Diina pɔntooŋyi

1 Dalbee, Jaakɔb bisal Diina un Leeya màl̄ee cūtì kí màntì kitiŋ kin poon bi nìn kóòyee sapɔmbi pu. 2 Ní Amɔɔr un sá Eefi tiŋki bɔtiuee jipɔɔn Siikeem ká-u ní ki cúú-u mpɔn ki dōoǹ nì u ki bíil̀-u. 3 An ŋá mimmee ní u-naŋki kɔ́ Jaakɔb bisal Diina tikpil ki jíń mpaan u-pɔbilin. Di sá u nìn bíi sòoǹ nì usapɔɔnee kí gíiǹní u-landɔkɔŋu u-cee. 4 Ní Siikeem bí u-baa Amɔɔr yii: «Cùú mɔ̀nnì usapɔɔn nee kí tīī-mi, m là kí cáá-u.» 5 Jaakɔb gbìl̄ yii Siikeem dōoǹ nì u-bisal Diina ki bíil̀-u, ama waa nìn lī tiba, di sá yii u-jipɔmbi nìn dáá bíń tisatin kunaakpaau ní u nìn cí yii bí bàń. 6 Siikeem baa Amɔɔr nìn cūtì ki ká Jaakɔb ki sòon̄ nì u an bɔti. 7 Jaakɔb jipɔmbi nín nyánní tisatin ki bāań ki gbìl̄ tin jítèe ní an wùn̄-bi tikpil ní bi fōō diŋuul tiŋan pu. Di sá yii Siikeem nín dōoǹ nì Jaakɔb bisalee, an sá disiibikpaandi ní Isirayeel yab cee, ki sá-bi dikoobikpaandi. 8 Ní Amɔɔr bí-bi yii: «Ni-bisal Diina kɔ́ m-jipɔɔn Siikeem tikpil, an puee m gbāam̀-ni, ní dū-u kí tīī-u ú cáá. 9 Tí kɔ́maan tɔbin, nimbi ń nīn tìì-ti ni-sapɔmbi ti cāab̀, ti mun ń nīn tìì-ni ti-yab ni cāab̀. 10 Ní gbíntí kí nīn kā ti-cee, ní ti-tiŋki ń kpántí ni-yaka ní nīn kóò, kí nīn tɔ́ ni-ba kí bàntì kí kpántí bitindambi.»

11 Ní Siikeem u-ba mun lī Diina baa nì u-niijab cee yii: «Ní pée kpèè kí pɔ̄-mi diyimɔɔl ḿ ŋmā kí cáá Diina, báà kun ní ni yaa lèe m làá tīī-ni. 12 Gíímaan-mi kucootiiu nì tinimpucaŋwan pɔndi tikpil ḿ pà. M làá tīī-ni tin ni lèe kɔkɔ. Tin pée páb́ee di sá ní dū usapɔɔn kí tīī-mi ḿ cáá.» 13 Ní Jaakɔb jipɔmbi kíí Amɔɔr nì u-jipɔɔn Siikeem nì iciin poon, kun puee u nìn dōoǹ nì bi-niisal Diina ki bíil̀-u. 14 Bi kíí-bi yii: «An kaa ŋáań míǹ! Taa ŋūǹ kí dū ti-niisal kí tīī un kaa gíí dikpancandee ticati, an sá-ti icoo ní. 15 Kí wàatī tí gbìl̄ kí tīī nì nee, asee ní yàntī bin kɔkɔ sá bininjab ni-kansikinee ń gīfì akpancan kii timbi nín gíí puee. 16 Mimmee ti ŋūǹ kí tīī-ni ti-sapɔmbi ní cáá, ní ti mun ń cáá ni-yab, ní tí gbíntí ni-tiŋkin ní ti-kɔkɔ ń kpāfì kí ŋá kitimbaantii nib. 17 Ama ni yaa yíì yii naa làá gīfèe, ti làá fōō ti-niisal ní kí yīkì.»

18 Bi nín sòon̄ puee fáatì Amɔɔr nì u-jipɔɔn Siikeem. 19 Unaacimpɔɔnee nín nìn néeń Jaakɔb bisal tikpil puee yāntì u kíĺ ki bíi ŋáań tin bi bālifì yii ú ŋée malaa. U-baa dicaŋku poonee, úǹ ní bi nìn pée tɔ́ ki jítiǹ báà ŋma. 20 Ní Amɔɔr nì u-jipɔɔn Siikeem cūtìi kāl̀ bi-tiŋki punyɔkɔki^a caŋin ní ki tùkū bi-tiŋki nib yii: 21 «Binib nee cáá ti-pu nlandɔkɔmɔnti. Kitiŋ dɔ̄ ki wāā ki tīī-bi bí kàl̄ kí bàntì. Ti ŋūǹ kí cáá bi-bisalib, ní ti mun ŋūǹ kí dū ti-bisalib kí pɔ̄-bi ticati. 22 Kí wàatī bí kíí kí nīn kā ti-tiŋki pu ti-kɔkɔ ń kpántí kitimbaantii nibee, asee tí yàntī bin kɔkɔ sá bininjab ti-kansikinee ń gīfì akpancan kii bíǹ nín gíí puee. 23 Ti yaa gbìl̄ ki tīī nì bi bí nīn kóò ti-ceeyee, bi-waŋkuti kɔkɔ nì bi-gaajati kaa kpántì ti-yati deeee?» 24 Bin kɔkɔ nìn bí niinee fōō tibɔti tin Amɔɔr nì u-jipɔɔn Siikeem cáańee ki kíí, ní kitiŋ poon bininjab kɔkɔ gífì akpancan.

25 Bi gífì míǹ iwiin ita dal ŋyunti ŋun bi dáá kā iween puee ní Jaakɔb jipɔmbi bili, Simeeyɔn nì Leefii bin sá Diina niijabee yōoǹ bi-tàataajimmu ki ŋá soooo ki kɔ́ kitiŋin ubɔ kaa béè ní ki kūū bininjab kɔkɔ. 26 Bi nìn kūū ki kpáaǹ Amɔɔr nì u-jipɔɔn Siikeem ní ki nyántì bi-niisal Diina Siikeem dumpu ki kpáaǹ-u ki nín kùǹ.

27 Ní Jaakɔb jipɔmbee kɔ́ kitiŋin ki fúkúl̀ anikpilee wanti ní ki kóoǹ bi-wanti kɔkɔ, kun puee bi bíil̀ bi-niisal. 28 Bi nìn cúú bi-piii nì bi-ŋoobui nì bi-naai nì bi-mammu nì tin kɔkɔ nìn pée bí kitiŋ poon nì tisatinee. 29 Bi nìn kóoǹ bi-gaajati kɔkɔ pílpil ki kpáaǹ bi-nimpoobi nì bi-biyaamu nì tin kɔkɔ nìn pée bí bi-diiŋŋinee.

30 Ní Jaakɔb bí Simeeyɔn nì Leefii yii: «Ni kɔ́ǹ-mi tibɔtin! Ni náań kudɔ̀ŋu ki bíl̀ man nì kitiŋ nee nib kansikin ní nee, an dàkà yii Kanaan yab nì Peeriisi yab. Man nib kaa náaǹ. Bíǹ ŋūǹ kí kpāfì kí dāá jáǹ-mi ní kí kúntí m-dicaŋku kɔkɔ.» 31 Ní bi kíí bi-baa yii: «Mimmee bi cáá nsan kí bíil̀ ti-niisal kii kilaakpaayeeee?»