4
A Boway na Kaakoako sa Diyos
1 Kaya ngani, manga ngod, nakikiosip sagkud inaayat namu kaninyo sa ngaran ka Kagorangnan na si Jesus, na mamoway kamo na mas orog pa kisa ka pamomoway ninyo ngowan, pamomoway na oyon sadto naturan ninyo kanamu na kaakoako sa Diyos. 2 Ta isi ninyo kin ono so manga katogonan na itinao namu kaninyo bilang manga parasonod ka Kagorangnan na si Jesus.
3 Gosto ka Diyos na kamo magin banal, sagkud romayo sa onoman na klase sa kadostaan. 4 Kaipowan maturan ka kada usad kin paono makiiba sa agom niyang babayi, sa banal sagkud magalang na paagi, 5 bukung sa pagsonod ka kamawutan ka laman arug ka ginigibo ka manga bukung Judio na uda pagkabisto sa Diyos. 6 Diri mo paggibowan sa maraut sagkud paglokowon a ngod mo ka manga bagay manungud sa kadostaan ta maigpit na padodosaan ka Kagorangnan a siisay man na ginnigibo kadi, arug ko sinabi sagkud ipinatanid namu kaninyo kadto. 7 Binaoy kita ka Diyos tanganing mamoway sa kabanalan, bukung sa kadostaan. 8 A siisay man na diri magsonod ka manga kamandaan na adi bukung tawo a diri nira sinosonod kindi a Diyos na nagtao kaninyo ka kanyang Espirito Santo.
9 Ngowan manungud man sa pagkabinutan bilang magngongod sa Kagorangnan diri ko na kaipowan na parumrumun kamo manungud kadi, ta a Diyos mismo a nagtottoro kaninyo na mabutan a kada usad. 10 Sagkud amo na adi a ginigibo ninyo sa manga kangoran ninyo sa bilog na Macedonia. Alagad nakikiosip ako kaninyo, manga ngod, na mas orog pang magkabinutan kamo.
11 Ingowaun ninyong mamoway na matoninung, sagkud diri kamo makilabut sa boway ka iba. Magtrabawo a kada usad para sa ikaboboway niya, arug ko itinogon namu kaninyo, 12 tanganing diri na kamo maglaom sa iba, sagkud igagalang kamo dawa ka manga bukung paratobod.
A Pag-abot ka Kagorangnan
13 Alagad gosto namung maisiyan ninyo a manga kamatoranan, manga ngod, manungud sa manga nagraan na, tanganing diri kamo magmundu arug ka iba na uda paglaom. 14 Naniniwala kita na si Jesus nagraan sagkud naboway otro. Kaya nagtotobod kitang bobowayun man ka Diyos a manga nagtotobod ki Jesus, sagkud iiiba niya ki Jesus sa pagbalik niya.
15 Sinasabi namu kaninyo a oyon mismo sa katottoroan ka Kagorangnan, kitang manga boway pa pagbalik ka Kagorangnan, diri maoona sa manga guraan na. 16 Ta a Kagorangnan mismo a bomababa galin sa langit, kasabay ka makusug na pagmanda. Marurungug a pagbaoy ka namomoon ka manga anghel sagkud a pagtonog ka trompeta ka Diyos. Bobowayun ngona so manga nagraan na nagtotobod ki Cristo. 17 Pagkatapos, kitang manga boway pa sa alduw na an, dadarawun sadto itaas kaiba nira sadto manga panganoron tanganing sabatun a Kagorangnan. Sagkud makaiiba ta na a Kagorangnan anggan pa man. 18 Kaya ngani pakusugun ninyo a kada usad sa paagi ka manga oosipun na adi.