Dinyeel 29

Jaakɔb bàn̄ u-wee Laaban cee

1 Ní Jaakɔb yíkì ki nìkī u-saŋŋu ki túĺ ntimu mun bí ŋwìiń nyalaŋki púee. 2 U kpēēyee, lɔkɔ ubɔ dɔ̄ akpaanni tipicaŋkpun tita dɔ̄ ki kɔ́ĺ. Niin ní bipikpaaliibi nìn lúù nnyim ki nyùntī ipii. Ditaŋkpakpaandi diba nìn pīī lɔkɔee nyɔkɔpu. 3 Míǹ puee bi nìn cīití ipii kɔkɔ yaa kpáfì ki dóòyee ní bí nín bíntí ditaŋkpalee lɔkɔ nyɔkɔ ní kí nyùntī i-kɔkɔ. I yaa nyùn̄ ki dóòyee ní bí fàtīí bíntí ditaŋkpalee kí pìin̄ lɔkɔee nyɔkɔ. 4 Ní Jaakɔb bālifì bipikpaaliibee yii: «M-nabiyaamu, ni sá la ní?» Ní bi kíí-u yii: «Ti sá Kaaran yab ní.» 5 Ní u bālifì-bi yii: «Ni nyí Laaban, Naakɔɔr naantiiuaaa?» Ni bi kíí-u yii: «Iiin, ti nyí-u.» 6 Ní u bālifì-bi yii: «U pɔ̄ɔ̄ tiŋanaaa?» Ní bi kíí-u yii: «Alaafiya bí-u. Kpèè, u-bisal Raseel di dòoń nì ipii nee.» 7 Ni u bí-bi yii: «Ŋwìiń dáá bí, an kaa láá ŋmāntì ŋyunti ŋun bi kpáfí ipiiyee. Míǹ puee ní lúń nnyim kí nyùntī-i, ni yaa nyūntì-iee ní gíiǹ-i kupikpaaun.» 8 Ní bi kíí-u yii: «Taa ŋūǹ ki ŋá míǹ, asee ipii kɔkɔ yaa bāań ki kpáfì. Niinee ní tí nín cúú ditaŋkpal kí bíntí ní kí nyùntī-i.»

9 Bi yú ki sòoǹ míǹ ní Raseel dūu bāań nì u-baa piii, di sá Raseel nìn sá upikpaal ní. 10 Jaakɔb nín ká u-wee Laaban bisal Raseel péetiń u-baa piiiyee, ní u dɔ́miń ki cúú ditaŋkpalee ki bíntì ní ki nyūntì-i. 11 Ní Jaakɔb kpàl̄ Raseel ní ki bíi sūǹ nì dipɔɔpindi. 12 Ní ki bí Raseel yii: «M sá a-baa niisal Reebeeka jipɔɔn ní.» Ní Raseel sáǹ ki cūtì ki tùkū u-baa. 13 Laaban nín gbìl̄ yii u-niisal jipɔɔn bāańee, ní u sáǹ ki túŋkì-u. U bàn̄ee, ní ki kpàl̄-u ki nákáǹ u-ba, ní ki cáá-u ki cūnnì mmɔŋki. Ní Jaakɔb máafì-u tin jítèe kɔkɔ. 14 Ní Laaban bí Jaakɔb yii: «Tiŋman, a baasii sá m-niliu ní kiŋkiŋ.» Jaakɔb nìn kāl̀ Laaban cee ki sāā uŋmal ubɔ.

Jaakɔb cáá Leeya nì Raseel

15 Dalbee ní Laaban bí Jaakɔb yii: «A nín sá m-niliuee puee, á nīn tūǹ ditundi míǹ faalaa ki tìì-maaa? An puee tùkù-mi kun a là ḿ dāá pà-see.»

16 Laaban nìn cáá bisapɔmbi bili, bi yíì ukpil yii Leeya ní ki yíì uwaal yii Raseel. 17 Leeya kaa nìn cáá kunyaaŋŋu, ama ní Raseel úǹ nìn bí gbàlgbal ki ŋān̄ tikpil. 18 Jaakɔb nìn néeń Raseel, ní ki bí u-wee yii: «M làá tɔ̄ ditundi kí tīī-si abin aluli á dū a-bisal uwaal Raseel kí tīī-mi.» 19 Ní Laaban bí-u yii: «An mɔ̄ǹ-mi ḿ dū m-bisal kí tīī sii ki jítiǹ ḿ dū-u kí tīī uniyaŋyan. Nín̄ kā m-cee.»

20 Ní Jaakɔb túń ditundi abin aluli Raseel pu ní an kaa kpáàa súŋkì u-cee, kun puee u nìn néeń-u tikpil. 21 Niinee ní Jaakɔb bí Laaban yii: «M túń ditundi ki sāā m-yuntiŋu, an puee dū m-nimpuu ki tīī-mi ḿ cáá.»

22 Ní Laaban kóoǹ niin yab kɔkɔ ki kpáfì ní bi jíń tinimpucan jiŋaaliu. 23 Kunyeeuee ní Laaban yōoǹ u-biseebiki Leeya ki cáa kɔ́ǹ Jaakɔb cee ní u nì Jaakɔb kpáfì. 24 Ní Laaban dū u-yumbusapɔɔŋwu Siilpa ki tīī u-bisal Leeya ú nīn bí u-cee ki tūǹ ditundi ki tìì-u. 25 Kutaa wúntèe, Jaakɔb kpēēyee Leeya dee, ní an ŋá-u bitii. Ní u bālifì u-wee Laaban yii: «Ba ŋá ní a ŋá-mi mimmee? An kaa sá Raseel pu ní m kāl̀ a-cee ki túń ditundi ki tīī-saaa? Ba pu ní a kíil̀-mi ki dū Leeya ki tīī-mi?» 26 Ní Laaban kíí-u yii: «Timbi cee dooyee, an sá-ti dikoobil ní, uwaal kaa pēentí ukpil kí mɔ̄ǹ. 27 Míǹ puee púntí sii nì un bí nee nimpucanti kinyɔŋ nee, kin dāa bíńee, ḿ dū Raseel mun kí tīī-si, á tí kàl̄ abin aluli kí tɔ̄ ditundi kí tīī-mi.» 28 Ní Jaakɔb lafun ŋá míǹ. U púntì Leeya nimpucanti kinyɔŋ gbantee, ní Laaban dū u-bisal uwaal Raseel ki kútì-u. 29 U nìn dū u-yumbusapɔɔŋwu Biila ki tīī Raseel ú nīn bí u-cee ki tūǹ ditundi ki tìì-u. 30 Ní Jaakɔb nì Raseel mun kpáfì. Jaakɔb nìn néeń Raseel ki jítiǹ Leeya, ní ki nìn gíti kāl̀ abin aluli ki túń ditundi ki tīī Laaban.

Jaakɔb biyaamu bɔti

31 Ti-Dindaan nín ká yii Jaakɔb kaa néeń Leeyayee, ní u pú-u mmaal, ní Raseel úǹ sá uŋmaŋŋmanti. 32 Leeya nìn dūu cáá dipool ki màl̄ kibininjabiki, ní ki pú-kì diyindi yii Rubeen. Di sá yii un nìn lī yii: «Ti-Dindaan ká m-falaau, kɔŋkɔnnee m-cal làá nīn kíǹ ki néeń-mi.»

33 Ní u gíti cáá dipool ki màl̄ kibininjabiki, ní ki bí yii: «Ti-Dindaan nín ká yii m-cal kaa néeń-mee ní u gíti pú-mi kibininjabiki kiba.» Ní u pú-kì diyindi yii Simeeyɔn, taapu di sá yii: <Ti-Dindaan gbìl̄.>

34 Ní u fātìi tí cáá dipool ki màl̄ kibininjabiki, ní ki bí yii: «Kɔŋkɔnnee m-cal làá dū u-ba kí nákáǹ-mi, kun puee m màl̄-u bininjab bita.» An pu ní u pú-kì diyindi yii Leefii, taapu di sá yii: <M-cal làá dāá dū u-ba kí nákáǹ-mi.>

35 Ní u fātìi tí cáá dipool ki màl̄ kibininjabiki, ní ki bí yii: «Kɔŋkɔnnee m làá nyɔ̄ŋkì ti-Dindaan ní.» An pu ní u pú-kì diyindi yii Juuda, taapu di sá yii: <M làá nyɔ̄ŋkì m-Dindaan.>

Niinee ní u gbēeǹ mmaal.