Dinyeel 6

Binib būtì ní ikpiti wíiǹ

1 Binib nìn kíĺ ki bíi bùtī kitiŋ pu, ní ki màl̄ mbinimpubiyaamu. 2 Unimbɔti jipɔmbi^a ká yii binifoobi sapɔmbi ŋān̄ee ní bi lēekì bi-kansikin bin fáatiǹ-bee ki cáá. 3 Ní ti-Dindaan bí yii: «Maa làá yàntī kufoou kun m ŋá unilinee ń nīn bí u-ni ki cá jaanjaan. Kun puee u sá tiwun ní ki bí iwɔfin. Waa làá yúntí kí jītí abin dilaataal nì mmuŋku pu.» 4 Tinikpaandi nìn bí kitiŋ pu ŋyunti ŋun Unimbɔti jipɔmbi dɔ́miń ki cáá binifoobi sapɔmbi ki màl̄ mbiyaamuee. Míǹ boonee bi nìn gbíntì ki bí^b. Bíǹ di nìn sá bijanjaliibi bin nìn nyáń diyindi cannaakuee.

5 Ti-Dindaan nìn ká yii binib kpitii mɔ̀tīi wīintí kitiŋ pu. Baabadalee tibɔkpitil ŋma di nìn gbí bi-pɔbiliŋ poon bi dàkafī. 6 Ní an wùn̄ ti-Dindaan ki kɔ́-u kunimbaau u nín náań unil kitiŋ puee. 7 Ní ti-Dindaan bí yii: «See m kúntì binib bin m náańee kitiŋ pu. M làá kúntí-bi kí kpáaǹ tiwaŋkuti nì tin kɔkɔ fù ti-biŋŋi puee nì inoon kɔkɔ, kun puee an wùn̄-mi m nín náań-bee pu.» 8 Ama Noowa baba di nìn fáatì ti-Dindaan^c.

Noowa kpáá meela

9 Noowa nì u-biyaamu bɔti sɔ̀. Noowa nìn sá unimɔnti ní ki bí deedee u-yuntiŋu nib kansikin. U nìn nóó Unimbɔti mmɔntiim. 10 U nìn màl̄ mbininjabiyaamu muta. Bi-yiŋŋi di sá Seem nì Kaam nì Jaafeeti^d.

11 Kitiŋ nìn bíil̀ Unimbɔti nimbiin. Tipɔmbɔti ní binib nìn kíǹ ki dàkà tikɔkɔ poon. 12 Unimbɔti nìn ká yii ikpiti jíń kitiŋ, di sá yii binib nìn dū bi-ba ki líì nì tikpitil. 13 Ní Unimbɔti bí Noowa yii: «M làá kúntí binib kɔkɔ, kun puee bi yāntì tipɔmbɔti jíń kitiŋ kɔkɔ. M làá céetí-bi kitiŋ pu. 14 Á dū busubu bun bi yíì goofeeree dɔi kí kpáá meela, kí pìtī poon adiin kí bɔ̀ntī poon nì boon aŋɔ. 15 Á kpáá-bu mpúun ń nīn cáá meetab dilaataal nì imuŋku ili nì saalaa, ŋwaan ń nīn cáá meetab mmuŋku nì biŋmoo, ŋfɔkɔn ń nīn sá meetab saalku. 16 A yaa ŋée, á kpáá kí bìin̄ yilpu, ní kí yàntī mbùń dimeetajandi ń nīn bí a nín kpáá ki bīiǹ puee nì meela guŋŋi kansikin, ní kí gíí kipunyɔkɔ dijandi diba pú, ní kí pìtī meela poon aditɔntɔkɔ ata. 17 Man làá yàntī utaa ń nì, ní nnyiŋgbeen ń kúntí tin kɔkɔ pée cáá kufoou ki bí kitiŋ puee, tin kɔkɔ bí kitiŋ puee làá céetí. 18 Ama m làá pòon̄ sii dipoondi. A làá dāá kɔ́ meelan, sii nì a-nimpuu nì a-jipɔmbi nì a-coopoobi. 19 Á dāá lēē tin kɔkɔ cáá kufoouee, kubuluu kamaa uja nì usal kí kɔ́ǹ meelan sii nì bi ń ŋmátí. 20 Á dāá lēē unoon kamaa buluku uja nì usal, nì kuwaŋkuluu kamaa buluku uja nì usal, nì kun kamaa pée fù kitiŋ puee buluku uja nì usal, bi-kɔkɔ ń dāá dāan̄ a-cee kí ŋmátí. 21 Á dāá nyàab̀ tin kɔkɔ pée sá tijinee mun kí kpāafì án dāá nīn sá sii nì tin kɔkɔ bí a-ceeyee jinti.» 22 Ní Noowa lafun ŋá kii Unimbɔti nín bí yii ú ŋá puee deedee^e.