Onang Sorat ni Pablo sa manga
TagaTesalonica
1
1 Para sa manga kangoran sa Tesalonica na pinili ka Diyos Ama sagkud ka Kagorangnan na si Jesu Cristo:
Mapakaninyo logod a bendisyon sagkud katoninungan ka Diyos.
Akong si Pablo, na nagsorat kadi, kaiba si Silasa sagkud Timoteo, nangongomosta kaninyo.
A Pasasalamat sagkud Pag-omaw ko manga Paratobod sadto Tesalonica
2 Manga ngod, pirmi kaming nagpapasalamat sa Diyos para kaninyo ngamin, sagkud padagos namu kamong iiniiba sa kanamung manga pangadyi. 3 Ta narurumruman namu sa atobangan ka kanatung Diyos sagkud Ama a manga mararaay ninyong gibo na bonga ka kaninyong pagtobod, sagkud a kaninyong manga pag-iingoa na bonga ka pagkabuut sagkud ka kaninyong masarig na paglaom sa kanatung Kagorangnan na si Jesu-Cristo.
4 Isi namu, manga ngod na nabubutan ka Diyos, pinili niya kamo na magin sadiri niya, 5 ta inako ninyo a Maraay na Baretang ipinaayag namu kaninyo. Sagkud adi innabot kaninyo buku sanang sa oosipun kindi sa paagi ka kapangyariyan ka Espirito Santo. Sagkud nasisigoro namu na matood so itinottoro namu kaninyo. Isi ninyo kin paono kami namoway sa kaibaan ninyo, ginibo namu adi para sa karayan ninyo. 6 Inarug ninyo so pamomoway namu sagkud ka Kagorangnan, ta inako ninyo a oosipun ka Diyos dawa namatian ninyo a kasakitan. Alagad mamuya pa nanggayud na kamo holi sa kaogmaan na itinao kaninyo ka Espirito Santo. 7 Holi kadi, nagin arugan kamo ko manga paratobod sadto Macedonia sagkud Acaya. 8 Ta buku sanang a oosipun ka Kagorangnan a linnuyap sadto Macedonia sagkud Acaya holi kaninyo. Magin a pagtobod ninyo sa Diyos napabareta sa interong logar. Kaya diri na namu kaipowan na magngabil sa onoman manungud kaninyo. 9 Ta so manga tawo sadto a nagbareta kin paono ninyo kami inako, sagkud kin paono ninyo tinalikokoran a pagsamba sa manga diyosdiyosan tanganing magsirbi sa matood sagkud boway na Diyos. 10 Sagkud sira man a nagsasabi manungud ka pag-ulat ninyo sa pagbalik ka Igin niya galin sa langit. Iya si Jesus na binoway otro ka Diyos, na migligtas kanatu sa omaabot na kapadosaan.