5
Magin Anda sa Pag-abot ka Kagorangnan
1 Diri ko na kaipowan na isorat kaninyo, manga ngod, kin kono mingyari a manga bagay na adi, 2 ta isi na ninyo na a Alduw ka Kagorangnan omaabot arug sa usad na mataban. 3 Kin sinasabi ka manga tawo: ?Toninung sagkud uda peligro,? biglang omaabot a kapaamakan kanda arug ka kulog na namamatian ka babaying nagbabatyag na. Sagkud diri sira makaliligtas.
4 Alagad kamo diri na namomoway sa kangitngitan, manga ngod, kaya diri kamo mabigla ka alduw na bomalik a Kagorangnan arug sa usad na mataban. 5 Ta kamo ngamin namomoway na sa kaliwanggan sagkud bukung sa kangitngitan. 6 Kaya ngani, diri kita magpabaya arug ka iba na natotorog, kindi magin andam sagkud malinaw a pag-iisip. 7 Ta gab'i a panawon na a tawo natotorog sagkud sa gab'i man nagboboborat. 8 Alagad holi ta namomoway na kita sa liwanag, kaipowan agko na kita malinaw na pag-iisip. Gibowon ta bilang pansarag sa ruruggan a pagtobod sagkud pagkabuut, sagkud bilang helmet man a paglaom ta sa pagkaligtas kanatu ka Diyos. 9 Ta diri kita idinistino ka Diyos sa kapadosaan, kindi sa pag-ako ka kaligtasan sa paagi ka kanatung Kagorangnan na si Jesu-Cristo. 10 Nagraan iya para kanatu, tanganing dawa boway pa kita o guraan na sa pagbalik niya, maboway kita na kaiba niya. 11 Holi kadi, padagos ninyong parumrumun sagkud pakusugun a kada usad, arug ngani ka ginigibo ninyo.
Manga Oring Katogonan sagkud Pangongomusta
12 Nakikiosip kami kaninyo, manga ngod, na igalang ninyo a manga namomoon sagkud nagtotottoro kaninyo alang-alang sa Kagorangnan. 13 Itao ninyo kanda a bilog na paggalang na agko pagkabuut holi ka manga ginigibo nira. Mamoway kamo na matoninung sa kada usad. 14 Nakikiosip kami kaninyo, manga ngod, na pagsabiyan a manga ogakun, pakusugun a manga maloloya a buut, tabangan a manga nanloloya sagkud magin matiyaga kamo sa ngamin. 15 Sigoradowon ninyo na diri ninyo babalusun a maraut kontra sa maraut, kindi ingowaun ninyong makagibo sa karayan sa kada usad sagkud sa ngamin.
16 Mag-ogma kamo pirmi, 17 padagos na mangadyi. 18 Pasalamatan a ngamin na nangyayari, ta amo yan a kabutan ka Diyos para kaninyo na nakipag-usad ki Cristo Jesus.
19 Diri ninyo pag-ulangun a ginigibo ka Espirito Santo, 20 diri ninyo pagbasang-basangun a manga ipinapaayag ka Diyos. 21 Kindi, pag-adalan ninyo sa maraay a ngamin na bagay. Pangaptan ninyo a maraay, 22 sagkud likayan ninyo a ngamin na klase sa karatan.
23 Pakangbanalun logod kamo ka Diyos na amo a nagtatao sa katoninungan. Logod padagoson niyang uda katatsaran a bilog ninyong pagkatawo: a espirito, kalag, sagkud sa awak anggan sa pag-abot otro ka kanatung Kagorangnan na si Jesu-Cristo. 24 A Diyos na binnaoy kaninyo maimbod, kaya gigibowon niya ading manga sinasabi namu. 25 Manga ngod, ipangadyi man ninyo kami. 26 Komostawun ninyo a ngamin na kangoran na tuduk sa buuta. 27 Sinasabi ko kaninyo sa ngaran ka Kagorangnan na basawun ninyo a sorat na adi sa ngamin na kangoran. 28 Mapakaninyo logod a bendisyon ka kanatung Kagorangnan na si Jesu Cristo.