A Pangarwang Sorat ni Pablo
Timoteo
?Kin kita magraan na kaiba ni Cristo
maboboway man kitang kaiba niya.
Kin kita makatagal ka manga kadipisilan sa kinaban na adi,
mighadi man kitang kaiba niya.? (2:11-12a)
1
1-2 Para kanimo Timoteo, na nabubutan kong igin:
Mapakanimo logod a bendisyon, pagkaerak sagkud katoninungan na galin sa Diyos Ama sagkud ki Cristo Jesus na Kagorangnan. Akong si Pablo na sinnorat kadi, nangongomosta kanimo. Ako na apostol ni Cristo Jesus sa kagostowan ka Diyos, minandaan tanganing mangadal manungud ka ipinanogang boway na uda kasagkuran na makokoko ta sa pakikipag-usad ta ki Cristo Jesus.
3 Nagpapasalamat ako sa Diyos para kanimo, Timoteo. Iya a Diyos na kanakung pinagsisirbiyan, na agko malinig na konsensiya, na ginibo man ko kanakung ginikanan. Alduw gab'i pirmi ko ikang narurumruman sa pagpapangadyi. 4 Narurumruman ko so manga pagtangis mo ko magkasowayan kita, kaya minamawut ko na mabayad ika tanganing mapono ako sa kaogmaan. 5 Narurumruman ko man a kanimong sinserong pagtobod, pareyo ko pagtobod ka kanimong lola na si Loida sagkud ka kanimong ina na si Eunice, sagkud sigorado ako na agko man ika pareyo kan na pagtobod. 6 Holi ka na sinserong pagtobod ipinaparumrum ko kanimo na diri ika panloyaan sa buut kindi mas magin maigut ika pirmi sa paggamit ka kakayaan na itinao ka Diyos kanimo ko iruta ko so manga kamuta ko kanimo. 7 Ta a Banal na Espirito na itinao kanatu ka Diyos diri kita ginigibong mataluw, kindi tinawan niya kita sa kapangyariyan, pagkabuut, sagkud pagpupugul sa sadiri.
8 Kaya diri ika masupug na magpatonay manungud ka kanatung Kagorangnan na si Jesu Cristo, o magin a pagkapriso ko holi kanya. Kindi sa kapangyariyan ka Diyos makibanga ika ka manga kasakitan holi sa pangangadal ka Maraay na Bareta. 9 A Diyos amo a nagligtas sagkud binnaoy kanatu na magin banal niyang banwaan. Ginibo niya yan buku sa manga naginibo ta, kindi ka kanyang sadiring katoyowan sagkud biyaya. Bago pa lalangun a kinaban plinano na ka Diyos na ipababayad a biyayang adi sa paagi ni Cristo Jesus. 10 Alagad ipinabayad na yan ngowan kanatu holi ko pag-abot ka kanatung Paraligtas na si Cristo Jesus. Dinaug niya a kagranan sagkud sa paagi ka Maraay na Bareta dinara niya a boway na uda kasagkuran. 11 Sagkud ako a pinili ka Diyos na magin tagapangadal, apostol sagkud paratottoro ka Maraay na Baretang adi. 12 Kaya amo yan a rason kin ngata ako ta nagtitius. Alagad diri ako nasusupug, ta bistado ko kin siisay a tinotobod ko, sagkud nagtotobod ako na iingatan niya sagkud sa manga oring alduw so manga ipinagkatiwala niya kanaku.
13 Gibowon mong arugan so manga itinottoro ko kanimo, sagkud magpadagos ika sa pagtobod sagkud sa pagkabuut na inako ta ki Cristo Jesus. 14 Pagmaanan mo a manga kamatoranan na ipinagkatiwala kanimo, sa tabang ka kapangyariyan ka Espirito Santo na nakaistar kanatu.
15 Isi mo na pinabayaan ako ko apus ngamin tang kangoran sa Asya, kaiba na si Figelo sagkud si Hermogenes.
16 Pagbendisyonan logod ka Kagorangnan a pamilya ni Onesiforo, ta dakul ng beses na pinakusug niya ako. Diri niya ako ikinasupug dawa nakapriso. 17 Ta a kamatoranan kan, pag-abot niya sa Roma maigut niya akong inanap anggan sa matorakan. 18 Kaerakan logod iya ka Kagorangnan ka alduw na pagbalik ni Jesus. Isi mo saigo kin paono niya ako tinabangan sadto Efeso.