Dinyeel 7

Noowa kɔ́ meela poon

1 Noowa kpáá meela ki dóòyee ní ti-Dindaan bí-u yii: «Á kɔ́ meelan, sii nì a-dicaŋku kɔkɔ, kun puee a-yuntiŋu nib nee kansikinee, sii ní m ká yii a bí deedee. 2 Á kɔ́ǹ tiwaŋkuti tin kɔkɔ ŋān̄ bí dūú ŋá saraayee tiluli tiluli, ijaa nì isal, ní kí kɔ́ǹ tin kaa ŋān̄ bí dūú ŋá saraayee tili tili, uja nì usal. 3 Á kɔ́ǹ inoon kɔkɔ mun míǹ, ijaa iluli isal iluli, kí ŋmā kí kpāafì i-boolii kitiŋ pu. 4 Di sá yii, an kíǹ iwiin iluli dee, m làá yàntī utaa ń nì kitiŋ pu, ŋwiimpu nì kunyeeu, iwiin imuŋku ili kí céetí tin m náań tì bí kitiŋ puee kɔkɔ.» 5 Ní Noowa ŋá kii ti-Dindaan nín bí yii ú ŋá miŋyee.

Nnyiŋgbeeŋkpaan

6 Noowa nìn cáá abin alaataa aluu ní utaa nìn̄ ní nnyiŋgbeen dɔ́miń kitiŋ pu. 7 Ŋyunti gbantee Noowa nì u-nimpuu nì u-jipɔmbi nì u-coopoobi kɔ́ meelan, nnyiŋgbeen ń taa yòon̄-bi^a. 8 Tiwaŋkuti tin ŋān̄ bí dūú ŋá saraayee nì tin kaa ŋān̄ bí dūú ŋá saraayee, nì inoon nì tin kɔkɔ pée fù kitiŋ puee, 9 kubuluu kamaa uja nì usal nìn dɔ́miń ki kɔ́ meela poon Noowa cee kii Unimbɔti nín nìn pée tùkū-u puee. 10 Iwiin iluli boonee, ní utaa nìn̄, ní nnyiŋgbeen dɔ́miń ki bīiǹ kitiŋ pu.

11 Noowa biŋŋi alaataa aluu poon, dibindi ŋmaliliitiu iwiin saalku nì ili dal ní inyimbulkpaan cúu pīitì, ní nnyim cílìń, ní yilpu cúu cōotì ní nnyim sìtīń^b. 12 Utaa nìn nìn̄ iwiin imuŋku ili, ŋwiimpu nì kunyeeu. 13 An wiiŋŋu ní Noowa nì u-nimpuu nì u-jipɔmbi Seem nì Kaam nì Jaafeeti nì bi-nimpoobi bitee kɔ́ meelan. 14 Ŋwiin gbanti ní upeel kamaa buluku, kuwaŋkuluu kamaa buluku nì tin kɔkɔ fù kitiŋ puee kubuluu kubuluu, nì unoon kamaa buluku, nì tin kɔkɔ cáá ifeenee kubuluu kubuluu mun kɔ́ meelan. 15 Tiwan tin kɔkɔ pée cáá kufoouee nóoń tɔb tili tili, ki kɔ́ Noowa cee, meela poon. 16 Tin kɔkɔ pée cáá kufoouee, uja nì usal nìn kɔ́ meelan kii Unimbɔti nín nìn pée tùkū Noowa puee. Ní ti-Dindaan dūu pīiǹ u-pu.

17 Ní utaa nìn̄ iwiin imuŋku ili. Ní nnyim gbí kitiŋ pu ní meela yíkì ki dēeǹ nnyim pu. 18 Ní nnyim gbí ki bīiǹ kitiŋ kɔkɔ, ní meela kíǹ ki dēē nnyim pu. 19 Nnyim mɔ̄tìi gbí ki jɔ́m̀ ki tin bīiǹ ajoon ŋin fɔ̀kɔ̀ tikpilee kɔkɔ pu. 20 Nnyim gbí ki bīiǹ ajoon pu ki páaǹ kii meetab biluli pu. 21 Tin kɔkɔ nìn pée cáá kufoou ki bí kitiŋ puee, an dàkà yii inoon nì tiwaŋkuti nì ipeel nì tin kɔkɔ pée kpátì ki gbí kitiŋ puee, ki kpáaǹ binib, kɔkɔ kpíì múb. 22 Tin kɔkɔ nìn pée bí ki cáá kufoou ki fòotī ki bí kitiŋ puee kpíì. 23 Míǹ ní ti-Dindaan nìn céetì tin kɔkɔ nìn pée bí kitiŋ puee, an dàkà yii binib nì tiwaŋkuti nì tin kɔkɔ pée kpátì ki gbí kitiŋ puee ki kpáaǹ inoon. U nìn kúntì an kɔkɔ nyíb, see Noowa nì bin nìn bí u-cee meela poonee baba di nìn kíǹ.

Noowa nyáń meelan

24 Nnyim nìn gbí ki dɔ̄ míǹ ki tin sāā iwiin dilaataal nì imuŋku ili nì saalaa.