2
1 Kaya ika, igin ko, magpakakusug ika sa tabang ni Cristo Jesus, 2 sagkud a manga katottoroan na narungug mo kanaku sa atobangan ka manga testigo, itottoro mo man sa ibang kangoran na mapagkakatiwalaan mo sagkud makapagtottoro man sa iba. 3 Kinakaipowan makiusad man ika kanaku ka manga kasakitan arug sa usad na maraay na soldados ni Cristo Jesus. 4 Gibowon mong arugan a usad na soldados na nagsisirbi na diri nakikiusad sa manga gibo ka manga ordinaryong tawo, ta a gosto niya mapaogma a kanyang opisyal. 5 Pareyo man ka parangayamun, diri iya minggana kin diri iya somosonod sa manga patakaran ka ngayamun. 6 Usad pa kan, a maigut na paraoma amo kinakaipowan na onang makinabang ka parte niya sa inani. 7 Pag-isipan mo sa maraay a sinasabi ko, sagkud ipaiintindi adi kanimo ngamin ka Diyos.
8 Rumrumun mo na binoway otro ka Diyos si Jesu Cristo, na erensiya ni David. Amo adi a Maraay na Bareta na ipinapangadal ko, 9 na kin sari nagsakit ako sagkud ikinadena na bagana baga usad na kriminal. Alagad a oosipun ka Diyos diri nakakadenaan. 10 Kaya pinagtiusan ko a ngamin na bagay alang-alang sa manga pinili ka Diyos tanganing maako man nira a kaligtasan na galin ki Cristo Jesus, sagkud a uda kasagkuran na kamorawayan. 11 Amo adi a matood na kasabiyan,
?Kin kita magraan kaiba ni Cristo,
maboboway man kitang kaiba niya;
12 kin kita makatagal ka manga kadipisilan sa kinaban na adi
mighadi man kitang kaiba niya;
kin nigaran ta iya sa atobangan ka manga tawo,
ninigaran man kita niya;
13 kin kita bukung maimbod,
migpadagos iyang maimbod,
ta diri niya maninigaran a sadiri niya.?
A Serbidor na Nagogostowan ka Diyos
14 Padagos mong iparumrum sa manga kangoran a manga bagay na adi. Pataniran mo sira sa ngaran ka Diyos na diri magparapakidiskotiran manungud sa kin ono buut sabiyun ka manga oosipun, ta diri man adi nagtatao sa karayan kindi nagraraut sana sa manga nag-iirungug. 15 Para kanimo, gibowon mo saigo a ngamin na magigibo mo sa pagtottoro ka kamatoranan manungud ka oosipun ka Diyos tanganing magin kaakoako ika bilang usad na serbidor na diri ikinasusupug a trabawo niya sa Diyos. 16 Likayan mo a manga uda kamutangan na orosipan, ta a manga naggigibo kadi tinnalikokod na sa Diyos. 17 A manga katottoroan nira bagana kanser na linnuluyap sa bilog na awak. Kaiba sa manga tawong adi amo si Himeneo sagkud si Fileto, 18 na tinnalikokod na sa kamatoranan sagkud rinaraut nira a pagtobod ka iba. Itinotottoro man nira na a pagkaboway otro ka manga guraan nakaagi na. 19 Alagad dawa agko manga tawong nagtotottoro sa sala, a matood na oosipun ka Diyos diri mababago, ta amo adi a arug sa masarig na pondasyon na itinogrok ka Diyos, na agko nakasorat: ?Nabibisto ka Kagorangnan a manga tawong sadiri niya,?a sagkud, ?A siisay man na nagbabaoy sa ngaran ka Kagorangnan kaipowan na bayaan a karatan.?
20 Sa dakulu sagkud magayon na baluy dakul a manga bubutangan, agko manga bubutangan na gibo sa bolawan sagkud pirak para sa manga espesyal na okasyon. So iba man gibo sa kawoy sagkud lamod na para sa pang-oroalduw na gamit. 21 A siisay man na nagrarayo sa karatan maibibilang sadto espesyal sagkud mapakikinabangan, iya nakatagama sa kanyang Kagorangnan sagkud pirming anda na gamitun sa onoman na maraay na bagay.
22 Rayoan mo a manga mararaut na kamawutan ka manga kahobinan, sagkud ipagpadagos mo a katanosan, kaimbodan, pagkabuut sagkud katoninungan, kaiba ka manga tawong nagbabaoy sa Kagorangnan na agko malinig na poso. 23 Likayan mo a manga orosipan na uda kamutangan sagkud pakikipagdiskotir, ta isi mo na amo adi a pinagpoponan ka karibokan. 24 Sagkud a serbidor ka Kagorangnan diri nakikipagkasogot, kindi kinakaipowan na mabuut iya sa kada usad, tattaong magtottoro sagkud pasensiyoso. 25 Sagkud a manga kinnakalaban kanya kaipowan tottoroan niya na agko kabuutan sagkud kapakombabaan, sa paglaom na a Diyos tatawan sa panawon na magsulsul sagkud magtaong giya kanda na makabisto ka kamatoranan. 26 Kin arug kan maliliwanggan a pag-iisip nira sagkud makadudulag sa paun ka diyablo, na amo a nagdara kanda sa pagkapriso tanganing koyogon a manga kagostowan niya.