3
1 Kaya ko diri na kami makatius, nagdesisyon kami na ako sagkud si Silas magpatagak na sana sa Atenas, 2 sagkud pinaiyan namu kaninyo si Timoteo na kanatung ngod sagkud katrabawo bilang serbidor ka Diyosa sa pagtottoro ka Maraay na Bareta manungud ki Cristo. Pinaiyan namu iya tanganing patibayun sagkud pakusugun a kaninyong pagtobod, 3 tanganing uda ni usad na manloya kaninyo holi ka manga pagpirsigir na inaagyan ninyo. Isi man ninyo na a manga kadipisilan na adi kinakaipowan tang agyan. 4 Ko kaiba pa kami ninyo pirmi namu kamong pinaparumrum na makamamati kita sa kadipisilan, sagkud arug ka isi ninyo, nangyari mananggayud na adi. 5 Kaya, ko diri na ako makatius, pinaiyan ko siton si Timoteo tanganing makibareta manungud ka kamutangan ka pagtobod ninyo. Ta napoporisaw ako na baka natintaran na kamo ni Satanas sagkud nasayang sana so kapagalan namu sa pagtottoro kaninyo.
6 Alagad ngowan nakabalik na kanamu si Timoteo galin siton kaninyo. Dara niya a magayon na bareta manungud ka kaninyong pagtobod ki Cristo sagkud pagkabuut, a manga magagayon na narurumruman ninyo manungud kanamu, sagkud a kaninyong kamawutan na mabayad kami, arug ka kamawutan namu kaninyo. 7 Holi kadi, manga ngod, namuya kami sa loyo ka kanamung manga kadipisilan sagkud problema sa paagi ka kaninyong pagtobod. 8 Nabowayan a buut namu holi ka pagpapadagos ninyong makusug sa Kagorangnan. 9 Nagpapasalamat kami saigo sa Diyos para kaninyo sa kamuy'an na itinao ninyo kanamu. 10 Alduw gab'i, tuduk sa buut namung ipinapangadyi na makaiba kamo otro tanganing matottoroan kamo sagkud maponoan namu a onoman na kakolangan pa sa kaninyong pagtobod.
11 Logod ibanan kami ka Diyos na kanatung Ama sagkud ka Kagorangnan na si Jesus sa pag-iyan namu siton inyo. 12 A Kagorangnan man logod a magpakusug saigo ka kaninyong pagkabuut sa kada usad sagkud sa ngamin na tawo arug ka pagkabuut namu kaninyo. 13 Sa arug kading paagi mapakukusug niya a kaninyong poso tanganing magpadagos kamong uda katatsaran sagkud banal sa atobangan ka kanatung Diyos sagkud Ama anggan sa pag-abot otro ka kanatung Kagorangnan na si Jesus, kaiba a ngamin niyang pinili.