2ti 3

¹ Tandaan mo: a manga oring alduw na adi migkaagko grabing kadipisilan. ² Holi ta a manga tawo magigin makasadiri, pakikwarta, mapagpalangkaw, oportonista sagkud paraminos, kusung sa manga kag-igin nira, diri tattaong magrumrum sa otang na buut, sagkud magigin kontra saigo sa Diyos. ³ Uda pagkabuut, uda pagkaerak, diri tattaong magpatawad, parapakaraut sa iba, maringis sagkud nauungut sa ono man na maraay. ⁴ Buku sana yan, magigin traydor pa sira, malakaposoan, maablada, mas nabubutan nira a sadiring kagostowan kisa ka manga bagay para sa Diyos, ⁵ manga nagsasaginsagin na makaDiyos, alagad diri man nababayad sa boway nira a kapangyariyan ka Diyos. Likayan mo a manga tawong arug kadi. ⁶ Agko nagkapira kanda na naggigibo sa paagi na makaluug sa manga baluy sagkud manloko ka manga babaying maloloya a isip sagkud pono sa kasalan sagkud manlainlain na klase sa maraut na kamawutan, ⁷ manga babaying pirming nag-iingoang makatuud sa bagong katottoroan alagad maski ono gibowon diri man nira natuturan a kamatoran. ⁸ Arug ki Janes sagkud Jambres na nagkontra ki Moises, a manga lalaking adi nagtotottoro man sa sala sagkud kontra man sa kamatoran. Mararaut a manga pag-iisip sagkud bukung matood so pagtobod nira. ⁹ Alagad diri man makapagpadagos a karatan nira ta naisiyan ko ngamin so kandang kapangulan arug ko ginibo ni Janes sagkud Jambres.

Manga Oring Kasadolan ni Pablo

¹⁰ Alagad ika, isi mo ngamin a kanakung manga katottoroan, kin paono ako namoway, kin ono so katoyowan, so kanakung pagtobod, pagkabuut, sagkud pagkatius. ¹¹ Nabayad mo so pasakit kanaku, pati so manga kadipisilan na nangyari kanaku sadto Antiokia, sa Iconio, sagkud Listra. Alagad sa ngamin na adto, ilinigtas ako ka Kagorangnan. ¹² A kamatoranan kan a siisay man na gostong maboway sa kabanalan ki Cristo Jesus, makamamati sa kasakitan. ¹³ Mantang a manga tawong maraut sagkud manga parasaginsagin orog na mapakakaraut, a manga madaya padagos na mindaya, sagkud sira man madadaya. ¹⁴ Alagad ika, magpadagos ika sa kamatoranan na kanimong naturan sagkud tinotobod, ta bistado mo kin siisay a manga nagtottoro kanimo. ¹⁵ Ta poon pa ko igin pa ika isi mo na a Banal na Kasoratan, na nagtatao kanimo sa kadonongan para sa kaligtasan sa paagi ka pagtobod mo ki Cristo Jesus. ¹⁶ A ngamin na Kasoratan galin sa sadiring kaisipan ka Diyos sagkud magagamit sa pagtottoro, pagdawuy, pagtolid ka salang gibo sagkud pagtottoro ka matanos na pamomoway, ¹⁷ tanganing a manga nagsisirbi sa Diyos magin angay sagkud anda sa paggibo ka ngamin na karayan.