Dinyeel 31

1 Jaakɔb nìn gbìl̄ Laaban jipɔmbi bí ki lì yii: «Jaakɔb fōō timbi baa wanti kɔkɔ, an wanti pu ní u kpántì ugaaja nee.» 2 Jaakɔb nín kpēē Laaban nimbiinee, u dáań ki ká yii u nì u kansikin kaa ti mɔ̄ kii dooooyee an nín nìn bí puee. 3 Ní ti-Dindaan bí Jaakɔb yii: «Nín̄ gítí a-naanjab tiŋkin a-dumpu, man làá nīn bí a-cee.»

4 Niinee ní Jaakɔb tú bi yíiń u-nimpoobi Raseel nì Leeya bí dāan̄ u-cee kusaaun laakin u-waŋkuti bée. 5 Bi bàn̄ Jaakɔb ceeyee ní u bí-bi yii: «M dáań ki ká ni-baa nimbiin yii man nì u kansikin kaa ti mɔ̄ kii dooooyee. Ama m-baa Nimbɔtiu bí m-cee. 6 Nimbi ni-ba nyí m nín dū m-pɔŋŋu kɔkɔ ki túń ditundi ki tīī ni-baa puee. 7 Ní an yaa bàà sá ú pà-mi puee ní ú cúú kpántí. U kpántì-mi míǹ ní áli ŋfunyɔm saalaa pu, ama Unimbɔti kaa kíí ú ŋá-mi digaŋgam. 8 U yaa lī yii: <Tiwaŋkuti tin kɔkɔ cáá atanee di sá a-paatee>, tiwaŋkuti kɔkɔ màal̀ tin cáá atanee ní. U yaa tí lī yii: <Tiwaŋkuti tin kɔkɔ cáá iluntoonee di sá a-paatee>, tiwaŋkuti kɔkɔ tí màal̀ tin cáá iluntoonee ní. 9 Unimbɔti di fōō ni-baa waŋkuti ki tīī-mi. 10 Ŋyunti ŋun tiwaŋkuti bíi jɔ́ḿ tɔbee ní m ká kudamintiiu poon yii ijaa in bíi jɔ́ḿ isalee sá atan atan nì iluntoon iluntoon nì ŋmàtì ŋmati. 11 Kudamintiiuee poon ní Unimbɔti tuuŋŋu yíiń-mi yii: <Jaakɔb!> Ní m kíí yii: <M sèé.> 12 Ní ŋu bí-mi yii: <Yáatí kí kpèè, iŋɔjaa in bí ki jɔ́ḿ isalee kɔkɔ sá atan atan nì iluntoon iluntoon nì ŋmàtì ŋmati ní. M ŋá míǹ kun puee m ká Laaban nín ŋá-si puee. 13 Man di sá Unimbɔti un nyántì u-ba ki dàkā-si Beeteel, laakin a nìn dū ditaŋkpal ki cóoǹ ki sītì di-pu ŋkpam ní ki pūtì ki pōoǹ-mee. Kɔŋkɔnnee yīkì kí nīn gítí a-tiŋkin, laakin bi màl̄-see.>» 14 Ní Raseel nì Leeya kíí-u yii: «Timbi gíti cáá tigaajawan àá difakal diba ti-baa dicaŋkun kí fōōoo? 15 U dū-ti ki gíiǹ binicambi ní, kun puee u nyáfì-ti ní ki fōō animbil ki jíń. 16 An puee ti-baa gaajati tin Unimbɔti fōō u-ceeyee, timbi nì ti-biyaamu di yì. Min kɔkɔ Unimbɔti yaa bí yii á ŋée, ŋá míǹ.»

17 Niinee ní Jaakɔb yōoǹ u-biyaamu nì u-nimpoobi ki kāaǹ igutaamu pu kí yīkì. 18 U nìn yōoǹ ki kpáaǹ u-waŋkuti nì u-gaajati tin u nìn kāl̀ Padan-Aram ki kée kɔkɔ ki cáa nín gítí u-baa Isaaki cee Kanaan tiŋkin. 19 Laaban nìn búntì kí cā u-piii kuti. Ŋyunti gbanti ní Raseel yùn̄ u-baa waaŋi. 20 Ní Jaakɔb bál̀ Laaban uaranja ki yíkì kaa kāaǹ-u. 21 U nìn kpáaǹ u-wanti tin u cááyee kɔkɔ ki cūtìi dūtì Eefiraati mɔɔkpaandi ní ki dū u-ba ki túĺ Galaadi jool watil pú.

22 Jaakɔb yíkìi sáǹ iwiin ita boon ní bi dāa nín tùkū Laaban. 23 Niinee ní Laaban yōoǹ u-nabiyaamu ní bi nín jì Jaakɔb boon. Bi cōom̀ iwiin iluli ní ki tin nín cúú-u Galaadi jool pu. 24 Ama kunyeeuee ní Unimbɔti nyántì u-ba ki dàkā Laaban uaranja kudamintiiu poon ní ki bí-u yii: «Á cúú a-ba kí taa lì Jaakɔb tiba nì tiba, kí taa ŋá-u tikpitil báà tiba.»

25 Ŋyunti ŋun Laaban dūu bàn̄ Jaakɔb ceeyee, Jaakɔb gāā u-tantiu Galaadi jool pu, ní Laaban nì u-nabiyaamu mun gāā bi-tantib Galaadi jool gbanti pu. 26 Ní Laaban bālifì Jaakɔb yii: «Ba ŋá ní a ŋá mimmee? Ba pu ní a kíil̀-mi ki kpáaǹ m-bisalib ki búntì kii kujaau ní a cūtì ki jáń ki cúuń-bee? 27 Ba pu ní a kíil̀-mi ki sáǹ dibalin míǹ kaa kāaǹ-mi? M bàà kàantí-si nì ifaal ní kí yàntī bí gāā ilan kí bɔ̀ɔ̀ ŋgaŋgamu nì tibati. 28 Aa yāntì m kpàl̄ m-bisalib nì m-naantiibi ki kāaǹ-bi. Min a ŋá nee sá digbaandi ní. 29 M bàà cáá nsan kí ŋá-ni tin kaa ŋān̄ee, ama fool kunyeeu ní a-baa Nimbɔtiu fu sòon̄ nì mi ki bí-mi yii: <Á cúú a-ba kí taa lì Jaakɔb tiba nì tiba, kí taa ŋá-u tikpitil báà tiba.> 30 Kɔŋkɔnnee a-landɔkɔŋu gítì a-baa cindi pu ní a yíkì ki kùǹ, kin ba pu ní a gíti yù man waaŋi?» 31 Ní Jaakɔb kíí Laaban yii: «M fāŋkì ní ki dākafì yii m yaa kāaǹ-si, an yaa yíì a làá fōō a-bisalib. 32 Ama un cee ní a yaa ká a-waaŋee, bí kpɔ̀-u. Ti-nabiyaamu kɔkɔ di bí nee. Dāan̄ m-cee kí kpèè a yaa ká a-wanti tiba á yòon̄.» Jaakɔb kaa nìn nyí yii Raseel di yùn̄ awaa.

33 Ní Laaban nín kóò Jaakɔb tantiun ki kpēē, ní ki kɔ́ Leeya yɔun ki kpēē, ní ki kɔ́ inimpuyumbu liitil cee ki kpēē kaa ká báà tiba. U nyáń Leeya ceeyee ní ki nín kóò Raseel tantiun. 34 Raseel nìn yōoǹ awaayee ki dūu bál̀ ugutaamu gakal taapu ní ki kāl̀ an pu, ní Laaban kɔ́ ki kpēē u-tantiu poon kɔkɔ ní kaa ká tiba. 35 Ní Raseel bí u-baa yii: «M nín ká-si kaa yíkèe, án taa wà-si, di sá yii m ká m-ba ní.»

Ní Laaban kpēē kaa ká awaa. 36 Niinee Jaakɔb fōō Laaban pu diŋuul ní ki yíkìi nyáń u-pu, ní ki bí-u yii: «Tilati ní m yīntiǹ-si? Ikpiti ilai ní m ŋá-si ní a jìǹní m-boon nì dibaatandi míǹ? 37 A nín kpēē m-wanti kɔkɔee, a ká a-wanti tiba bí poonaaa? A yaa ká, á nyāntiń-tì man nib nì si mun nib nimbiin bí sòoǹ kí tīī-ti. 38 M kāl̀ a-cee abin mmuŋku ní. Dalba dalba a-piiu àá a-ŋoobuu ubɔ kaa lātì. Maa tí dáká a-piii poon upìja ubɔ nanti mun ki ká. 39 Tiba di yaa cúú a-waŋkuluuku kubɔee, maa cāabìń-si diwaŋkpil, see ḿ nyàab̀ kí téeǹ kun an cúúyee yil. A-waŋkuti tin bi yù ŋwiimpuee nì tin bi yù kunyeeuee^a, a bàlifī-mi ní ḿ téeǹ-si. 40 Ŋwiimpuee, ŋwìiń ŋmóò-mi ní kí kpɔ̀, ní kunyeeuee, tiwool ń kɔ́ kí dóó-mi ní ŋgeem ń wāŋkì m-nimbiliŋin. 41 Abin ŋin m ŋá a-ceeyee kpáfì mmuŋku dee. M túń a-bisalib liitil pu ditundi dibindi diba kpá saalku ní ki tīī-si, ní ki dū abin aluu ki kpāā a-waŋkuti. Ŋfunyɔm saalaa pu ní a mūul̀-mi ki kpántì m-paati. 42 An yaa kaa sá m-baa Isaaki nì m-naanja Abraam Nimbɔtiu, Unimbɔti un m-baa Isaaki jáaḿ ki fàŋkée pu, a bàà làá yàntī ḿ nīn fàtīi gítí nì iŋaŋkulim ní. Ama Unimbɔti ká m-falaau nì m-tundi din m túńee. An pu ní fool nyeekuee, u fu sòon̄ ki kpáafì-si.» 43 Ní Laaban kíí Jaakɔb yii: «Binimpoobi nee sá man bisalib ní, ní bi-biyaamu sá man biyaamu. Ipii nee sá man piii ní, tin kɔkɔ a pée wāĺ nee sá man wanti ní. Díǹ pu nee, ba ní m làá ŋá kí tīī m-bisalib nì bi-biyaamu mun bi màl̄ee? 44 An ŋmāntì man nì si tí sòoǹ kí bóob́ kí pòon̄ tɔb, án nīn sá kudaaŋŋu man nì si kansikin.»

45 Niinee ní Jaakɔb píí ditaŋkpal ki cóoǹ án nīn sá-bi kudaaŋŋu. 46 Ní ki bí u-nabiyaamu yii bí tòò ataŋkpee kí bíĺ dikpúkul. Bi tōō ki bíl̀ee ní bi-kɔkɔ kāl̀ di-pu ki jíń tijin. 47 Ní Laaban pú ditaŋkpakpukulee diyindi u-sooŋyi poon yii Yeegar-Saaduta, ní Jaakɔb mun yíiń-dì u-sooŋyi poon yii Galeedi. 48 Ní Laaban bí yii: «Ditaŋkpakpukul nee di sá dipoondi din dōoǹ man nì si kansikinee daaŋku.» An pu ní bi pú mpaan gbanti diyindi yii Galeedi, taapu di sá yii: <Kudaaŋŋu taŋkpakpukul>. 49 Bi gíti pú niin diyindi yii Miisipa, taapu di sá yii: <Unimbɔti ń nīn bí ki wāĺ-ti.> Di sá Laaban nìn bí yii: «Unimbɔti ń nīn bí ki wāĺ man nì si kansikin ti yaa kaa dāa gíti bí ki wāĺ tɔbee. 50 A yaa láa cáá binimpoobi ki kútì ní ki ŋúb́ man bisalib ki sàantée, báà ubɔ yaa kaa dāa bí ki wāĺ tin a bí ki ŋáańeeyaaa, á nīn nyí yii Unimbɔti bí ki wāĺ tin bí ki jītí man nì sii kansikinee.»

51 Ní Laaban gíti bí Jaakɔb yii: «Kpèè ditaŋkpakpukul nee, kí kpèè ditaŋkpal din m cóoǹ án nīn sá man nì si kansikin kudaaŋŋu nee. 52 Ditaŋkpakpukul nee nì ditaŋkpal din cɔ́ nee di sá-ti kudaaŋŋu yii man kaa làá lákatí ditaŋkpakpukul nee pu kí póotí a-pu, si mun ń taa lákatí ditaŋkpakpukul nee nì ditaŋkpacooŋkaal nee pu kí póotí man pu kí ŋá tikpitil. 53 Abraam nì Naakɔɔr Nimbɔtiu un sá bi-baa Nimbɔtiuee ń dāá sòoǹ man nì sii kansikin bɔti^b.»

Ní Jaakɔb pūtì Unimbɔti un u-baa Isaaki nìn jáaḿ ki fàŋkée. 54 Boonee ní Jaakɔb ŋá saraa ubɔ dijool pu niin ní ki yíiń u-nabiyaamu bi kpáfìi jíń tijin ní ki gbíntì dijool pu niin ki dōoǹ.