Dinyeel 30

1 Raseel nín ká yii waa bíi màal̀ Jaakɔb mbiyaamuee, ní u kíǹ ki ŋáań u-maan ipoompoon, ní ki bí Jaakɔb yii: «Yàntī ḿ màal̀, an yaa kaa sá míǹ m làá kpú.» 2 Ní Jaakɔb fōō u-pu diŋuul ní ki bí yii: «Man di sá Unimbɔti un kaa dū mmaal ki ŋá a-poon á nīn màal̀eeee?» 3 Niinee ní Raseel bí Jaakɔb yii: «Kpèè, m-yumbusapɔɔŋwu Biila sɔ̀. Dū-u kí kpántí a-nimpuu ú màal̀ kí tīī-mi, ní u-puee ma mun ń ká kibiki.» 4 U lī mimmee ní ki dū Biila ki tīī Jaakɔb ní úǹ lafun dū-u ki kpántì u-nimpuu.

5 Ní Biila cáá dipool ní ki màl̄ Jaakɔb kibininjabiki. 6 Ní Raseel bí yii: «Unimbɔti pílifiǹ-mi, ki pɔ̀n̄-mi ki tīī-mi kibininjabiki.» An pu ní u pú-kì diyindi yii Daani, taapu di sá yii: «U pɔ̀n̄-mi.»

7 Ní Biila gíti cáá dipool ní ki màl̄ Jaakɔb kibininjabiki kililiitii. 8 Ní Raseel bí yii: «M mɔ̀n̄ nì m-maan Unimbɔti nimbiin ki pɔ́ɔkiǹ-u.» Ní ki pú-kì diyindi yii Neefitalii, taapu di sá yii <M-mool.>

9 Leeya mun kpēē yii waa ti bíi màal̀ee, ní u dū u-yumbusapɔɔŋwu Siilpa ki tīī Jaakɔb ú dūú kpántí u-nimpuu. 10 Ní Leeya yumbusapɔɔŋwu Siilpa màl̄ Jaakɔb kibininjabiki. 11 Ní Leeya bí yii: «Ba yimɔɔl bulifi ní m nín ká nan dee!» Ní ki pú-kì diyindi yii Gaadi, taapu di sá yii <Diyimɔɔl.>

12 Ní Leeya yumbusapɔɔŋwu Siilpa fātìi màl̄ Jaakɔb kibininjabiki kililiitii. 13 Ní Leeya bí yii: «Ba mɔŋŋu bulifi poon ní m bí nee! Bisapɔmbi làá dāá yíiń-mi yii mmɔn daan.» Ní ki pú-kì diyindi yii Aseer, taapu di sá yii <Mmɔndaan.>

14 Ŋyunti ŋun bi cēē tijimpinee, Rubeen cūtì dalba kusaau ní ki ká kufaapibiku kun bi yíì yii mandragɔɔree biliŋ ní ki kītìń ki cáań ki tīī u-na Leeya. Ní Raseel bí Leeya yii: «M gbāam̀-si, lēē mandragɔɔr biliŋ ŋin a-jipɔɔn cáań-see kí tīī-maa^a!» 15 Ní Leeya kíí-u yii: «A fōō m-calee, an kaa yá ki kɔ́-si ní a gíti là kí fōō m-jipɔɔn mun mandragɔɔr biliŋ kí kūtàaa?» Ní Raseel bí yii: «An yaa sée, tí kpántí. Á lēē mandragɔɔr biliŋ ŋin a-jipɔɔn cáań-see kí tīī-mi, uninja ń dòon̄ a mun cee díǹ nyeeku!»

16 Kujoou Jaakɔb nyánní kusaau ki kùnnée ní Leeya túŋkì-u nsanni ní ki bí-u yii: «Man cee ní a làá dòon̄ díǹ. Kí ŋmā kí ká-si á dòon̄ m-ceeyee, m-jipɔɔn mandragɔɔr biliŋ ní m dūu pàn̄ m-yɔnti.» Ní Jaakɔb lafun dōoǹ u-cee kunyeeu gbanti. 17 Ní Unimbɔti fōō Leeya wimmeem ní u cáá dipool ki màl̄ Jaakɔb kibininjabiki kiŋmooŋmootii. 18 Ní Leeya bí yii: «Unimbɔti pàn̄-mi m nín dū m-yumbusapɔɔŋwu ki tīī m-cal u dūu kpántì u-nimpuuee pu.» Ní u pú-kì diyindi yii Isakaar, taapu di sá yii <M-paati.>

19 Ní Leeya fātìi tí cáá dipool ki màl̄ Jaakɔb kibininjabiki kiluluutii. 20 Niinee ní Leeya bí yii: «Unimbɔti pú-mi dipɔl dimɔntiil. Min bí nee, m-cal làá tīī-mi m-nyooti, kun puee m màl̄-u mbininjabiyaamu muluu dee.» Míǹ puee ní u pú kibikee diyindi yii Sabulɔn, taapu di sá yii <Tinyool.> 21 Boonee ní u màl̄ kibinimpubiki ní ki pú-kì diyindi yii Diina.

22 Unimbɔti kaa nìn súntì Raseel pu. U nìn fōō u-wimmeem ki pīitì u-maaliŋu. 23 Ní Raseel cáá dipool ki màl̄ kibininjabiki ní ki bí yii: «Unimbɔti lēē m-pu icoo.» 24 Ní u pú-kì diyindi yii Jooseefi ki lī yii: «Ti-Dindaan ń gíti kūtì-mi kibininjabiki kiba!»

Jaakɔb kpántì ugaaja

25 Raseel nín màl̄ Jooseefi boonee ní Jaakɔb bí Laaban yii: «Pɔ̄-mi nsan ḿ fàtīí nīn kùǹ m-tiŋkin. 26 Dū m-biyaamu nì m-nimpoobi bin pu m túń-si ditundee kí tīī-mi ḿ nīn cá, di sá yii sii a-ba nyí ditundi din bulifi m túń ki tīī-see.» 27 Ní Laaban bí-u yii: «M gbāam̀-si, á taa yīkì míǹ. An dàkā-mi yii sii pu ní ti-Dindaan bīiǹ m-boon. 28 An puee gíí-mi tipaal tin a là ḿ pà-see, m làá pà-si.» 29 Ní Jaakɔb bí-u yii: «Sii a-ba nyí m nín túń ditundi din ki tīī-see nì m nín ŋúb́ a-waŋkuti tì būtì miŋyee. 30 Di sá yii kí wàatī ḿ bàńee, tin a nìn cááyee kaa nìn náaǹ báà fiii. Ama kí yòon̄ ŋwiin ŋun m-taal tāā a-dumpuee, a-wanti wíiǹ tikpil ní ti-Dindaan bīiǹ a-boon. Too, kɔŋkɔnnee ŋyunti ŋulɔŋu ní man làá gíti dūú tɔ̄ ditundi kí ká tin làá ŋmàntī ḿ kpèè m-dicaŋkuee?» 31 Ní Laaban bí-u yii: «Ba ní m máaǹ kí tīī-si ní?» Ní Jaakɔb bí yii: «Taa pée tīī-mi tiba. Ama a yaa kíí kí ŋá min m làá màkā-si neeyee, m làá gíti kpàà a-waŋkuti. 32 Díǹ nee, m làá yìiǹ tipicaŋkpun nì tiŋɔcaŋkpun poon kí gàntī ipii in cáá atan atanee nì in bɔ̀ǹee, ní kí gàntī iŋoobu in mun cáá atan atanee, án di làá nīn sá man paati. 33 Fool boon a yaa láa dɔ́miń ki kpēē m-paati ní ki yaa láa ká iŋoobu kansikin in kaa cáá atanee nì ipii kansikin in kaa bɔ̀ǹee, mimmee m yùn̄ dee, maa cáá mbaamɔn.» 34 Ní Laaban kíí-u yii: «An ŋān̄, a nín lī puee, án ŋá míǹ.»

35 Yaadal yaadal ní Laaban lútì iŋɔjaa nì iŋɔsal in cáá atan atanee, an dàkà yii in kɔkɔ pée cáá mpimee, nì ipibɔn ki dūu tīī u-jipɔmbi. 36 U nìn yāntì bi cáá-i ki búntì ndandati bi nì Jaakɔb kansikin sá kii iwiin ita saŋkindi nyɔkɔm, ní Jaakɔb gbíntìi bíi kpàá Laaban waŋkuti tin kíǹee.

37 Ní Jaakɔb bátì isufi in bi yíì peepiliiyee nì amandi nì plataanee pambiyaamu nsɔmu, ki cùkū cùkū-mu ki māntìi tú ki dāa kátì taapu, ní ki pɔ́kɔtì ajan ŋin u cùkūee, ní ndɔsɔmuee kíǹ ki cáá mpim mpim. 38 Ní u dū ndɔsɔmu mun u cùkūee ki ŋá tiwan tin poon tiwaŋkuti nyùee ki túĺ tiwaŋkuti nimbiin, ní tì yaa dòoń ki nyùee, tì jɔ́ḿ tɔb. 39 Ndɔsɔmu mun u cùkūee cee ní tiwaŋkutee jɔ́ḿ tɔb ní ki màal̀ mbiyaamu cáá atan atan. 40 Jaakɔb nìn gāntì ipisalee ní ki yāntì i kpèé Laaban waŋkuti tin cáá atan atanee nì tin bɔ̀ǹee.

Míǹ ní u ŋáaǹ ní ki ká tipicaŋkpun nì tiŋɔcaŋkpun, ní ki gāntì-tì ki yóoǹ u-ba kaa dū tíǹ ki kpáfì nì Laaban yati. 41 Ŋyunti ŋun ní tiwaŋkuti tin yáàyee yaa làá jɔ̄m̀ tɔbee, ní Jaakɔb ń yòon̄ní ndɔsɔmu mun u cùkūee kí ŋá tiwan tin poon tiwaŋkuti nyùee kí túĺ ti-nimbiin, ní tì jɔ́ḿ tɔb ndɔsɔmu mun u cùkūee cee. 42 Ama tiwaŋkuti tin sá ŋkaŋkalimuee yaa bāańee, waa yōontí ndɔsɔmuee ti-nimbiin tí jɔ̄m̀ tɔb. Ŋkaŋkalimu gbantee, Laaban yati dee, ní úǹ yati sá tin yáàyee.

Jaakɔb sáǹ Laaban

43 Míǹ ní Jaakɔb ŋá ki kpántì ugaajakpaŋkpaan ki cáá tiwaŋkuti tikpil, ki cáá bitɔntɔnliibi binimpoobi nì bininjab nì igutaamu nì mmamu.