1 Tesalonica 2

So Pagsirbi ni Pablo sadto Tesalonica

¹ Kamo mismo a nakakaisi, manga ngod, na so pag-iyan namu siton inyo diri naudaan sa kamutangan. ² Isi ninyo so manga kadipisilan sagkud pagtoya-toya na namatian namu sa Filipos bago pa kami omabot siton inyo. Sa loyo kadi tinawan pa nanggayud na kami ka Diyos sa kakusugan sa buut na itottoro kaninyo a Maraay na Bareta na galin kanya dawa kadakul na ulang. ³ Nagtotottoro kami kaninyo bukung tanganing tottoroan kamo sa sala o holi sa agko kami maraut na kamawutan kaninyo, ni uda kami planong dayaun kamo, ⁴ kindi nagtottoro kami bilang manga angay na serbidor ka Diyos na pinagkakatiwalaan ka Maraay na Bareta. Diri namu minawut na omawun kami ka tawo, kindi ka Diyos na amo a nakababayad ka kanatung manga poso. ⁵ Isi man ninyo na sa pagtottoro namu diri namu kamo ginamitan sa manga matatam-is na oosipun sagkud diri kami nagtottoro tanganing usadan kamo. A Diyos mismo a kanamung testigo. ⁶ Diri namu minawut a pag-omaw ka manga tawo, magin kaninyo o ka iba, ⁷ dawa ngani agko kami deretso na omako kadi bilang manga apostol ni Cristo. Imbes nagin maasikaso kami kaninyo arug sa usad na ina na nag-aataman ka kanyang igin. ⁸ Sagkud holi ka pagkabuut namu kaninyo buku sanang a Maraay na Bareta galin sa Diyos a itinao namu kaninyo, kindi magin a kanamung manga boway. Ta payaba namu kamo saigo. ⁹ Sigoradong narurumruman ninyo, manga ngod, so pagtrabawo namu saigo ko kaiba pa kami ninyo. Mantang itinotottoro namu a Maraay na Bareta galin sa Diyos, alduw gab'i kaming nagtrabawo tanganing matostosan so manga pangangaipo namu sagkud diri kami magin pagubat kaninyo.

¹⁰ Kamo a kanamung manga testigo pati na a Diyos na maraay, matanos sagkud uda katatsaran so pakikiiba namu kaninyong manga paratobod. ¹¹ Isi ninyo na so pagtrato namu sa kada usad kaninyo arug sa usad na kag-igin sa igin niya. ¹² Pinakusug namu a kaninyong buut, sagkud sinadol na mamoway na angay sa Diyos, na binnaoy kaninyo sa kanyang kahadian sagkud kamorawayan.

¹³ Pirmi man kaming nagpapasalamat sa Diyos, ta ko akoon ninyo a kanamung itinotottoro, inako ninyo adi bukung bilang oosipun sa tawo, kindi bilang oosipun ka Diyos na nagtatrabawo sa boway ninyong manga paratobod. ¹⁴ Manga ngod, a manga nangyayaring adi kaninyo arug man ko nangyari ko manga simbaan ka Diyos sadto Judea, na manga pareyo tang nagtotobod ki Cristo Jesus. Kin onong kadipisilan a inagyan ninyo sa kamut ka manga kabanwaan ninyo, arug man kan a kadipisilan na inaagyan nira sa kamut ka manga Judio. ¹⁵ Sirang manga Judio a ginnuraan ka Kagorangnan na si Jesus sagkud manga propeta kadto. Sira so manga tawong nagpadipisil sagkud nagpalayas kanamu. Diri namumuya a Diyos sa ginigibo nira sagkud magin a ngamin na tawo kinakalaban nira. ¹⁶ Inuulang nira a pagtottoro namu ka Maraay na Bareta sadto manga bukung Judio tanganing maligtas sira. Holi kadi, innabot na sa kasagadan a kandang manga kasalan sagkud inosgaran na sira ka Diyos.

So Pagmawut ni Pablo na Bisitawun Sira Otro

¹⁷ Alagad kami, manga ngod, sa gatikot na panawon narayo kami kaninyo, sagkud grabi a kanamung kalipungawan sagkud a pagmawut na mabayad kamo otro. Nasoway kami kaninyo sa awak, alagad bukung sa isip. ¹⁸ Gosto namung bomalik kaninyo, orog na ako. Nagkapirang beses namung pinorbaran na bomisita kaninyo, alagad pirmi kaming inuulang ni Satanas. ¹⁹ Gosto namung makabalik kaninyo, ta siisay pa a nagtatao kanamu sa paglaom sagkud kamuy'an kindi kamo? Bukung kamo man a kanamung maipag-orgolyo sa atobangan ka Kagorangnan na si Jesu-Cristo sa pagbalik niya otro? ²⁰ Amo, ta kamo a kanamung onra sagkud kamuy'an!